Kăn xiâm hnê ngăn Kuô̆k hô̆i Vương Đình Huệ ăm ‘nâi tơdroăng kố drêng tối tơbleăng a hâi pơxiâm po hôp rôh má 28 dêi Vi ƀan pơkuâ Kuô̆k hô̆i kơxo hâi lơ 13/12. Rôh hôp po 3 hâi , hâi lơ 13,14 ƀă 18/12. ‘Na tơdroăng veăng tơmâng tối mơgêi rôh hôp má 6, Kăn xiâm hnê ngăn Kuô̆k hô̆i ăm ‘nâi, tiô hmâ kô tối mơgêi tâi tâng tơdroăng cheăng ing tơdroăng hnê tối dêi mâu kăn ƀă kuăn pơlê drêng séa ngăn mâu tơdroăng ki klâi kal hriâm, malối kal hơ’lêh nếo  vâ mơdêk tơƀrê dêi hneăng hôp.

Tơdjâk troh tơdroăng veăng hnê tối mâu tơdroăng hbrâ rôh hôp má 7 (khế 5/2024), pôa Vương Đình Huệ tối nhên, pơla hdrối kố  nah ai péa tơdroăng tơkêa luât ki kal dêi Kuô̆k hô̆i hâi pơkâ nhên mê ối pơkâ tơdroăng chêh ‘na tơnêi têa, pơkâ mơnúa xúa luât pơkâ ăm 3 tơdroăng pơkâ dêi tơnêi têa xuân môi tiah mâu tơdroăng ‘na liăn ngân, liăn ki u ối cho hnoăng pơkâ dêi Kuô̆k hô̆i.

Xua mê, thế tơmiât troh tơdroăng ai 1 rôh hôp chuyên đề (ki ôh tá xê tiah hmâ) vâ tơleăng mơnhên mâu tơdroăng ki u ối ƀă pêi tơdrêng pa ngiâ.