Kơ’nâi mâu chôu tơvâ tơdroăng cheăng pro hlá mơ-éa a ƀơrô ki tơ’lêi hlâu dêi cheăm Ea Tul, đảng viên Y Dũng Hwing rơtế hmâ ƀă khu  rak ngăn pro tơniăn kring vế, gak ngăn pơlê Tu, ƀă po rơdâ 8 sào plâi sầu riêng dêi rơpŏng hngêi. Kơhnâ ƀĕng ƀeăn tung hnoăng cheăng, kơhnâ veăng pêi mâu tơdroăng cheăng ki ê tung pơlê, mâu hnoăng veăng ‘no mê dêi Y Dũng hiăng châ mơhno, khĕn kơdeăn a “Hâi leh tâi tâng kuăn pơlê kring vế Tơnêi têa cheăm Ea Tul hơnăm 2023” nếo tơkŭm po măng tĭng hdrối. Đảng viên Y Dũng Hwing tối:

“Ƀă hnoăng cheăng cho đảng viên, a pêi cheăng tung pơlê vâ ai tơdroăng rêh ối mơnhông tơƀrê, á mơ-eăm pêi tâi ivá tơná tung tơdroăng cheăng, xuăng hâi chôu pêi cheăng a hngêi ƀă pêi tơdroăng cheăng tơnêi têa. A pêt sầu riêng 8 sào sap hơnăm 2017, hơnăm kố ai yă mê a riân dêi hdrối mơni châ lối 11 rơtal liăn. Ƀă hnoăng cheăng cho kăn hnê ngăn Chi ƀô̆, a djâ troăng a hdrối ăm kuăn pơlê, mơhnhôk kuăn pơlê veăng tơlo liăn vâ krâ ‘măn camera  a troăng vâ kring vế tơmeăm khoăng kuăn pơlê tung rơnó krí plâi. Ing mê, kuăn pơlê xuân veăng tơlo liăn ƀă krâ ‘măn 9 toăng kamera  a ƀuôn Tu. Nôkố tung pơlê ôh pá  ai xếo tơdroăng khu ‘mêi tong tơmeăm môi tiah hdrối nah’’.

Xuân xua tơdroăng rêh ối tơniăn dêi pơlê Ea Tul, đảng viên, cho krâ pơlê Y Dhĕ Ayun ối a ƀuôn Phương cho mơngế kơhnâ, ‘nâi kơdôu mơ-eăm, djâ troăng a hdrối tung tŭm tơdroăng cheăng. Pôa ăm ‘nâi, tơnêi tơmeăm khoăng hiăng xoăng ăm kuăn cháu, nôkố prế on veăng ối rak ngăn dêi 2 ha pêt kơphế, tiu ƀă sầu riêng, châ xo dêi rêm hơnăm dâng 400 rơtuh liăn. Tơdrêng ƀă pêi cheăng kâ rơkê, pôa xuân kơhnâ hnê tối ăm kuăn pơlê thế kơhnâ pêi cheăng kâ, mơjiâng dêi pơlê rế xông tơƀrê:

“Đảng viên cho ngế ki djâ troăng a hdrối, djâ troăng ăm rêm ngế ƀă mơhnhôk kuăn pơlê, tiah mê kuăn pơlê nếo veăng pêi. Mơngế kuăn pơlê pâ nhoăm cho rơpŏng hngêi, kuăn pơlê xuân mơ-eăm pêi cheăng ăm tơdroăng rêh ối nôkố. Sap ing á pro kăn ƀô̆ troh pơtê cheăng xua hơnăm hiăng krâ á đi đo mơ-eăm pêi cheăng ƀă mơnhông cheăng kâ dêi rơpŏng hngêi, kum ăm kuăn pơlê ƀă rơpŏng hngêi pêi ƀối tơná; mơ-eăm hnê pơchân kuăn pơlê pêi ƀối tiô troăng rơhlâ, luât pơkâ dêi tơnêi têa, kuăn pơlê, ôh tá ăm kuăn pơlê pro xôi luât, hnê pêi pro tro tiô troăng rơhlâ dêi Đảng, luât tơnêi têa, rak tơniăn tung pơlê, pêi tro luât dêi tơnêi têa’’.

