Pơla kố nah, a cheăm Ia Chía, tơring Ia Grai, Khu xiâm pơkuâ Mô đô̆i gâk tơkăng kong kong pơlê Gia Lai hiăng tơkŭm po diâp kơxuô tơmeăm, kơxô̆ liăn, kơxop hlá mơ-éa chêh, tơmeăm xúa tung hriâm tâp tung tơdroăng tơkêa bro ‘’Kăn ƀô̆, mô đô̆i kum o troh hngêi trung’’. Pêi pro tơdroăng tơkêa bro kố, Khu xiâm pơkuâ mô đô̆i gâk tơkăng kong dêi kong pơlê Gia Lai hiăng tơdah tŏng kum 193 ngế o hok tro sap ing lâm 1 troh lâm 12 tung mâu cheăm tơkăng kong a Gia Lai.

      Roh kố, mâu Đông mô đô̆i gâk tơkăng kong a troăng tơkăng kong rơtế xing xoăng ăm liăn ƀă kơxuô tơmeăm khoăng ăm mâu vâi o hok tro tung tơdroăng, mê cho 2 rơtuh liăn rôe kơxop hlá mơ-éa chêh, tơmeăm xúa tung hriâm tâp, hmân ếo mot hơnăm hriâm nếo ƀă 6 khế liăn kâ. Tâi tâng kơxô̆ liăn pêi pro tơdroăng tơkêa bro kố cho lối 1 rơtal liăn, kum mâu vâi o hok tro tung tíu tơkăng kong mơ-eăm tung hriâm tâp mơhé pá puât.

Nâ Nguyễn Thị Dung, ối a thôn Beng, cheăm Ia Chía, cho nôu hok tro ai mâ a roh diâp kơxuô tơmeăm tơkŭm po hâi kố, tối:

“Mơnê mô đô̆i gâk tơkăng kong ƀă mâu râ khu râ kăn pơkuâ ai mâu kơxuô tơmeăm kal khât a tíu tơkăng kong Ia Chía, mâu kơxuô tơmeăm cho kơnâ khât, kum ngin kơdroh pá puât ‘na cheăng kâ tung tơdroăng ăm mâu muăn troh hngêi trung’’. Drêng ai tơdroăng pá puât dêi hên vâi hdrêng hok tro a 13 cheăm tơkăng kong, Mô đô̆i gâk tơkăng kong dêi kong pơlê Kon Tum hiăng tŏng kum lối 1,9 rơtal liăn kum mâu vâi o kơdroh pá puât thăm loi tơngah mot hơnăm hriâm nếo 2023 – 2024’’.

            Apoăng hơnăm hriâm nếo, Khu xiâm pơkuâ Mô đô̆i gâk tơkăng kong kong pơlê Kon Tum tối ăm ‘nâi tâi tâng kơxô̆ liăn vâ chê 2 rơtal liăn tŏng kum mâu vâi o hok tro ai tơdroăng rêh ối pá puât a kơpong tơkăng kong hiăng châ mâu Khu râ kăn pêi cheăng dêi Khu xiâm pơkuâ mô đô̆i ƀă tíu cheăng diâp a kŏng mâu vâi o. Kơxô̆ liăn kố tŏng kum 253 ngế o ối tung tơdroăng tơkêa bro “Kăn ƀô̆, mô đô̆i kum o troh hngêi trung’’.

Mâu vâi o pơrá ai tơdroăng rêh ối pá puât a 13 cheăm tơkăng kong ối tung 4 tơring dêi kong pơlê Kon Tum, mê cho: Đăk Glei, Ngọc Hồi, Sa Thầy ƀă Ia H’Drai. Rơtế ƀă 74 ngế o hok tro, tung mê ai 6 ngế o a kơpong tơkăng peăng kong têa Lếo ƀă Kul ối tung Tơdroăng ‘’Kum o troh hngêi trung’’ châ Khu xiâm pơkuâ Mô đô̆i gâk tơkăng kong dêi kong pơlê Kon Tum tŏng kum 110 rơtuh liăn.

