Hâi lơ 19/7, Khu kăn séa ngăn dêi Kuô̆k hô̆i xua Thươ̆ng tươ̆ng Trần Quang Phương, kăn phŏ hnê ngăn Kuô̆k hô̆i pro Kăn pơkuâ djâ khu kăn kố hiăng ai rôh pêi cheăng ƀă kăn pơkuâ kong pơlê Dak Lak ‘na klêi kơ’nâi tơbleăng pêi mâu tơdroăng Pơkâ dêi Kuô̆k hô̆i mê cho: tơdroăng pơkâ dêi tơnêi têa mơjiâng thôn pơlê nếo; tơdroăng kơdroh kơtiê krá ton pơla hơnăm 2021 – 2025 ƀă tơdroăng mơnhông cheăng kâ – rêh ối pơlê pơla kơpong hdroâng kuăn ngo ƀă kong ngo pơla hơnăm 2021 – 2030.

Tối ăm khu kăn ki pêi dêi hnoăng cheăng kố, klêi kơ’nâi vâ chê 3 hơnăm tơbleăng pêi 3 tơdroăng pơkâ dêi tơnêi têa, ngiâ méa thôn pơlê Dak Lak hiăng hlo hơ’lêh. Tơdroăng rêh ối kuăn pơlê kơpong hdroâng kuăn ngo rế hía rế hơ’lêh, tơdroăng mơhno túa lĕm tro rêh ối pơlê pơla hlo hên tơdroăng hơ’lêh, kơxô̆ rơpŏng kơtiê rế hía rế kơdroh.

Tơdroăng rêh ối, hiâm mơno dêi kuăn pơlê pơtối châ tơmâng ngăn tá ki rơkê ki lĕm tro. Khu xiâm pơkuâ tơdroăng kal kí châ ‘mâi rơnêu ƀă séa ngăn. Gak kring tơdroăng kal kí, gâk kring tơniăn tung lâp pơlê pơla châ rak vế.

Laga, pakĭng mâu tơdroăng ki pêi pro klêi, tung pơla pêi pro 3 tơdroăng pơkâ dêi tơnêi têa a Dak Lak xuân trâm hên xơpá. Ai mâu túa pơkâ xơpá vâ pơkâ mơ’no. Ki rơkê tung kơdroh kơtiê tá hâi krá tơniăn khât, mơni kô ai tơdroăng ki mâu rơpŏng ki vêh kơtiê nếo tung la ngiâ.

Mơhno mâu xiâm kối chiâng xơpá tung pêi pro 3 tơdroăng pơkâ dêi tơnêi têa, mâu kăn tối tiah kố: Mâu ngế cheăng ƀă ivá cheăng dêi mâu kăn ƀô̆ vâ pêi pro mâu tơdroăng kố a rêm râ pơkuâ tá hâi tŭm ƀă ối ‘ro, ôh tá tơƀrê. Rơtế amê, ai mâu tơdroăng tơkêa bro, tơdroăng ki kal dêi 3 tơdroăng pơkâ dêi tơnêi têa tá hâi chiâng vâ tơbleăng ƀă liăn ngân ki ‘no xua tá hâi ai hlá mơ-éa hnê mơhno môi tuăn, tŭm sap ing tơnêi têa ƀă mâu khu xiâm pơkuâ cheăng.

Pôa Đinh Xuân Hà, Kăn pơkuâ Khu ngăn pơkâ ƀă ‘no liăn cheăng kong pơlê Dak Lak ăm ‘nâi:

“Hiăng ai mâu hlá mơ-éa hiăng châ ‘mâi rơnêu, ‘mot tơ’nôm, laga xuân tá hâi tơtro. Malối cho hlá mơ-éa kố pơkuâ djâ, mơđah tơbleăng troh hlá mơ-éa ki ê, pơchuât hlá mơ-éa ki ê mê tiô bối 1 hlá mơ-éa ki ê nếo. Rêm troăng ki rơkê gá phá tơ-ê tung pơla pêi pro mê rêm kong pơlê mê vâi kơ hlê tiô túa ki phá ki ê”.

Pôa Nguyễn Đình Trung, Kăn pơkuâ hnê ngăn Đảng kong pơlê Dak Lak xuân tối mâu tơdroăng ki xơpá, tá hâi tơƀrê môi tiah: tơdroăng pơcháu tơnêi ăm kuăn pơlê hdroâng kuăn ngo ối trâm hên tơdroăng tơvâ, kal ai troăng hơlâ pơkâ tơtro ƀă ki ai khât; tơdroăng ki kăn ƀô̆ pơkuâ a kong pơlê xuân kal hên troăng hơlâ tơtro ƀă tơdroăng ki ai khât dêi Tây Nguyên; tơdroăng ki kal, mâu ngế ki châ tŏng kum tung tơdroăng kố pơla hơnăm 2021 – 2025 ai hên tơdroăng ki nếo mê hnoăng cheăng séa ngăn, mơnhên tơdroăng pơkâ tíu xoăng, mơnhên inâi mâu tơdroăng tơkêa bro ‘no liăn cheăng ối hên tơdroăng ki tá hâi hlê plĕng ƀă hên ki ê.

