Tung tơdroăng ‘no liăn cheăng tơdjuôm, mâu kăn Kuô̆k hô̆i xuân tơtrŏng tơdroăng ki ‘no liăn tá hâi châ tiô tơdroăng ki púi vâ a 3 Tơdroăng pơkâ dêi tơnêi têa, malối cho tơdroăng pơkâ nếo ‘na mơnhông mơdêk cheăng kâ rêh ối pơlê pơla kơpong kuăn pơlê hdroâng kuăn ngo ƀă kong ngo. Maluâ hiăng châ tơbleăng ton hneăng cho mơjiâng thôn pơlê nếo ƀă kơdroh kơtiê krá ton, xuân ối tơvâ hên tá hâi châ pơkâ tơleăng tro.

Pôa Đinh Ngọc Quý, Ngế cheăng tung Vi ƀan Pơlê pơla dêi Kuô̆k hô̆i pơchân:

"Mâu tơdroăng pơkâ ‘na tơkŭm po mâu tơdroăng ối xơpá, tơvâ tơvân ƀă Ngế pro xiâm hnê ngăn Chin phuh hiăng athế pơkâ tơdroăng tŏng kum lối 400 tơdroăng tơvâ, troh chôu phut kố mê mâu khu xiâm, kơvâ cheăng xuân hiăng tiâ mơnhên. Laga, tơdroăng ki ‘mâi rơnêu Pơkâ tơdjâk troh tơdroăng pêi pro, xing xoăng tơdroăng pơkâ kố tá hâi teăm châ pơkâ ƀă Chin phuh dế tung pơla vâ pêi klêi.

Tơngah tung la ngiâ, Chin phuh kô mơdêk tơdroăng pơkâ kố, vâ ôh ti xê to kum mâu khu xiâm, kơvâ cheăng mê ối kum mâu kong pơlê pơkâ tơleăng mâu tơdroăng xơpá, malối cho tơdroăng ki tơkŭm pêi pro pơrá a râ tơring, râ cheăm”.

Nâ Nguyễn Thị Hải, cheăm Ia Ƀăng, tơring Čư̆ Prông, kong pơlê Gia Lai tối tiah kố, tung mâu hơnăm hdrối mê hía nah, tơdroăng ki tơbleăng mâu pơkâ dêi tơnêi têa a kơpong hngế hngo dêi kong pơlê Gia Lai tá hâi châ môi tiah tơdroăng tơngah. Tung mê, ki kal má môi cho kal ‘no liăn bro troăng prôk vâ mơdêk ki tơ’lêi hlâu tung tơdroăng rêh ối, cheăng kâ, mơdêk tơrŭm tê mơdró a mâu kơpong ki xơpá.

“Á hlo tiah kố a mâu kơpong hngế hngo mê kal athế ‘no liăn pro hên tơdroăng, ki kal má môi cho tơdroăng ki ‘no liăn pro troăng prôk, xua mê xuân cho môi tung mâu tơdroăng ki xơpá chiâng tơdjâk troh tơdroăng hok tro lo pơtê hriâm hên, kuăn pơlê prôk lăm xơpá, tê mơdró, chơ tơmeăm xuân xơpá, ai drêng ‘nâ pêi châ hên tơmeăm la ôh tá ai troăng lĕm vâ chơ troh a tíu ki vâi roê”.

Kuăn pơlê Dak Lak rơhêng vâ hlê troh troăng hơlâ tŏng kum khu mơdró kâ kŭn ƀă krâ kơvâ tung tơdroăng ki ôh tá tơniăn ‘na liăn ngân môi tiah nôkố. Dak Lak nôkố ai dâng 13.500 khu mơdró kâ dế pêi cheăng, tung mê, khu mơdró kâ kŭn ƀă krâ kơvâ, châ 97,5% tung tâi tâng khu mơdró kâ a kong pơlê.

