Pôa Trần Văn Hòa, pơkuâ tuk BTh 95032TS ối a cheăm Phước Thể, tơring Tuy Phong, kong pơlê Bình Thuận nah ai tro xôi tơnăng ká xi xŏng ôh tá ai mơ-éa phêp; ôh tá chêh, ôh tá nâp tơdroăng tơnăng ká xi xŏng; ôh tá tối tơbleăng drêng mot lo kơno ká. Nôkố, mâu tơdroăng pro xôi mê ôh tá ai xếo. Mê cho kơnôm Mô đô̆i gâk tơkăng kong hiăng pơtâng tối, tơbleăng tối luât, xing xoăng troăng tơnăng ká xi xŏng a têa kơxĭ i nhên ăm pôa Hòa ƀă kuăn pơlê tơnăng ká xi xŏng cheăm.

Tơdrêng amê, Mô đô̆i gâk tơkăng kong ối hnê mơhno vâi krâ kuăn pơlê pêi pro tơdroăng tơnăng ká môi tiah lâi ăm tơtro, ôh tá pro tơdjâk kơpong têa kơxĭ dêi kong têa ê ƀă tŏng kum tơleăng mâu tơdroăng a têa kơxĭ:

“Kơnôm tơdroăng pơtâng tối dêi Mô đô̆i gâk tơkăng kong ing mê pin hlê plĕng, klêi mê á pơtâng tối ăm mâu ngế pêi cheăng tung plong tuk, mâu pú hmâ ki ai plong pôi tá pro xôi. Tâng kuăn pơlê tơnăng ká xi xŏng kal mê mô đô̆i gâk tơkăng kong kô kum ƀă hnê mơhno hlối.

Pơtih, drêng ai tơdroăng tơhôu a têa kơxĭ, lơ mâu plong tuk, tơnăng ká xi xŏng ôh tá tro luât mê á tơbleăng ăm mô đô̆i gâk tơkăngkong, klêi mê vâi pơtroh plong tuk troh vâ tơleăng, ví tơdroăng tơhôu a têa kơxĭ’’.

Troh nôkố, ki hên kuăn pơlê tơnăng ká xi xŏng Bình Thuận hiăng hlê plĕng ki kal dêi tơdroăng chêh, nâp tơdroăng tơnăng ká xi xŏng, pêi tiô tơdroăng krâ kơmăi séa ngăn drêng lăm tơnăng ká xi xŏng (VMS). 100% khu pơkuâ plong tuk tơnăng ká tung dế têa kơxĭ kĭ tơkêa ôh tá pro xôi kơpong têa kơxĭ kong têa ê.

Pôa Huỳnh Hương, ngế ki vê plong BTh84025TS pêi tơdroăng cheăng kăng nâ a pơlê kân Liên Hương, tơring Tuy Phong, kong pơlê Bình Thuận tối ăm ‘nâi tơ’nôm:

“Đông mô đô̆i gâk tơkăng kong tíu tê mơdró ngi kong têa ê Liên Hương đi đo trâm mâ vâi krâ kuăn pơlê tơnăng ká xi xŏng vâ tối mâu tơdroăng a têa kơxĭ. Kong prâi lơ drêng tơnăng ká hôm ai trâm tơdroăng klâi pơtih trâm mâu plong tuk dêi kong têa ê mê pin xuân tối tơbleăng ăm đông mô đô̆i gâk tơkăng kong ‘nâi tơdroăng. Tối tơdjuôm nhŏng o mô đô̆i gâk tơkăng kong tơmâng hên troh vâi krâ kuăn pơlê tơnăng ká xi xŏng’’.

Ôh tá xê to pơtâng tối, tơbleăng hnê luât, mơhnhôk vâi krâ kuăn pơlê mơ-eăm lo lăm tơnăng ká xi xŏng rak krá tơniăn têa kơxĭ, gâk kring hnoăng pơkuâ têa kơxĭ rơlố, khu Mô đô̆i gâk tơkăng kong pro đông a kơpong têa kơxĭ Bình Thuận ối tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ rak ngăn tơdroăng rêh ối kuăn pơlê têa kơxĭ, rơlố.

Rêm hơnăm, Mô đô̆i gak tơkăng kong pêi pro mâu tơdroăng môi tiah: Kơxô̆ liăn kum mơngế kơtiê, Vó ‘măn phái tuăn pâ, Kum o troh a hngêi trung... tŏng kum teăm tơdrêng ăm kuăn pơlê pá puât.