Tơpui a rôh pêi cheăng, Thươ̆ng tươ̆ng Trần Quang Phương, Kăn phŏ hnê ngăn Kuô̆k hô̆i tơmâng ƀă mơnhên tối khât klêi kơ’nâi tơbleăng mâu tơdroăng pơkâ dêi tơnêi têa ki Dak Lak hiăng pêi pro chiâng. Tơdrêng amê, ƀă hiâm mơno séa ngăn cho tơdroăng ki pơkâ vâ rơtế dêi rơpó tŏng kum xơpá, ing mâu rôh pêi cheăng a kong pơlê, Kăn xiâm phŏ hnê ngăn Kuô̆k hô̆i pơkâ thế:

“Mâu kăn pơkuâ kong pơlê kal ai tơdroăng hnê mơhno tơmâng, ai tối tơbleăng ‘mot tơ’nôm tŭm mâu rơkong tơpui tối pâ thế dêi tôh pêi hnoăng cheăng ƀă mâu ngế ki tơrŭm cheăng, chêh mâu inâi tơdroăng ki xiâm ối tơvâ pơtối pâ thế. Má péa, pơtối tơmâng ngăn hnê mơhno trâu hơngế tâ, mơdêk tơdroăng cheăng dêi khu hnê mơhno ƀă tơrŭm krá rơdêi teăm tơdrêng pơla mâu kơ koan tíu pêi cheăng, mơhnhôk ivá tơkŭm vâ rêm hvêa chêng prôk teăng ăm tơdroăng ki hmâ pêi vâ mơnhông cheăng kâ rêh ối”.

Tung pơla hdrối kố nah, Kuô̆k hô̆i hiăng tơbleăng pêi Túa séa ngăn ‘na tơdroăng pêi pro mâu tơdroăng pơkâ dêi tơnêi têa hơnăm 2023 a 03 kơpong. Ki nhên mê cho: Séa ngăn, troh ngăn a tơdroăng ki ai khât ƀă pêi cheăng tơdrêng hlối ‘no tơdrêng ing hyôh internet ƀă 14 to kong pơlê kơpong Peăng tơdế ƀă peăng kong ngo ‘na kơnhŏng a kong pơlê Yên Bái; Séa ngăn a tơdroăng ki ai khât ƀă pêi cheăng tơdrêng hlối ‘no ing troăng hyôh internet ƀă 19 to kong pơlê peăng kơnhŏng Trung ƀộ ƀă a kĭng têa kơxĭ peăng tơdế ƀă kơpong Tây Nguyên a kong pơlê Bình Định; Séa ngăn, troh ngăn a tơdroăng ki ai khât ƀă pêi cheăng tơdrêng ƀă ‘no tơdrêng ing troăng internet ƀă 13 to kong pơlê kơpong Tơbăng kroăng Cửu Long a kong pơlê Bạc Liêu.

Ngế pro xiâm phŏ hnê ngăn tơnêi têa xuân pơcháu ăm Khu xiâm pơkâ ƀă ‘no liăn cheăng pơkuâ, tơrŭm ƀă mâu khu xiâm, kơ koan: pêi chiâk deăng ƀă Mơnhông thôn pơlê, Khu xiâm ngăn cheăng pêi mố đô̆i tro rong ƀă rêh ối pơlê pơla, Vi ƀan Hdroâng kuăn ngo ƀă mâu Khu xiâm, kơ koan, kong pơlê ki ai tơdjâk troh hbrâ rơnáu tối tơbleăng, hlá mơ-éa ki vâ kum a mâu rôh pêi cheăng ƀă mâu mâu kong pơlê, tung mê tơtrŏng mơnhên tối mâu ƀai hriâm ki rơkê, tối tơbleăng mâu túa pêi ki tro ‘ló, tơdroăng tơmiât ki rơkê tung hnoăng cheăng mơjiâng, pêi pro klêi mâu troăng hơlâ tŏng kum ƀă tơbleăng, ‘no liăn pêi pro mâu tơdroăng pơkâ dêi tơnêi têa a mâu kong pơlê; séa ngăn nhên, châ hlo mâu tơdroăng ki xơpá, tơvâ vâ pơkâ mơ’no, pâ thế mâu troăng hơlâ pêi pro nhên tung tŏng kum, mơdêk rĕng tơdroăng tơbleăng pêi pro.

Ƀơrô cheăng Chin phuh tơrŭm ƀă mâu khu xiâm, kơ koan, kong pơlê ki ai tơdjâk hbrâ mâu tơdroăng ki kal, mâu tơdroăng kal ki ê vâ tơkŭm pêi pro túa pơkâ.