Khu kăn Kuô̆k hŏi kong pơlê Dak Lak hiăng tơkŭm po Rôh hôp xo rơkong tơpui tối ‘na kơxop hlá mơ-éa luât tiô tối hdrối kô châ Kuô̆k hô̆i mơ’no tơpui tơno a hneăng hôp rôh kố. A rôh hôp, kuăn pơlê Dak Lak hiăng veăng tơpui tối hên tơdroăng ki kal tơdjâk troh Luât Viễn Thông ki ‘mâi hơ’lêh; Luât Kong kế tơmeăm khoăng ki ‘mâi hơ’lêh; Luât Mâu khu tơrŭm ăm mung liăn ki ‘mâi hơ’lêh; Luât Pơkuâ, rak ngăn kế tơmeăm ƀă khu lêng; Luât Tê mơdró hngêi trăng tơnêi tíu ki ‘mâi hơ’lêh; Luât Hngêi ối ki ‘mâi hơ’lêh.

Ăm rơkong veăng tơpui tối ‘na Luât tê mơdró hngêi trăng tơnêi tơníu ki ‘mâi hơ’lêh, hên kuăn pơlê tối tiah kố: ƀă mâu tơdroăng pơkâ nếo, kô bro chiâng tơdroăng ki ai tŭm mâu tơdroăng luât, tơdâng tơ’mô, môi tuăn vâ pơkuâ kơchơ mơdró hngêi trăng tơnêi tơníu, tŏng kum, mơdêk kơchơ mơdró hngêi trăng, tơnêi tơníu.

Pro tơ’lêi hlâu ăm tơdroăng cheăng tê mơdró hngêi trăng, tơnêi tơníu, rak vế kơchơ mơdró hngêi trăng tơnêi tơníu mơnhông tơniăn, rơdêi, tơbleăng tơdrăng. Laga, vâ mơdêk hnoăng cheăng pôu râng, ivá cheăng dêi kơ koan pơkuâ ngăn tơnêi têa ‘na tơdroăng cheăng tê mơdró hngêi trăng tơnêi tơníu kal ‘mot tơ’nôm mâu tơdroăng ki kal séa ngăn tơdroăng pêi pro tiô luât ‘na mơdró hngêi trăng tơnêi tơníu.

Pôa Hoàng Trọng Hùng, Kăn phŏ pơkuâ Khu mơjiâng luât kong pơlê Dak Lak veăng tơpui:

“Khoảnh 6 troăng 87 tối tơdroăng ki kal pơkuâ ngăn tơnêi têa ‘na tơdroăng cheăng tê mơdró hngêi trăng tơnêi tơníu mê á pâ thế ‘mot tơ’nôm tơdroăng ki kal mê cho séa ngăn tơdroăng pêi pro tiô luât ‘na tê mơdró hngêi trăng tơnêi tơníu. Mê cho tơdroăng ki kal khât tung pơkuâ ngăn tơnêi têa. Ƀă a troăng 89 xuân ai tơdroăng ki kal pơcháu ăm Khu xiâm mơjiâng bro kế tơmeăm tí tăng ‘nâi plĕng ăm Chin phuh séa ngăn tơdroăng ki pêi pro luât tung kơvâ tê mơdró hngêi trăng tơnêi tơníu xua mê pơkâ thế ‘mot tơ’nôm tơdroăng kố”.

Tơpui mơgêi a rôh hôp, jâ Lê Thị Thanh Xuân, kăn phŏ Khu kăn cheăng, pơkuâ Khu kăn Kuô̆k hô̆i kong pơlê Dak Lak hiăng tơmâng xo, mơnhên tối khât mâu tơdroăng ki veăng tơpui tối dêi mâu kăn ƀă mâu kơxop hlá mơéa mơnhên tối mâu rơkong tơpui tối dêi mâu kăn ƀă mâu kơxop hlá mơ-éa luât. Tơdrêng amê hlối rơhêng vâ mâu kăn pơtối hriăn ngăn ƀă ai tơ’nôm mâu rơkong tơpui tối ƀă hlá mơ-éa pơtroh ăm khu kăn Kuô̆k hô̆i kong pơlê tơmâng xo, chêh tơkŭm vâ pơchuât a hneăng hôp má 5.

