Cho mơngế Ka Yong kot mâ xông kân a pơlê Đắk Wang, cheăm Sa Loong, tơring Ngọc Hồi, kong pơlê Kon Tum, hơnăm 19 hơnăm Y Trang châ Kŏng ty 732 tơdah xo pro kŏng nhân. Klêi kơ’nâi châ hnê kih thuât kúa chhá kơxu, Y Trang châ tơdah kúa 3 ha. Lối 10 hơnăm kúa kơxu kŏng ti, nôkố tơdroăng rêh ối dêi rơpŏng Y Trang hiăng tơniăn. Péa hneăng pơtối Y Trang hâk tơngăm châ môi tung 4 ngế kŏng nhân dêi kŏng ti veăng hneăng tơ’noăng ngế kúa chhá kơxu rơkê tâi tâng ƀinh đoân.

Y Trang tối ăm ‘nâi, pakĭng 3 ha kơxu tơdah xo kúa, on veăng jâ ối ai 1 ha kơphế. Cho kơnôm pro kŏng nhân xua mê on veăng châ hriâm rak ngăn kơphế, xua mê kơphế plâi kơtốu pêi lo châ hên.

“Drêng châ rah xo mot pro kŏng nhân dêi Kŏng ti 732, kŏng ti po lâm hnê kúa chhá kơxu. Klêi kơ’nâi chiâng kúa chhá kơxu, á châ tơdah rak ngăn kơdrum loăng. Chiâng kŏng nhân dêi Kŏng ti, á pêi lo liăn tơniăn, tơniăn ăm tơdroăng rêh ối. Ƀă mâu rơpŏng pá puât, Kŏng ti tŏng kum kế kâ vâ vâi ai tŭm kế kâ tung mâu hâi tá hâi troh rơnó pôe xo tơmeăm. Tâng pơchông ƀă mâu ngế a pơlê mê ôh tá mot pro kŏng nhân mê tơdroăng rêh ối ngin ai tŭm tơmeăm xúa tung rơpŏng’’.

Rơpŏng pôa Nguyễn Công Hoàn pơlê xiâm a Thái Bình mot a cheăm Đắk Kan, tơring Ngọc Hồi, kong pơlê Kon Tum mơjiâng cheăng pêi ƀă tơpéa kŏng ôh tá ai ki klâi. Châ tơdroăng tŏng kum dêi Kŏng ti 732, rơpŏng pôa chôa ‘lâng mơ-eăm, mơjiâng hngêi trăng kân rơdâ. On veăng pôa cho kŏng nhân dêi Kŏng ti 732, nôkố dế tơdah 5,5 ha kơxu vâ rak ngăn.

Rơpŏng u ối 1 ha kơxu ƀă 1 ha kơphế. Nôkố, pôa Nguyễn Công Hoàn cho kăn hnê ngăn Hô̆i đong pơkuâ Khu tơrŭm cheăng mơdró tơmeăm pêi chiâk deăng Đăk Kan, ƀă 400 ngế, tung mê pêi 80 ha báu klâng. Klâng báu kố cho Kŏng ti 732 muih - pơchoh - pông klêi mê xing xoăng ăm mâu rơpŏng tơdah pêi.

“A Ngọc Hồi ngin ai hên hdroâng mơngế kuăn ngo a peăng Kơnhŏng tơnêi têa, peăng hdroh tơnêi têa troh a kố rêh ối. A cheăm Đăk Kan ai hên kơdrâm vâi krâ hdroâng kuăn ngo a cheăm, mê đi đo châ kŏng ti tŏng kum. Ing tơdroăng mơjiâng troăng prôk, mơjiâng hngêi trăng troăng klông dêi thôn, kơtâu, tŏng kum vâi krâ kuăn pơlê tung tơdroăng hluăn ing kơtiê, tăng cheăng pêi ăm droh rơtăm, kuăn ‘nĕng dêi vâi krâ hdroâng kuăn ngo.

Xua mê tơdroăng cheăng kâ a cheăm Đăk Kan ngin mơnhông mơdêk tơdâng tơ’mô. Châ tiah mê cho kơnôm tơdroăng tŏng kum dêi kŏng ti 732’’.

