Tung pơla hdrối kố nah, rêm râ Khu hiăng mơhnhôk vâ chê 14 rơtal liăn. Ing kơxô̆liăn ‘măn kơdĭng vâ kum hok tro kơtiê xơpá, diâp hnoăng liăn hriâm ăm mâu hok tro kơtiê; mơhá mâu hok tro rêm râ; ăm hok tro ƀă thái cô ki hnê kơhnâ rơkê a rêm rôh tơ’noăng, tơ’noăng tung kơpong ƀă tung râ tơnêi têa.

Pôa Phạm Đăng Khoa, Ngế pơkuâ Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Dak Lak, Kăn hnê ngăn Hô̆i đong rak ngăn liăn ‘măn kơdĭng ăm ‘nâi, tơdroăng tơbleăng Liăn ‘măn kơdĭng mơhnhôk hriâm kong pơlê Dak Lak cho vâ mơnhên tiô pơkâ, xúa liăn tro tơdroăng, ing hnoăng pleăng, xúa ai pơxúa mơnhông hrâm trâp, mơhnhôk mơ-eăm kơhnâ hriâm, hriâm rơkê a cheăm tơring kong pơlê. Rôh kố, Khu tơkŭm po xuâm diâp 15 hnoăng liăn hriâm ăm 15 ngế hok tro kơtiê mơ-eăm hriâm rơkê a kong pơlê Dak Lak.