Xuân tung măng tĭng hdrối, Khu kăn Kuô̆k hô̆i kong pơlê Kon Tum tơrŭm ƀă Khu pơkuâ Vi ƀan Măt trâ̆n Tơnêi têa Việt Nam kong pơlê Kon Tum ƀă Khu pơkuâ tơdroăng pêi cheăng kong pơlê tơkŭm po Rôh trâm ‘na tơdroăng ki kal ƀă vâ chê 100 ngế kuăn pơlê cho kŏng nhân pêi cheăng a kong pơlê.

A rôh hôp, kuăn pơlê cho kŏng nhân pêi cheăng kong pơlê Kon Tum hiăng pâ thế kơ Khu kăn Kuô̆k hô̆i kong pơlê 6 khu tơdroăng ƀă 38 tơdroăng ki kal, mê cho: Khu tơdroăng cheăng hnê mơhno, pêi pro troăng hơlâ tŏng kum; Khu kơvâ pêi chiâk deăng, pêt kong; Khu ki mơjiâng bro tê mơdró tơmeăm; Khu kơvâ cheăng khăm pơlât; Khu kơvâ cheăng hnê hriâm, hnê cheăng pêi ƀă Khu troăng hơlâ tŏng kum, rêh ối pơlê pơla.

Tơbleăng troh kuăn pơlê, pôa Phạm Đình Thanh, Kăn phŏ pơkuâ Khu kăn Kuô̆k hô̆i kong pơlê Kon Tum ăm ‘nâi, mâu tơdroăng ki kuăn pơlê cho kŏng nhân pêi cheăng tung kong pơlê pâ thế khu kăn Kuô̆k hô̆i kong pơlê hiăng pâ thế tŭm ƀă Chin phuh, Kuô̆k hô̆i ƀă mâu Khu xiâm, kơvâ cheăng ki ai tơdjâk troh. Ki nhên môi tiah tơdroăng ki tŏng kum, troăng hơlâ tŏng kum ƀă viên chưk, mâu ngế pêi cheăng a mâu Khu pơkuâ ngăn kong; tơdroăng tŏng kum mâu ƀok thái pơkeăng malối cho mâu rôh ki pêi hnoăng cheăng hbrâ mơdât pơreăng ƀă hên ki ê.

Vâ tâi tâng mâu rơkong tơpui tối, pâ thế dêi kuăn pơlê cho kŏng nhân pêi cheăng tung kong pơlê pơrá châ hmâng, tŏng kum, pôa Phạm Đình Thanh, pơkâ thế:

“Khu kăn Kuô̆k hô̆i kong pơlê vâ Khu pơkuâ ngăn Khu tơrŭm pêi cheăng kong pơlê séa ngăn mâu tơdroăng pâ thế ki nhên ƀă rêm tơdroăng ki kal, tơkéa vâ tối cho tung 38 to tơdroăng kal kố mê pơtối séa ngăn ƀă athế ai rơkong pâ thế nhên pôi tá cheh xo bô bối. Xua tâng chêh xo bô bối mê gá xơpá ăm kơ koan Tơnêi têa tơleăng tiâ mơnhên.

Mâu tơdroăng ki kal ối tung hnoăng cheăng tiâ mơnhên dêi kơ koan Tơnêi têa mê ngin kô chêh tơkŭm, pâ thế ing Vi ƀan pơkuâ Kuô̆k hô̆i”.

A mâu rôh trâm kuăn pơlê, Khu kăn Kuô̆k hô̆i mâu kong pơlê tung kơpong Tây Nguyên hiăng tơbleăng túa pơkâ Hneăng hôp má 5, Kuô̆k hô̆i hneăng 15; tơdrêng amê hlối tơmâng xo mâu rơkong tơpui tối, pâ thế dêi kuăn pơlê vâ tơkŭm, tối tơbleăng troh kơ koan ki ai tơdjâk troh tơleăng mơnhên tiô pơkâ.

Pôa Bùi Văn Cường, ngế xiâm chêh tôm xo rơkong Kuô̆k hô̆i, kăn pơkuâ Ƀơrô cheăng Kuô̆k hô̆i ăm ‘nâi, Hneăng hôp má 5, Kuô̆k hô̆i hneăng 15 po a hâi lơ 22/5; mơgêi a hâi lơ 20/6/2023 (hbrâ hdrối hâi lơ 21/6/2023).

Tiô tối hdrối, hâi khế Kuô̆k hô̆i pêi cheăng a hneăng hôp kố cho 22 hâi. Hnoăng cheăng hbrâ ăm hneăng hôp hiăng châ mâu kơ koan tơrŭm cheăng pêi pro tơdrêng vâ rak vế tơtro, teăm hâi khế ăm hneăng hôp kố.