Tối ‘na tơdroăng tung pơla mơ-eăm vâ châ mot tung Đảng, đảng viên hơnăm ối nếo H’Lăic Niê, chi ƀô̆ thôn Tân Thịnh, cheăm Tân Lập, tơring Krông Ƀuk ăm ‘nâi, châ râ ủy chi ƀô̆ thôn loi khât, đoân viên droh rơtău pơcháu hnoăng cheăng pro ngế phŏ thôn Tân Thịnh, mâu hơnăm hdrối mê hía nah, nâ đi đo mơ-eăm pê klêi hnoăng cheăng ki hiăng pơcháu. Malối cho mâu tơdroăng cheăng Đoân ƀă tơdroăng mơhnhôk droh rơtăm, vâi hdrêng a thôn.

Mơ’nui hơnăm 2022, nâ H’Lăic Niê hâk mơnê châ mot Đảng. Kố cho tơdroăng ki xiâm vâ nâ pơtối mơdêk hnoăng cheăng pêi tơná pleăng hnoăng cheăng hơnăm ối nếo dêi tơná veăng mơjiâng Đảng rơdêi, pơlê pơla  kro mơdrŏng lĕm     

“Klêi kơ’nâi kơdôu mơ-eăm, a hiăng châ mot tung Đảng, tung hiâm mơno á tâ hơniâp ro ƀă tơhrâ kô mơ-eăm hriâm, mơ-eăm pơtâi ivá tơná, hriâm vâ chiâng môi ngế đảng viên ki djâ troăng lĕm a hdrối, tơdrêng ƀă chi ƀô̆ hnê, mơhnhôk mơnhông dêi pơlê pơla rế ton rế xông tơƀrê”.

Nâ H’Lăic Niê cho 1 tung 5 ngế đảng viên hơnăm ối nếo a mâu thôn, pơlê châ Đảng ủy cheăm Tân Lập, tơring Krông Ƀuk tơ’mot tung hơnăm 2022. Kố cho môi tơdroăng ki mơ-eăm kân dêi cheăm pơlê tung tơdroăng hnê, tơ’mot mơngế mot đảng viên nếo drêng hên mâu droh rơtăm a mâu thôn, pơlê lăm pêi cheăng kâ hơngế, kuăn pơlê a thôn pơlê ôh tá vâ veăng pêi mâu tơdroăng cheăng ‘na Đoân, ôh tá vâ mơ-eăm.

La vâ ai xiâm ai ngế ki achê Đảng, Khu pơkuâ cheăng Đảng ủy cheăm Tân Lập, tơring Krông Ƀuk hiăng tơkŭm pơkuâ, hnê mơhno tơdroăng séa ngăn, tơ’mot  ngế mot Đảng tơniăn tơbleăng tơdrăng, ăm rêm ngế ‘nâi, ôh tá kơtôa, mơ-eăm ôh tá rah ‘mot tiu tuăn vâ lơ bú vâ ai hnoăng tê. Malối tơmâng khât troh mâu ngế đoân viên, hô̆i viên, ai tuăn vâ mơ-eăm, ai hnoăng cheăng mơjiâng tôh tơrŭm cheăng dêi khu ƀă pơkâ thế tâi tâng mâu khu, mâu chi ƀô̆ thế đi đo hriâm tơ’nôm ăm mâu ngế mot Đảng.

Pôa Trần Ngọc Sơn, kăn phŏ hnê ngăn Đoân Droh rơtăm cheăm Tân Lập ăm ‘nâi:

“Peăng Đoân Droh rơtăm cheăm xuân hnê mơhnhôk mâu đoân viên droh rơtăm  kơhnâ rơkê, pơtối pêi tro, ối rak tŭm mâu đoân viên vâ mot tung Đảng ƀă ai hên tơdroăng pêi pro vâ ăm mâu droh rơtăm, đoân viên veăng pêi mâu tơdroăng cheăng kal kí xuân môi tiah tơdroăng cheăng dêi pơlê pơla’’.

Đảng ủy cheăm Tân Lập, tơring Krông Ƀuk xuân tối tơdroăng cheăng tơ’mot mơngế mot đảng viên a thôn pơlê, cho hnoăng cheăng pêi ki kal, kơhnâ khât, veăng ‘no hnoăng mơdêk ivá pơkuâ hnê mơhno, ivá tơplâ dêi khu tơrŭm cheăng Đảng. Thăm nếo mâu đảng viên ối cho tíu ki tơdjêp tung mơnhông cheăng kâ rêh ối tơniăn ‘na cheăng lêng kring tơniăn pơlê cheăm.

Xua mê, ƀă mâu thôn, pơlê, cheăm ki ai krâm hdroâng kuăn ngo rêh ối, mâu chi ƀô̆ hên hơnăm hlối ôh tá tá tơ’mot mơngế mot đảng viên nếo, Đảng ủy cheăm hiăng mơjiâng pơkâ mơnhông tơ’mot mơngế mot đảng, pơcháu kơxô̆ pơkâ nhên ăm mâu chi ƀô̆, mâu khu grup,  ngăn mê cho môi tung mâu pơkâ ki kal vâ tối nhên, pơxá ối má to lâi rêm hơnăm.

Pakĭng mê, Đảng ủy cheăm xing xoăng hnoăng cheăng pêi ăm mâu Đảng ủy viên veăng lăm hôp a chi ƀô̆ cheăm, ing mê vâ ‘nâi mâu tơdroăng, teăm tối tơbleăng, tah lôi mâu tơdroăng xơpá tung tơdroăng tơ’mot mơngế mot đảng viên nếo tối krê xuân môi tiah tơdroăng cheăng mơjiâng Đảng tối tơdjuôm. Jâ Cao Thị Thúy Nga, Kăn hnê ngăn Đảng ủy cheăm Tân Lập, tơring Kông Ƀuk ăm ‘nâi:

“Sap apoăng hơnăm 2023 Đảng ủy hiăng xoăng hnoăng cheăng ăm mâu đảng ủy viên tung tơdroăng cheăng pêi cho pakĭng  mơdêk tơ’mot mâu ngế mot Đảng viên mơjiâng mâu tôh tơrŭm cheăng Đảng mê kô séa ngăn mâu thôn pơlê cheăm ngăn khât a tŭm tơdroăng pêi pro, tơdroăng mơnhông cheăng kâ rêh ối tung cheăm ƀă tơdroăng ki mơ’nui hơnăm dêi mâu thôn, kô cho xiâm ki vâ tối kăn ƀô̆ cheăm pơcháu hnoăng cheăng pêi a mâu thôn pơlê, cheăm’’.

Tung la ngiâ, Đảng ủy cheăm Tân Lập, tơring Krông Ƀuk kô pơtối mơdêk hnoăng cheăng pơkuâ, hnê mơhno vâ pêi cheăng châ tơƀrê tâ nếo ‘na tơdroăng tơ’mot mâu ngế mot Đảng a mâu chi ƀô̆ tung cheăm, vâ tơniăn kơxô̆ mơngế ki pơtối ƀă mơnhông tơƀrê đi đo tơdroăng cheăng Đảng. Pakĭng mê, veăng mơdêk hnoăng cheăng pơkuâ hnê mơhno ƀă ivá tơplâ dêi khu tơrŭm cheăng Đảng ƀă đảng viên ai tiô tơdroăng púi vâ mâu tơdroăng cheăng pêi tung tơdroăng nếo nôkố.