Kơxo hâi lơ 23/6, a thôn Preh, cheăm Phú Hội, tơring Đức  Trọng, Vi ƀan hnê ngăn kong pơlê Lâm Đồng hiăng pơxiâm mơjiâng hngêi ối ăm khu kŏng nhân, mơngế pêi cheăng a Kơpong hngêi kơmăi Phú Hội ƀă kuăn pơlê ki pêi lo liăn iâ ki rêh ối tung kơpong kố. Mê cho tơdroăng tơkêa bro mơjiâng hngêi ối pơlê pơla ki apoăng dêi kong pơlê Lâm Đồng châ pêi pro tung kơpong pơlê cheăm hdroâng kuăn ngo.

Tơdroăng tơkêa bro kố, tâi tâng ai kơxô̆ liăn mơ’no lối 200 rơtal liăn, châ mơjiâng pro a tơnêi ki vâ chê 18 rơpâu  met karê, ai 4 kơpong hngêi 5 râ, tâi tâng ai 303 to kơbong kum ăm pơlê pơla, ƀă 68 kơbong vâ ăm vâi ki ê mung ối, tăng liăn.

Klêi kơ’nâi mơjiâng pro klêi ah kô ăm dâng 1 rơpâu 500 ngế kŏng nhân, mơngế pêi cheăng tung Kơpong hngêi kơmăi Phú Hội ƀă kuăn pơlê ki pêi lo liăn iâ vâ vâi chía hlâu tơniăn tâ iâ tung rêh ối. Tơpui a hâi leh pơxiâm mơjiâng pro hngêi mê, pôa Trần Văn Hiệp, Kăn hnê ngăn Vi ƀan kong pơlê Lâm Đồng tối ăm ‘nâi, kong pơlê dế kơdo mơ-eăm tơkŭm rak vế, pêi pro tơdroăng cheăng xiâm tung mơjiâng 2 rơpâu 980 rơpŏng hngêi ối pơlê pơla pơla sap hơnăm 2021-2030, tung mê, ai 500 toăng hngêi ối ăm kŏng nhân.