Tơdrêng ƀă mâu tơdroăng ki xiâm, ki kal tơpui tung roh hôp, mâu kăn hiăng tơmâng, tiâ mơnhên hên mâu tơdroăng ki kuăn pơlê ai kơ-êng.

Khu kăn Kuô̆k hô̆i kong pơlê Dak Nông hiăng trâm mâ kuăn pơlê a mâu bêng Nghĩa Đức (pơlê kong kơdrâm Gia Nghĩa), cheăm Nam Bình (tơring Dak Song), cheăm Dak Lao (tơring Dak Mil) ƀă cheăm Čư̆ Knia (tơring Čư̆ Jut). A mâu rôh trâm kuăn pơlê, mâu kăn Kuô̆k hô̆i hiăng pơchuât hlá mơ-éa tơbeăng ăm kuăn pơlê ‘na klêi kơ’nâi Hneăng hôp má 5, Kuô̆k hô̆i hneăng XV.

Mơnhên tối khât tơdroăng cheăng dêi Khu kăn Kuô̆k hô̆i kong pơlê Dak Nông a Hneăng hôp, kuăn pơlê tối rơhêng vâ pâ thế Tơnêi têa tơmâng ngăn ‘no liăn cheăng hên tâ vâ bro klêi hngêi trăng, troăng klông, tŏng kum mâu tơdroăng ki xơpá ‘na troăng prôk, hngêi trung hriâm, hngêi pơkeăng cheăm a cheăm bêng vâ mơnhông cheăng kâ rêh ối pơlê pơla, mơdêk tơdroăng rêh ối kuăn pơlê.

Pakĭng mê, kuăn pơlê Dak Nông tối ‘na tơdroăng ki klâk têa a vai hdrêng la tá hâi hâi troăng hơlâ pêi pro tơƀrê vâ kơdroh ‘na tơdroăng ki mê; hên tơdroăng tơkêa on tơhrik khía ‘no liăn bro a tơring Dak Song hiăng klêi la tá hâi châ ăm xúa.

Kuăn pơlê xuân pâ thế ƀă mâu kăn Kuô̆k hô̆i kal ai tơ’nôm troăng hơlâ tŏng kum vâ “rak vế tơdroăng cheăng”kăn ƀô̆ ngăn pơkeăng, tơdroăng ki pêi pro troăng hơlâ tŏng kum mâu ngế hơnăm hiăng hên. Ki hlo nôkố cho tung kơvâ tơnêi tơníu, kuăn pơlê a mâu cheăm bêng dêi kong pơlê Dak Nông pâ thế ‘na mâu tơdroăng ki hlo ôh tá tơniăn tung tơdroăng chêl thiê̆n tơnêi tơníu, tơvâ tung chêh bro mơéa klâ tơnêi, hơ’lêh xúa tơnêi, túa pơkâ xúa tơnêi rêm hơnăm ƀă hên ki ê.

Trần Văn Chức, a bêng Nghĩa Đức, Pơlê kong kơdrâm Gia Nghĩa, tối dêi tơdroăng tơmiât tơná:

“Á hlo lơgât pơkâ hdrối nah ƀă logât pơkâ ki nếo kố ai hên tơdroăng ki ôh tá bô bối, malối cho túa pơkâ xúa tơnêi hơnăm 2022 ƀă túa pơkâ xúa tơnêi dêi hơnăm 2023 xuân ai tơdroăng ki ôh tá bô bối, ing mê ai hên rơpŏng kuăn pơlê bro mơ-éa vâ hơ’lêh tơdroăng ki xúa tơnêi pêi chiâk deăng chiâng tơnêi bro hngêi ối la hên hdroh lăm bro ƀă tâi liăn mung vê ngăn, tui lui xuân ôh tá kâi châ bro, gá bro xơpá khât ăm kuăn pơlê”.

Xuân tung măng tĭng hdrối, mâu kăn Kuô̆k hô̆i kong pơlê Dak Lak hiăng ai mâu rôh trâm kuăn pơlê a mâu tơring Čư̆ Mgar, Lak, Krông Bông ƀă pơlê Dak Lak hiăng tơbleăng ăm kuăn pơlê klêi kơ’nâi tơdroăng pêi cheăng a Hneăng hôp má 5, Kuô̆k hô̆i hneăng XV pơla hdrối kố nah ƀă tơdroăng pêi cheăng dêi khu kăn Kuô̆k hô̆i kong pơlê Dak Lak a hneăng hôp; tơmâng ƀă chêh xo mâu rơkong tơpui, pâ thế dêi kuăn pơlê pơtroh ăm Kuô̆k hô̆i.

