Tơpui tơno ‘na mâu tơdroăng tơdjâk troh ‘mâi pơhlêh troăng hơlâ liăn khế, mâu rơkong tơpui tối, mơ-éa chêh hdrối luât tá hâi ‘nâi hdrối mâu tơdjâk dêi tơdroăng pơhlêh kố, môi tiah tơdjâk dêi tơdroăng tah lôi kơlo liăn khế xiâm ƀă mâu pơkâ ai tơdjâk troh ƀaoh hiêm pơlê pơla.

Xua mê, kal păng ‘nâng thế ‘mâi rơnêu pơkâ ‘na pơhlêh liăn khế pro xiâm kối nâp ƀaoh hiêm pơlê pơla ki pơklât. Pakĭng mê, ai rơkong tơpui pơkâ thế, xuân kal hriăn plĕng nhên troăng pro kơlo tơdâng liăn khế pro xiâm kối nâp ƀaoh hiêm pơlê pơla; Tơdroăng liăn khế mơhá mâu ngế hiăng pơtê cheăng xua hơnăm hiăng krâ, tŏng kum Ƀaoh hiêm pơlê pơla rêm khế ƀă khu lêng kŏng an khu lêng; tơdroăng châ kâ ƀaoh hiêm pơlê pơla môi xôh ƀă mơngế ôh tá pơtối nâp ƀaoh hiêm pơlê pơla ƀă ai pơkâ tơdah ƀaoh hiêm pơlê pơla môi xôh laga tá hâi châ 20 hơnăm nâp ƀaoh hiêm pơlê pơla...

Pôa Trần Thanh Mẫn, Kăn xiâm phŏ hnê ngăn Kuô̆k hô̆i mơnhên kố cho tơdroăng tơkêa bro Luât pá, tơdjâk kân troh tơdroăng rêh ối dêi kuăn pơlê, xuân môi tiah troh mâu troăng pơkâ pêi, troăng hơlâ dêi Tơnêi têa, pơkâ thế Chin phuh pơtối mơnhên tŭm, tâi tâng tơdjâk ƀă rêm tơdroăng xiâm ‘mâi pơhlêh, tơniăn pơkâ mâu tơdroăng xiâm, pơkâ dêi pơhlêh troăng hơlâ ƀaoh hiêm pơlê pơla tiô tro hiâm mơno dêi Pơkâ kơxô̆ 28 – NQ/TW dêi Tơnêi têa.