Krê hơnăm 2022, tơdroăng kum o troh hngêi trung hiăng tŏng kum ăm 42 ngế o hok tro ƀă kơxô̆ liăn 189 rơtuh liăn; tơdroăng Kuăn păn Mô đô̆i gâk tơkăng kong hiăng tŏng kum ăm 42 ngế o hok tro ƀă kơxô̆ liăn lối 100 rơtuh liăn. Mô đô̆i gâk tơkăng kong ối mơjiâng a mâu cheăm, tơring kĭng têa kơxĭ dêi kong pơlê Bình Thuận 3 toăng hngêi tuăn pâ, diâp 9 tâ̆n phái ăm mâu rơpŏng pá puât.

Pôa Huỳnh Đình Dũng, Kăn phŏ hnê ngăn Vi ƀan cheăm Phước Thể, tơring Tuy Phong, kong pơlê Bình Thuận tối ăm ‘nâi:

‘’Tung mâu cheăm ai đông Mô đô̆i gâk tơkăng kong pro đông mê tơdroăng tơrŭm pơla khu râ kăn pơkuâ cheăm, mâu khu cheăng, kơvâ cheăng rêm râ a cheăm rơtế ƀă kuăn pơlê, ki rơhêng vâ tối cho kuăn pơlê tơnăng ká xi xŏng cho krá tơniăn. Tuăn pâ pơla kuăn pơlê tơnăng ká xi xŏng ƀă Mô đô̆i gâk tơkăng kong cho pêng păm’’.

Đăi tă Đinh Văn Sáu, Kăn pơkuâ hnê ngăn Đảng ŭy, Chính ŭy Khu xiâm pơkuâ Mô đô̆i gâk tơkăng kong kong pơlê Bình Thuận tối ăm ‘nâi, pơtâng tối troăng hơlâ, troăng prôk, luât ƀă tŏng kum tơdroăng rêh ối ăm kuăn pơlê tối tơdjuôm, tung mê ai kuăn pơlê tơnăng ká xi xŏng cho hnoăng cheăng dêi Mô đô̆i gâk tơkăng kong. Hnoăng cheăng kố đi đo châ hlê plĕng pêi pro troh rêm kăn ƀô̆, mâu mô đô̆i vâ hơnăm kơ’nâi pêi pro lĕm tro tâ, châ tơƀrê tâ hơnăm hdrối:

‘’Pro ti lâi mơhnhôk châ ivá tâi tâng dêi khu cheăng kal kí ƀă mâu râ kuăn pơlê vâ mơjiâng tơdroăng gâk kring tâi tâng kuăn pơlê ó rơdêi, ing mê pêi kêi đeăng lĕm hnoăng cheăng gâk kring hnoăng pơkuâ, gâk kring tơkăng kong tơnêi têa. Pakĭng mê, ngin tơkŭm pơkuâ pêi tơtro tơdroăng mơjiâng Đảng, mơnhông mơdêk hnoăng, pôu râng hnoăng dêi kăn ƀô̆ đảng viên. Xua kố cho khu ki xiâm vâ khu râ kăn pơkuâ kêi đeăng lĕm hnoăng cheăng tung la ngiâ’’.

Bình Thuận ai kĭng têa kơxĭ xŏn 192 km, ai lối 5.700 tuk ká xŏn sap ing 6 met tơngi klêng, tung mê ai 1.946 toăng tuk ká xŏn sap ing 15 met tơngi klêng tơnăng ká xi xŏng tung dế têa kơxĭ. Kơvâ tơnăng ká xi xŏng hiăng tăng cheăng pêi ăm lối 46.000 ngế pêi cheăng, tung mê ai dâng 15.000 ngế pêi cheăng tơdrêng a mâu tuk tơnăng ká xi xŏng hơngế ing kĭng. Tơdroăng tơnăng ká xi xŏng a têa kơxĭ mơhé trâm hên pá puât, rơ-iô, laga ƀă tơdroăng tơmâng, tŏng kum dêi Chin phuh, khu râ kăn pơkuâ ƀă khu mô đô̆i gâk tơkăng kong, kuăn pơlê tơnăng ká xi xŏng Bình Thuận ai tơ’nôm ivá mơ-eăm rak krá tơniăn tê kơxĭ, mơnhên hnoăng pơkuâ têa kơxĭ rơlố krih tơviah dêi tơnêi têa.