Ea Tul cho môi tung 5 to cheăm ki apoăng châ mơnhên tối thôn pơlê nếo dêi kong pơlê Dak Lak sap a hơnăm 2016 nah. Nôkố lâp tung cheăm ai lối 2.870 rơpŏng ƀă 12 rơpâu 800 pơ’leăng mâ mơngế, tung mê kuăn pơlê Rơđế ai 97%. Kơxô̆ rơpŏng kơtiê dêi cheăm bú ối 3,12%, iâ tâ tơring Čư̆ Mgar. Đảng ƀô̆ cheăm Ea Tul nôkố ai 222 ngế đảng viên pêi cheăng a 18 Chi ƀộ Đảng, tung mê ai 137  đảng viên Rơđế, châ vâ chê 62%, hên má môi tung kong pơlê Dak Lak.

Pôa Y Uốt Ayun, Kăn hnê ngăn Đảng ủy cheăm Ea Tul, ăm ‘nâi, mâu hơnăm hdrối, mâu đảng viên xuân mơhno hnoăng cheăng pêi tơná djâ troăng ahdrối tung pêi cheăng, kring vế, gak ngăn tơniăn pơlê cheăm. Tung mê, ki má lối cho pôa Y Dhĕ Ayun krâ pơlê ƀă jâ ngoh Y Dũng Hwing, hiăng tơbleăng troh lâp lu tung mơhnhôk tơ’noăng pâ nhoăm tơnêi têa a kong pơlê.

“Pâ Chen hdrối nah bro kăn ƀô̆ cheăm, troh drêng vêh a pơlê xuân kơhnâ pêi cheăng, cho ngế ki kuăn pơlê pâ nhoăm tung pơlê, hlối pêi cheăng, hlối mơhnhôk kuăn pơlê thế kơhnâ cheăng, rêh ối lĕm tro, ôh tá pro tơdroăng xôi kơ luât tơnêi têa. Má péa nếo, Y Dũng Hwing cho kăn ƀô̆ cheăm, cho môi ngế ki ƀeăn rơkê hlối hlê plĕng hên, ngoh Y Dũng pêt loăng plâi sầu riêng, 1 hơnăm châ xo dêi 200-300 rơtuh liăn. Kuăn pơlê xuân hriâm pêi ƀôi túa pêi cheăng dêi Y Dũng, ƀă cheăm xuân pôk ngoh pro kăn hnê ngăn chi ƀô̆, ngoh đi đo cho ngế ki djâ troăng ahdrối, ing mê, tâi tâng mâu pơlê pêi pro ƀối”.

Ƀă mâu hnoăng pêi tơƀrê tung pêi cheăng, mơhnhôk pêi cheăng kâ rơkê xuân môi tiah tơdroăng cheăng pơlê pơla, mâu đảng viên Y Dũng Hwing, Y Dhĕ Ayun hên hdrôh châ rêm râ mâu kơvâ cheăng khĕn kơdeăn. Malối, a Hâi hôp tâi tâng kuăn pơlê kring vế tơniăn tơnêi têa hơnăm 2023 a cheăm Ea Tul veăng ai pôa Trần Lưu Quang, Ngế pro xiâm phŏ hnê ngăn tơnêi têa, tá Y Dũng Hwing, Y Dhĕ Ayun xuân hâk tơngăm châ khê̆n kơdeăn.

Mâu tơdroăng mơhnhôk mê thăm rế tơ’nôm ivá mơ-eăm dêi mâu đảng viên kuăn ngo môi tiah Y Dũng Hwing, Y Dhĕ pơtối mơ-eăm, mơjiâng tơdroăng rêh ối dêi rơpŏng hngêi kro mơdrŏng, pơlê pơla thăm kro mơdrŏng lĕm.