Tơdroăng ‘’Hơngui tơkăng kong – Hơtô hiâm mơno kuăn pơlê tung pơlê’’ châ khu mô đô̆i gâk tơkăng kong kong pơlê Gia Lai pêi pro tơrêm a mâu cheăm tơkăng kong tơring Ia Grai, Đức Cơ, Chư Prông, dêi kong pơlê Gia Lai. A rêm tơdroăng pêi pro, mâu mô đô̆i gâk tơkăng kong rơtế kuăn pơlê a mâu pơlê kơxuô kơƀăn tơxông, tôu chêng koăng, rơtế mơđah tơbleăng hơdruê xuăng vâ tơdjêp tuăn pâ khu lêng – kuăn pơlê.

Rơtế amê, mâu ngế ki tŏng kum mơngế pá puât tơkŭm po mâu tíu tê tơmeăm 0 liăn, diâp ăm kuăn pơlê hrĭng kơxuô tơmeăm cho pơkhom, kơmung, phái ƀă kơxop mơ-éa hriâm, mơ-éa chêh, kế tơmeăm xúa tung hriâm tâp ăm hok tro. Mơhé ôh tá kân ‘na kế tơmeăm khoăng, laga kố pơrá cho mâu kế tơmeăm ki kal xúa rêm hâi, vâ kuăn pơlê châ tơdah Têt hơtô tâ.