A mâu tơring, tơdroăng ki kuăn pơlê kal vâ ‘nâi plĕng hên má môi mê cho tơdroăng ki tơdjâk troh gâk kring tơdroăng kal kí ƀă tơniăn tung pơlê pơla, malối cho klêi kơ’nâi ai tơdroăng ki ôh tá tơniăn a tơring Čư̆ Kuin, kong pơlê Dak Lak. Kuăn pơlê ai tối tiah kố, rôh ki ai tơdroăng ki ôh tá tơniăn mê hiăng châ mâu kuăn pơlê tơmâng ngăn khât, pơkâ tơleăng teăm tơdrêng dêi khu lêng ki ai tơdjâk troh ƀă khu kăn pơkuâ, bro tơdroăng ki hmiân tuăn, môi tuăn sap ing kuăn pơlê.

Laga, kố xuân cho tơdroăng ki ôh tá tơniăn khât, cho ƀai hriâm vâ mâu khu pơkuâ tơdroăng kal kí kal mơdêk tâ nếo hiâm mơno tơrŭm, kơchăng ƀă mâu tơdroăng ki tơmiât dêi khu ‘mêi. Lê Đình Trúc a thôn 1, cheăm Ea Kiết, tơring Čư̆ Mgar tối:

“Ngin rơhêng vâ bro tiah lâi tơdroăng gak kring tơniăn dêi kong pơlê Dak Lak tối tơdjuôm, dêi mâu cheăm tối krê, môi tiah cheăm Ea Kiết ngin mê rơhêng vâ ti lâi mâu ngế ki lâi ‘lo lơ tung tơdroăng gâk kring tơniăn hiăng ai tơdroăng mê athế hbrâ mơdât tơniăn ƀă mơ’no tối vâ pôi tá pro tơdjâk tơdjuôm ăm tơdroăng gâk kring tơniăn.

Pơtih môi tiah cheăm ngin xuân dế mơ-eăm pêi pro troh mơjiâng thôn pơlê nếo. Vâ pêi klêi tơdroăng kố mê xuân athế ai tŭm, la a mê mâu tơdroăng pơkâ cheăng kâ, kal kí, rêh ối pơlê pơla, gâk kring cheăm bêng”.

Rơtế amê, kuăn pơlê a pơlê kong kơdrâm Ƀuôn Ma Thuột rơhêng vâ ‘nâi plĕng khât troh Pơkâ túa ki xúa tơnêi pơla hơnăm 2021 – 2030 xua Vi ƀan hnê ngăn pơlê kong kơdrâm nếo tơbleăng a mơ’nui khế 5 kố nah. Tiô pơkâ kố, kô ai lối 1.100 ha tơnêi dêi 12 to cheăm, bêng ối tung pơlê kong kơdrâm athế hơ’lêh sap ing tơnêi ối chiâng tơnêi pêt mâu hdrê loăng ton hơnăm ƀă tơnêi pêt loăng ngiât.

Kuăn pơlê a mâu kơpong kố pơkâ tơdroăng, tâng tiô pơkâ kố ai mâu pơlê cheăm kô ôh tá ai tơnêi ối xếo. Y MNông Hmok, a cheăm Ea Kao, pơlê kong kơdrâm Ƀuôn Ma Thuột tối ‘na tơdroăng tơpui dêi tơná:

“Tung 14 to thôn pơlê mê hlo túa pơkâ tơnêi ối gá iâ, tá hâi tơtro ƀă kơpong thôn pơlê. Vâi krâ ngŏng o pin athế ai tơnêi ối nếo chiâng bro hngêi ối ƀă klâ xoăng ăm dêi kuăn’nĕng. Ƀă kơpong ƀuôn Huê, cheăm Ea Kao, pơlê kong kơdrâm Ƀuôn Ma Thuột, tiô á ngăn hlo tung lơgât pơkâ mê nôkố ôh tá ai ƀăng tơnêi ki lâi cho tơnêi ối, bu pơkâ tơnêi pêt hdrê loăng ton hơnăm, tơnêi tê mơdró, tơnêi kơpong xah hêi ƀă tơnêi a hngêi troăng. Mê ƀuôn Huê cheăm Ea Kao rêh ối sap ing ton nah troh nôkố la ôh ti ‘nâi xo ah hmôi ƀuôn Huê kố gá kô ti lâi”.

Tâng xo ƀă mơnhên tối khât mâu rơkong tơpui tối dêi kuăn pơlê, khu kăn Kuô̆k hô̆i kong pơlê Dak Lak hiăng pơkâ thế mâu kơ koan ki ai hnoăng pơkuâ ƀă kong pơlê tơpui tối leăng. Ƀă mâu tơdroăng ki ê, khu kô chêh tơkŭm, pâ thế troh Kuô̆k hô̆i, Chin phuh ƀă mâu Khu xiâm kơvâ cheăng tung mâu hneăng hôp ki pơtối.