Đi đo châ mô đô̆i gâk tơkăng kong tŏng kum cho rŏng ngoh Rơmah Tíu ƀă nâ Rơlan Blớc, mơngế hdroâng kuăn ngo Jarai a pơlê Tung, cheăm Ia Nan, tơring Đức Cơ. Péa hơnăm hdrối nah, rơpŏng ngoh Tíu cho môi tung mâu rơpŏng kơtê, ôh tá bê liăn vâ mơnhông cheăng kâ rơpŏng. Pêi lo liăn ki hên kơnôm a tơdroăng cheăng pêi cheăng vâi tiô rơnó. Kơnôm tơdroăng tŏng kum dêi Mô đô̆i gâk tơkăng kong Đông Ia Nan ƀă khu râ kăn pơkuâ cheăm, rơpŏng ngoh hiăng châ tŏng kum hdrê pêt 3 sao kơphế, châ hnê mơhno rak ngăn, hbrâ mơdât pơreăng ăm loăng plâi. Troh nôkố, 3 sao kơphế hiăng châ krí, rơtế 2 sao báu klâng ƀă 8 sao kơxu, hiăng djâ pêi lo liăn tơniăn ăm rơpŏng châ dâng 100 rơtuh liăn rêm hơnăm.

“Mâu tăm mô đô̆i xuân môi tiah khu râ ƀă cheăm xuân tŏng kum môi tiah mơngế tung hngêi, hnê mơhno pôe tơkâng, rơvât phon, nôkố rơpŏng ai cheăng kâ tơniăn tâ, rak ngăn kuăn ‘nĕng hriâm tâp, phâi hơtô’’.

Tiô riân dêi cheăm Ia Nan, tơring Đức Cơ, cheăm kố ai 1.951 rơpŏng, ƀă vâ chê 9.000 pơ’leăng mâ mơngế. Cheăm hiăng ai 7/9 thôn pơlê châ tiô pơkâ thôn pơlê nếo. Kơxô̆ rơpŏng kơtiê kơdroh chôa ‘lâng ing mâu hơnăm ƀă troh mơ’nui hơnăm 2023, cheăm bu u ối 100 rơpŏng kơtiê, châ 4,9% kơxô̆ rơpŏng. Kăn phŏ hnê ngăn Vi ƀan cheăm Ia Nan - Phạm Văn Thủy tối ăm ‘nâi, tung mâu hơnăm hiăng hluâ khu râ kăn pơkuâ ƀă khu Mô đô̆i gâk tơkăng kong pro đông tung cheăm hiăng đi đo rơtế dêi pó mơjiâng mâu pơkâ pêi, troăng prôk inhên kum kuăn pơlê mơnhông cheăng kâ, mơjiâng thôn pơlê nếo.

“Sap ing hâi ai kăn ƀô̆ pơkuâ a mâu rơpŏng kuăn pơlê mê mâu rơpŏng kuăn pơlê xuân hlo, tơ’lêi hlâu cho troăng pêi klâng báu kân xuân môi tiah loăng plâi ton hâi, kăn ƀô̆ mô đô̆i gâk tơkăng kong tơmâng ‘nâng ƀă râng kŏng hnê cheăng pêi, ki rơhêng vâ tối cho mâu rơpŏng châ mô đô̆i gâk tơkăng kong cheăm tŏng kum mê mâu rơpŏng hiăng hluăn ing kơtiê, mơ-eăm tơniăn tơdroăng rêh ối’’.

Trung tă Lê Hồng Tuấn, Đông mô đô̆i gâk tơkăng kong Ia Nan, tơring Đức Cơ tối ăm ‘nâi, ƀă pói vâ rơtế khu râ kăn pơkuâ cheăm tŏng kum kuăn pơlê mơnhông cheăng kâ, mơdêk pêi lo liăn, kơdroh kơtiê krá tơniăn ƀă kố xuân cho môi hnoăng cheăng ki xiâm, đi đo dêi Mô đô̆i gâk tơkăng kong vâ tơniăn tung gâk kring tơkăng kong, gâk kring kal kí, gâk kring tơniăn pơlê pơla a tơkăng kong, kơpong đông pơkuâ.

