Pôu râng hnoăng dêi Ngế pro xiâm hnê ngăn tơnêi têa pơchuât mơ-éa tơbleăng, Ngế xiâm pơkuâ liăn ngân Hồ Đức Phớc tối ăm ‘nâi, Chin phuh pơkâ mâu troăng pêi troăng hơlâ ki phá tơ-ê hluâ hnoăng dêi Chin phuh vâ tah lôi tâi tâng mâu tơdroăng pá puât, tơvâ tơvân, pơtối pro tơ’lêi hlâu vâ mâu kong pơlê pêi pro rĕng tơdroăng pêi cheăng, mơ’no liăn mâu tơdroăng pơkâ xiâm tơnêi têa tung la ngiâ xua nôkố tơdroăng châ tơƀrê po rơdâ pêi pro mâu tơdroăng pơkâ xiâm tơnêi têa tá hâi châ tơƀrê, tơdroăng mơ’no liăn cheăng Tơnêi têa châ pơcháu ối hrá.

Chin phuh tối, mâu troăng pêi kố tâng châ tơbleăng ăm pêi pro kô tah lôi mâu tơdroăng pá puât, tơvâ tơvân, pro tơ’lêi hlâu ăm kong pơlê pêi pro rĕng tơdroăng pêi pro, mơ’no liăn mâu tơdroăng pơkâ pêi plah tơnêi têa, ki rơhêng vâ tối cho mơ’no liăn kơxô̆ liăn mơno pêi cheăng kân vâ pơxúa pơlê pơla.