Kơxê hâi lơ 8/6, pơtối tơdroăng rôh hôp má 5, mâu kăn Kuô̆k hô̆i hiăng têk kŏng tiâ vâ tơdroăng Pơkâ ‘na tơdroăng séa ngăn dêi Kuô̆k hô̆i hơnăm 2024. Tiô Pơkâ , hơnăm 2024, Kuô̆k hô̆i séa ngăn 2 tơdroăng ƀă Kuô̆k hô̆i pơcháu ăm Vi ƀan Pơkuâ Kuô̆k hô̆i tơkŭm séa ngăn 2 tơdroăng kal ki ê. Pakĭng mê, Pơkâ xuân tối nhên, ngăn a tơdroăng séa mơnhên dêi Kuô̆k hô̆i ƀă tơdroăng ki ai khât, Vi ƀan Pơkuâ Kuô̆k hô̆i, Hô̆i đong Kuăn ngo, mâu Vi ƀan dêi Kuô̆k hô̆i, Khu kăn Kuô̆k hô̆i, mâu kăn Kuô̆k hô̆i hbrâ mơjiâng, tơbleăng tơdroăng séa ngăn dêi tơná, tối tơbleăng tơdroăng pêi pro tiô pơkâ dêi Luât.

Pơtối hơ’lêh nếo, séa ngăn tro ƀă ‘ló, tối nhên tíu, pơkâ hnoăng cheăng dêi khu tơrŭm, mâu ngế ƀă pâ thế hơ’lêh, tơ’nôm vâ pêi klêi luât pơkâ, luât Tơnêi têa. Hâi lơ 9/6, Kuô̆k hô̆i tơkŭm tơpui tơno a tôh ƀă hên tơdroăng ki kal; tung mê, tơpui ‘na tơdroăng tơkêa Luât tơnêi (‘mâi hơ’lêh), tơdroăng tơkêa Luât rak ngăn, kring vế tơmeăm khiăng lêng ƀă kơpong đông lêng.