Kŏng ti pêi cheăng tiô rơnó môi khu 732 pơkuâ 2.330 ha kơxu, lối 80 ha báu klâng, 1 toăng Hngêi kơmăi pro chhá kơxu khăng ƀă ivá 5.000 tâ̆n chhá khăng/hơnăm. Pêi chhá kơxu khăng rêm hơnăm đi đo châ ƀă hluâ pơkâ pêi Ƀinh đoân pơcháu. Kŏng ti hiăng tăng cheăng pêi, pêi lo liăn tơniăn ăm vâ chê 1.500 ngế pêi cheăng, tung mê tơdế cho kŏng nhân mơngế hdroâng kuăn ngo.

Kŏng ti xuân thăm pơtâng tối, mơhnhôk kŏng nhân ƀă kuăn pơlê tung cheăm pêi krâu mâu troăng pơkâ, troăng hơlâ dêi Đảng, luât dêi Tơnêi têa. Kŏng ti ối mơ’no liăn mơjiâng hngêi mơhno khôi túa lĕm, hngêi trung hriâm, hngêi rak vâi hdrêng, kơpong xah hêi; khăm, pơlât, xing xoăng pơkeăng tê kơtê ăm vâi krâ kuăn pơlê. Đăi tă Hà Văn Nam, Kăn pơkuâ hnê ngăn cheăng Đảng ŭy, Kăn phŏ pơkuâ Kŏng ti 732, tối:

“Kŏng ti 732 pêi pro hnoăng cheăng ton xŏn tung kong pơlê peăng Kơnhŏng Tây Nguyên. Pro tíu cheăng tung 4 cheăm ối tung 2 tơring Ngọc Hồi ƀă Sa Thầy dêi kong pơlê Kon Tum; pêi pro hnoăng cheăng mơnhông mơdêk cheăng kâ – rêh ối pơlê pơla tơniăn cheăng lêng gâk kring tung tơring.

Kŏng ti đi đo tơmâng tŏng kum tăng cheăng pêi ăm mơngế vâi krâ hdroâng kuăn ngo, ki rơhêng vâ tối cho mơngế hdroâng kuăn ngo tung cheăm nôkố Kŏng ti hiăng rah xo tơdế. Pêi lo liăn mơngế pêi cheăng châ 9 rơtuh liăn rêm khế. Kŏng ti hiăng pêi lĕm tro troăng hơlâ, tơdroăng kum rêh ối pơlê pơla ôh tá krê a kŏng nhân mê tá kuăn pơlê tung cheăm, ki rơhêng vâ tối cho mâu rơpŏng ai tơdroăng rêh ối pá puât mê kŏng ti hiăng tŏng kum teăm tơdrêng, pro tơ’lêi hlâu ăm kuăn pơlê ai tơdroăng rêh ối tơniăn. Kŏng ti tơmâng mơjiâng lĕm tro tơrŭm cheăng rŭm môi tuăn ƀă khu râ kăn pơkuâ hnê ngăn cheăng Đảng, khu râ kăn pơkuâ ƀă kuăn pơlê tung cheăm.

Ki rơhêng vâ tối tơrŭm mâu khu lêng tung tơring đi đo séa ngăn kơpong tơkăng kong, ôh tá ai ngế ki lâi prôk tơkâ hluâ tơkăng kong ôh tá tro luât’’.

Ƀă mâu tơdroăng ki châ tơƀrê, Kŏng ti 732 hiăng châ Kăn xiâm hnê ngăn tơnêi têa diâp inâi Ngoh khên tơnôu pêi cheăng tung hneăng pơhlêh nếo. Hên tíu cheăng, ngế krê dêi kŏng ti xuân châ tơdah mâu kơxuô tơmeăm ki kơnía dêi Khu xiâm, kơvâ cheăng ƀă Ƀinh đoân 15. Laga kăn ƀô̆, kŏng nhân dêi Kŏng ti 732, mâu ngế hiăng pêi cheăng ƀă kơpong tơnêi ‘’í rŏng mê pái kong têa rơtế tâng’’ kố, pri kơnâ má môi cho hiâm mơno loi tơngah, cho tíu hgiân krá tơniăn ăm kuăn pơlê mâu hdroâng mơngế tíu tơkăng kong Tơnêi têa.