Tơpui a rôh trâm mâ, Kăn xiâm hnê ngăn Kuô̆k hô̆i Vương Đình Huệ tối tiah kố, Kuô̆k hô̆i hiăng ai môi hơnăm hlo tơƀrê khât ƀă 10 tơdroăng cheăng ki xiâm hiăng châ hlá tơbeăng rah xo. Malối, tung mâu hâi pêi cheăng ki apoăng dêi hơnăm 2024, Kuô̆k hô̆i hiăng tơkŭm po ƀlêi chiâng Hneăng hôp ôh tá tối hdrối rôh má 5, tơbleăng hên tơdroăng ki kal, malối cho tơbleăng Luât Tơnêi tơníu ki ‘mâi hơ’lêh ƀă Luât Mâu khu tơrŭm ăm mung liăn ki ‘mâi hơ’lêh, châ mâu khu ki rơkê, kuăn pơlê, khu mơdró kâ tung tơnêi têa ƀă kong têa ê mơnhên tối khât. Hdrối rôh vâ pơtê Têt Lo hơnăm nếo, Kăn xiâm hnê ngăn Kuô̆k hô̆i hiăng kĭ chứng thực péa tơdroăng luât ki kal kố.

Teăng mâ Đảng đoân Kuô̆k hô̆i,Vi ƀan pơkuâ Kuô̆k hô̆i, Kăn xiâm hnê ngăn Kuô̆k hô̆i, mâu kơ koan dêi Vi ƀan pơkuâ Kuô̆k hô̆i, kăn ƀô̆, mơngế pơkuâ, mơngế pêi cheăng dêi ƀơrô cheăng Kuô̆k hô̆i hiăng kơhnâ mơ-eăm, tơmiât tro ‘ló pro ƀlêi chiâng rơkê má môi dêi hơnăm 2023.

Tối nhên, hơnăm 2024 cho môi hơnăm ki tơviah, cho hơnăm mâu kơvâ cheăng, rêm râ, mâu kơ koan, kong pơlê pơrá athế thăm mơdêk ki rơdêi vâ pêi klêi mâu tơdroăng pơkâ pêi ‘na cheăng kâ rêh ối pơlê pơla dêi hneăng cheăng, Kăn xiâm hnê ngăn Kuô̆k hô̆i tối tiah kố, Kuô̆k hô̆i hâk tơngăm ‘na mâu tơdroăng ki hiăng pêi pro klêi hiăng châ tơƀrê tung hơnăm 2023, la xuân ôh tá chiâng phêp tơƀrê tiah mê hiăng hôm, ah ôh tá vâ tơmâng.

Tiô tối hdrối, tơdroăng cheăng pêi dêi hơnăm kố gá hên, pakĭng mâu tơdroăng cheăng ki pêi đi đo tung hnoăng cheăng mơjiâng luât, séa ngăn luât xiâm, pơkâ mâu tơdroăng ki kal dêi tơnêi têa ƀă hnoăng cheăng ki ê, Ƀơrô cheăng Kuô̆k hô̆i ối athế kơhnâ hbrâ vâ pêi pro troh tơdroăng tơbâ 80 hơnăm hâi Pôk kăn xiâm pơkuâ Kuô̆k hô̆i ki apoăng. Xua mê, Kăn xiâm hnê ngăn Kuô̆k hô̆i pơchân:

“Á hiăng tối hên xôh mê cho hâi khế cho khu ki pêi. Xua mê, pin athế pơxiâm pêi tơdroăng cheăng ing mâu hâi ki apoăng khế ƀă tiô mâu túa pơkâ dêi tơdroăng cheăng ki hiăng mơ’no. Pin athế pơtối mơ-eăm vâ tơmiât troh môi Kuô̆k hô̆i rế hía rế rơkê, mơdêk tơdroăng tơniăn krê, mơdêk tơdroăng ki pơkuâ dêi luât, la athế đi đo séa ngăn tơdroăng cheăng rêh ối, vâ pêi pro châ tơdroăng rơhêng vâ dêi tơdroăng ai khât, rak tơniăn tơdroăng cheăng dêi Kuô̆k hô̆i xua tơdroăng ki kal ƀă ki pơxúa dêi tơnêi têa ƀă hdroâng mơngế. Rêm tơdroăng pơkâ dêi Kuô̆k hô̆i cho xo kuăn pơlê ƀă khu mơdró kâ ‘măn a tíu xiâm. Ƀă tơdroăng ki pơhlêh mâu tơdroăng ki ôh tá tơ’lêi hlâu chiâng tơ’lêi hlâu, teăm tơdrêng, rak tơniăn ăm tơdroăng ki vâ pơhlêh tơnêi têa rĕng mơnhông, krá tơniăn ƀă tơrŭm cheăng kong têa ê”.