“Pêi pro tơdroăng pơkâ xiâm tơnêi têa dêi Đảng ƀă Tơnêi têa tung mơjiâng thôn pơlê nếo tung mâu hơnăm hiăng hluâ, đông pơtroh 9 ngế đảng viên veăng hôp a 9 chi ƀô̆ thôn pơlê dêi cheăm Ia Nan, 15 ngế pơkuâ 158 rơpŏng. Rơtế ƀă tơdroăng mơnhông mơdêk cheăng kâ – rêh ối pơlê pơla dêi cheăm tung mâu hơnăm hiăng hluâ Đảng ủy, Khu pơkuâ Đông ai tơdroăng tơrŭm ƀă Đảng ủy, Vi ƀan kuăn pơlê cheăm kum kuăn pơlê mơnhông cheăng kâ, xăm kơklêa kơdroh kơtiê, mơjiâng thôn pơlê nếo vâ cheăm chôa ‘lâng krá rơdêi cheăng kâ – rêh ối pơlê pơla, tơxâng cheăng lêng gâk kring hneăng nếo’’.

Rơtế ƀă tŏng kum kuăn pơlê mơnhông cheăng kâ, Mô đô̆i gâk tơkăng kong Gia Lai ối ai hên troăng pêi, tơdroăng rêh ối pơlê pơla. Tung hơnăm 2023, hiăng mơjiâng 13 toăng hngêi ăm mơngế kơtiê a tơkăng kong, rak tŏng kum 63 ngế cháu hok tro tung Tơdroăng ‘’Kum o troh hngêi trung’’ ƀă ‘’Kuăn roăng đông mô đô̆i gâk tơkăng kong’’...

Tiô Đăi tă Nguyễn Văn Nghị, Kăn phŏ pơkuâ cheăng Đảng Khu xiâm pơkuâ Mô đô̆i gâk tơkăng kong Gia Lai, đông kô pơtối pêi pro môi tuăn troăng pơkâ pêi, troăng hơlâ dêi Đảng, Tơnêi têa ‘na mơjiâng gâk kring tơkăng kong tơnêi têa, mơjiâng thôn pơlê nếo ƀă kơdroh kơtiê krá tơniăn tung kơpong tơkăng kong.

“Nôkố tung kơpong tơkăng kong ai 3 tơring ƀă 7 cheăm, tơdroăng rêh ối dêi kuăn pơlê tíu kố trâm hên pá puât. Vâ pêi tơtro hnoăng cheăng mơnhông cheăng kâ, khôi túa lĕm tro – rêh ối pơlê pơla, ngin pơtối tối ăm kăn ƀô̆, mô đô̆i mâu đông gâk tơkăng kong pêi pro lĕm tro hnoăng cheăng dêi tơdroăng gâk tơkăng kong tung pêi pro mâu tơdroăng pêi cheăng, mâu tơdroăng xiâm tơdjâk mâu cheăm mê cho mơnhông cheăng kâ, khôi túa lĕm tro – rêh ối pơlê pơla, kum kuăn pơlê xăm kơklêa kơdroh kơtiê. Ngin xuân kô pơtroh 196 ngế đảng viên kum mâu rơpŏng lối 800 rơpŏng tung kơpong tơkăng kong’’.

Ƀă hiâm mơno ‘’Đông cho hngêi, tơkăng kong cho pơlê xiâm, kuăn pơlê mâu hdroâng kuăn ngo cho nhŏng o xiâm”, Mô đô̆i gâk tơkăng kong Gia Lai hiăng veăng tơrŭm ƀă mâu khu râ kăn pơkuâ hnê ngăn cheăng Đảng, khu râ kăn pơkuâ cheăm tung tơdroăng tŏng kum kuăn pơlê kơpong tơkăng kong mơnhông cheăng kâ – rêh ối pơlê pơla. Kơnôm ing mê, hên rơpŏng kuăn pơlê hiăng hluăn ing kơtiê, pơ’lêh tơdroăng rêh ối a tơnêi tơkăng kong ối hên pá puât kố.