Tung pơla hdrối nah, ai mâu troăng hơlâ tŏng kum hiăng châ xúa tro veăng kum bro tơdjâk troh mâu khu mơdró kâ kŭn ƀă krâ kơvâ. Laga, hên kuăn pơlê tối tiah kố, ki khât khu mơdró kâ xuân ối trâm mâu tơdroăng xơpá má môi cho tung mung liăn vâ pêi cheăng drêng ai mâu khu xiâm, kơvâ cheăng ki ai tơdjâk troh ki tối a kơpêng tá hâi ai hlá Mơ-éa hnê mơhno nhên, mê chiâng bro ôh tá hâi rơke khât drêng tơbleăng pêi pro, malối cho ƀă mâu khu mơdró kâ pêi cheăng tung kơvâ pêi chiâk deăng.

Jâ Nguyễn Thị Hường, kuăn pơlê ối a pơlê kong kơdrâm Ƀuôn Ma Thuột, kong pơla Dak Lak pâ thế.

“Tơnêi kal ai troăng hơlâ tŏng kum ăm khu mơdró kâ pêi cheăng tung kơvâ pêi chiâk deăng. Hdrối nah mâu troăng hơlâ xúa ăm kơvâ pêi chiâk deăng ăm khu pêi cheăng tơrŭm mê hiăng pêi cheăng tro, nôkố kal tơ’nôm mâu troăng hơlâ tŏng kum ăm mâu khu mơdró kâ pêi cheăng tung kơvâ pêi chiâk deăng krâ kơvâ ƀă kŭn.

Pơtih tŏng kum mung liăn ƀă mâu troăng hơlâ kơjo kum ăm tơdroăng ki xiâm ăm kơvâ pêi chiâk deăng. A rôh hôp kố khu mơdró kâ rơhêng vâ Kuô̆k hô̆i tơpui tơno tơ’nôm ‘na mâu tơdroăng kố”.

Ki kal cho mơdêk tơƀrê mâu troăng hơlâ ‘mâi mơnhông ƀă mơdêk cheăng kâ, ôh ti xê cho kal tơ’nôm mâu troăng hơlâ pơkâ nếo. Kố cho tơdroăng ki châ tơpui tối dêi hên mâu kăn Kuô̆k hô̆i tơpui tối a kĭng hneăng hôp Kuô̆k hô̆i rôh kố.

Mâu kăn Kuô̆k hô̆i tối nhên, tơdroăng ki kal cho mơdêk tơƀrê liăn tơnêi têa ki mơ’no vâ mơdêk ‘no liăn cheăng tơdjuôm, lơ vâ tŏng kum khu mơdró kâ tơkâ luâ xơpá môi tiah nôkố. Mê nếo cho túa xúa liăn tơƀrê má môi vâ mơdêk ‘mâi mơnhông cheăng kâ ƀă mơdêk pêi lo liăn. Xua mê, pôa Phan Đức Hiếu, ngế cheăng tung Vi ƀan ngăn ‘na cheăng kâ dêi Kuô̆k hô̆i pơkâ thế ƀă tơdroăng pơkâ dêi Chin phuh ‘na pơtối pêi pro troăng hơlâ kơdroh 2% nâp hnoăng liăn mơhá ki mơdêk – VAT:

“Pêi pro troăng hơlâ kơdroh nâp hnoăng liăn mơhá mơdêk hneăng pơla hdrối nah, xuân trâm hlo hên tơdroăng ki tá hâi tơtro, ối ai mâu tơdroăng xơpá ăm kơkoan pơkuâ ngăn ƀă khu mơdró kâ tung pêi pro kơtăng, môi tiah hơ’lêh tơdroăng mơ’no liăn ngân, lơ mâu tơdroăng kơ-êng môi tiah xo liăn hdrối hâi pơkâ hlá mơéa đơn chêh kơ’nâi hâi xo hôm chiâng há?

Mê rôh kố rơhêng vâ ôh tá pêi môi tiah hdrối nah xếo, vâ kum ƀă hnê mơhno drêng Kuô̆k hô̆i tơbleăng kơdroh nâp hnoăng liăn mơhá VAT kố mê châ pêi pro tung tơdroăng ki ai khât ki ôh tá trâm pá. Trâm pá tơkéa vâ tối cho tơƀrê dêi troăng hơlâ gá kơdroh”.