Kăn xiâm hnê ngăn Kuô̆k hô̆i pơchân mâu kơ koan dêi Kuô̆k hô̆i, mâu Khu râ pơkuâ cheăng dêi Vi ƀan pơkuâ Kuô̆k hô̆i ƀă kăn ƀô̆, kong chưk, viên chưk, ngế pêi cheăng Ƀơrô cheăng Kuô̆k hô̆i pơkâ kơtăng tơdroăng ki hnê mơhno dêi kăn xiâm pơkuâ hnê ngăn Đảng Nguyễn Phú Trọng a rôh trâm mâ ƀă rơkâu Têt mâu vâi pú kăn pơkuâ nôkố ƀă mâu kăn pơkuâ Đảng, Tơnêi têa hneăng hdrối tiah kố: “Hơnăm 2023 hiăng tơrŭm, hơnăm 2024 rế tơrŭm tâ nếo. Hơnăm 2023 hiăng ƀlêi chiâng, hơnăm 2024 athế ƀlêi chiâng hên tâ nếo”.

Drêng apoăng rơnó Hơngui hơnăm nếo, Kăn xiâm hnê ngăn Kuô̆k hô̆i Vương Đình Huệ rơkâu mâu kăn Kuô̆k hô̆i, mâu kơ koan dêi Kuô̆k hô̆i, mâu kơ koan dêi Vi ƀan pơkuâ Kuô̆k hô̆i, kăn ƀô̆, mơngế pơkuâ, mơngế pêi cheăng dêi ƀơrô cheăng Kuô̆k hô̆i ai môi hơnăm Giáp Thìn kro mơdrŏng.

Hdrối mê, ngế xiâm chêh tôm xo rơkong, kăn pơkuâ Ƀơrô cheăng Kuô̆k hô̆i Bùi Văn Cường hiăng pơchuât tơbleăng klêi kơ’nâi tơdroăng cheăng tung rôh Têt Lo hơnăm nếo Giáp Thìn 2024. Tiah mê, Vi ƀan pơkuâ Kuô̆k hô̆i hiăng tơbleăng, pơkâ kơtăng Hô̆i đong Hdroâng kuăn ngo, mâu Vi ƀan dêi Kuô̆k hô̆i, Ƀơrô cheăng Kuô̆k hô̆i, mâu kơ koan ối tung Vi ƀan pơkuâ Kuô̆k hô̆i pêi pro kơtăng tơdroăng pơkâ kơxô̆ 26 dêi Khu pơkuâ hnê ngăn Đảng, tơdroăng pơkâ kơxô̆ 30 dêi Ngế pro xiâm hnê ngăn Chin phuh, tơdrêng amê hlối pơchân pêi pro tro mâu troăng hơlâ tŏng kum rêh ối pơlê pơla, tŏng kum tơdroăng rêh ối liăn ngân ƀă hiâm mơno dêi kăn ƀô̆, kong chưk, viên chưk, ngế pêi cheăng, mâu rơpŏng ki châ tơnêi têa kum, ngế ki xơpá.

Mâu tơdroăng cheăng pôu, rơkâu Têt dêi Kăn xiâm hnê ngăn Kuô̆k hô̆i, mâu kăn xiâm phŏ hnê ngăn Kuô̆k hô̆i, mâu ngế cheăng tung Vi ƀan pơkuâ Kuô̆k hô̆i tiô tơdroăng ki xoăng, rak tơniăn krâu, kơdĭng, tơƀrê tro ƀă tơdroăng ki ai khât.

Mâu kơ koan dêi Kuô̆k hô̆i, kơ koan ối tung Vi ƀan pơkuâ Kuô̆k hô̆i hiăng pơkâ mâu tơdroăng, túa pơkâ tơbleăng hnoăng cheăng hơnăm 2024 rak tơniăn tro tơdroăng.