            Klăng roh mâu vâi o hok tro mot hơnăm hriâm nếo 2023 – 2024, mâu Đông mô đô̆i gâk tơkăng kong drô troăng tơkăng kong tơkăng Lếo ƀă Kul kơpong tơkâ hluâ kong pơlê Kon Tum xuân diâp kơxuô tơmeăm, xúa tơmeăm hriâm tâp ăm 15 ngế muăn cho ‘’Kuăn Đông mô đô̆i gâk tơkăng kong’’ mơhnhôk mâu muăn thăm loi tơngah mot hơnăm hriâm nếo 2023 – 2024.

            Ƀă troăng pro ‘’ăm chư, pơtroh tơdroăng pói vâ’’, hơnăm hriâm kố, Khu xiâm pơkuâ Mô đô̆i gâk tơkăng kong kong pơlê Dak Nông pơtối tơdroăng ‘’Kum o troh hngêi trung’’. Đăi tă Bùi Đức Chính, Kăn phŏ chính ủy Mô đô̆i gâk tơkăng kong kong pơlê Dak Nông tối ăm ‘nâi, troh nôkố, hiăng ai 222 ngế muăn hok tro a 7 cheăm tơkăng kong dêi kong pơlê Dak Nông ƀă 12 ngế muăn hok tro dêi kong pơlê Mondulkiri, kong têa Kul châ mô đô̆i gâk tơkăng kong Dak Nông tŏng kum troh hngêi trung.

Tâi tâng kơxô̆ liăn tŏng kum mâu muăn ai tơdroăng rêh ối pá puât cho vâ chê 4,5 rơtal liăn, ing kơxô̆ liăn veăng tơlo dêi tâi tâng mô đô̆i gâk tơkăng kong Dak Nông. Ƀă tơdroăng tŏng kum dêi kăn ƀô̆ mô đô̆i gâk tơkăng kong, mâu muăn hok tro hiăng mơ-eăm đi đo vâ tơkâ hluâ pá puât, ôh tá tŭm kế tơmeăm khoăng tá hiâm mơno vâ chiâng kuăn nguăn, hok tro rơkê.

Hên vâi muăn ing hok tro hriâm tơdâng ƀă hôm hiăng mơ-eăm chiâng hok tro rơkê ƀă rơkê má môi.

            ‘’Tơdroăng ‘’Kum o troh hngêi trung – Kuăn roăng đông mô đô̆i gâk tơkăng kong’’ ƀă Tơdroăng tơkêa bro ‘’Kăn ƀô̆, mô đô̆i kum o troh hngêi trung’’ mơnhên ki lĕm rơkê trâu hơngế, tơdroăng rŭm môi tuăn mơ-eăm chhá pơla kăn ƀô̆, mô đô̆i gâk tơkăng kong ƀă kuăn pơlê mâu hdroâng kuăn ngo a kơpong tơkăng kong. Tơdrêng amê, ing tơdroăng kố hiăng hnê ăm rêm ngế kăn ƀô̆, mô đô̆i gâk tơkăng kong đi đo mơdêk tơdroăng rŭm môi tuăn khu lêng kuăn pơlê, mơjiâng tuăn pâ khu lêng kuăn pơlê rŭm môi tuăn môi mơheăm chhá ƀă kuăn pơlê mâu hdroâng kuăn ngo a kơpong tơkăng kong, kum pro bâ eăng tơ’nôm ki lĕm ƀă khôi túa vâi krâ nah “Mô đô̆i Pôa Hồ’’, “Ngế mô đô̆i kơlŏng ngiât’’ tung rơxông nếo’’.

            Mâu tơdroăng “Kum o troh hngêi trung”, “Kuăn roăng đông mô đô̆i gâk tơkăng kong hiăng kum ăm hên vâi o hok tro a kơpong tơkăng kong mâu kong pơlê tơkăng kong Tây Nguyên ai liăn vâ troh hngêi trung hriâm tâp ƀă mơ-eăm. Um méa mâu mô đô̆i krâ kơlŏng ngiât thăm kơnâ ƀă kơpong tơkăng kong ối hên pá puât. Mâu tơdroăng pêi ki kơnâ mê thăm tơrŭm tuăn pâ “Mô đô̆i Pôa Hồ’’ ƀă kuăn pơlê a tơkăng kong.