Ai môi tơdroăng ki ai khât nôkố, drêng tơdroăng mơjiâng thôn pơlê nếo châ kêi đeăng mê troăng kân a mâu kơpong kong ngo dêi Khánh Hòa pơrá hiăng châ tôh ƀê tong, kân rơdâ, lĕm. Troăng lĕm, laga hlê plĕng rak tơniăn drô troăng klông ƀă rơxế kơtâu dêi kuăn pơlê a kơpong kố mê tá hâi tơxâng, drêng ki hên cho ối hiâm mơno tơmiât ôh tá bê tơmâng drêng vê rơxế, ki má lối cho vâi droh rơtăm, môi tiah: Ôh tá truâ muâk rak vế ko, to rơxế têi, to ƀơgai, pơto lối hên mơngế tiô pơkâ ăm phêp...

A kong ngo, ki hên mâu ngế vê rơxế hon đa cho droh rơtăm, mê cho mâu ngế ‘nâi ‘na luât rak tơniăn troăng klông, ‘nâi pơkâ cho drêng ‘nân a rơxế hon đa cho thế truâ muâk rak vế ko, laga ‘nâi cho môi tơdroăng ƀă pêi pro nôkố mê cho tiô rêm ngế.

Nâ Cao Thị Dân, ối a cheăm Cầu Bà, tơring kong ngo Khánh Vĩnh, kong pơlê Khánh Hòa tối ăm ‘nâi:

“Ai ngế kơto rơxế truâ muâk rak vế ko, ai ngế ôh tá truâ muâk ra vế ko xua achê hngêi’’.

A kong ngo, hên vâi hdrêng bu nếo 12, 13 hơnăm hiăng vê rơxế ki nếo pro tơ’nôm. Sap ing ối kŭn mê hiăng tiah mê xua mê troh hơnăm hiăng droh rơtăm mơhé tá hâi hriâm luât troăng klông, tá hâi ƀâng vê rơxế laga tâng ai rơxế hon đa mê cho kơto. Ki nhên khât ai hên a kong ngo cho rơxế ki pro tơ’nôm, ki tơniăn dêi mâu toăng rơxế kô cho ôh tá tơniăn khât laga kố cho rơxế kơto prôk lăm dêi hên droh rơtăm.

Ai mâu droh rơtăm nếo lo ing roh ôu drôu ƀiê̆r hiăng pơtối vê rơxế lo drô troăng kân. Pôa Triệu Mạnh Hải, tơring Khánh Vĩnh, kong pơlê Khánh Hòa tối ăm ‘nâi:

‘’Kuăn pơlê a kố hlê plĕng iâ, má péa nếo, cho hriâm xuân ôh tá troh tá tui lui drêng ai rơxế mê kơto hmâng vâ. Kơ koan cheăng pơxâu phâk nếo ‘nâi dêi tơná pro xôi laga tơdroăng mê hiăng hluâ’’.

Kan sát rak tơniăn troăng klông đi đo gâk séa ngăn, pơxâu phak mâu ngế pro xôi laga mâu tíu gak ngăn ki hên a mâu troăng kân ki xiâm. Xua mê, mâu troăng kân drô cheăm, drô thôn mâu tơdroăng pro xôi dêi hên droh rơtăm châ pơxâu phak. Mâu roh pơtâng tối, pơchân xuân tá hâi pơ’lêh tuăn tơmiât rak tơniăn troăng klông dêi kuăn pơlê kong ngo.

Um: Kăn ƀô̆ Ƀơrô Kan sát rak tơniăn troăng klông ƀă rơxế kơtâu xing xoăng mơ-éa chêh pơtâng ăm kuăn pơlê – Um rah xo tung măng pơlê pơla

Môi tung mâu tơdroăng pá puât ƀă tơdroăng rak tơniăn troăng klông a kơpong kong ngo cho khu Kan sát rak tơniăn troăng klông dêi cheăm, pơlê cho iâ tơdrêng amê cheăm, pơlê kân. Môi tung mâu troăng pêi dêi Khánh Hòa ƀă tơdroăng mơdêk hlê plĕng rak luât troăng klông ƀă rơxế kơtâu ăm kuăn pơlê kơpong hdroâng kuăn ngo, kong ngo cho mơnhông hnoăng dêi mâu krâ pơlê, kăn pơkuâ pơlê, ngế ki kuăn pơlê loi tơngah a pơlê, ing mê po rơdâ, mơhnhôk vâi chiâng ngế ki má môi tung pơtâng tối, tơbleăng tơdroăng ki rơkê rak tơniăn troăng klông drêng veăng kơto rơxế drô troăng kân ăm kuăn pơlê.

Pôa Nguyễn Ngọc Hoa, Kăn hnê ngăn Vi ƀan cheăm Khánh Trung, tơring Khánh Vĩnh, kong pơlê Khánh Hòa tối ăm ‘nâi:

‘’Ngin rah xo môi ngế teăng mâ mơngế ki kuăn pơlê loi tơngah tung pơlê pơla kuăn pơlê rêh ối xuân môi tiah kuăn pơlê mâu hdroâng kuăn ngo vâ tơrŭm ‘na hên tơdroăng tơdjâk hnê hriâm, thăm nếo troăng klông ăm kŏng an krếo kơ-êng, kheăn tối, pơchân tối mâu ngế ki hmâ pro xôi ‘na tơdroăng rak tơniăn troăng klông.’’

Nôkố, a hên troăng kân kơpong kong ngo xuân ối ai mâu droh rơtăm kơto rơxế ki pro tơ’nôm, ôh tá truâ muâk rak vế ko ƀă kơto rơxế ƀơgai kơbố ngăn xuân xâo rơ-iô. Ƀơrô Kan sát rak tơniăn troăng klông Kŏng an kong pơlê Khánh Hòa hiăng mơjiâng troăng pêi Pơtâng tối kuăn pơlê rơkê ‘na “Pơtâng tối, hnê luât ‘na rak tơniăn troăng klông ăm kuăn pơlê hdroâng kuăn ngo a kong ngo Khánh Vĩnh hneăng hơnăm 2021 – 2025’’.

Ing mê, hiăng tơkŭm po pơtâng tối hên roh ăm vâ chê 1 rơpâu ngế kăn teăng mâ mâu khu cheăng, khu râ, kơvâ cheăng kal kí rêh ối pơlê pơla, krâ pơlê; kuăn pơlê hdroâng kuăn ngo a 3 cheăm Liên Sang, cheăm Cầu Bà, cheăm Sơn Thái (ối tung tơring Khánh Vĩnh ƀă Hngêi trung Trung Cấp hnê cheăng pêi hdroâng kuăn ngo ai tíu kâ koi ối pơtê tơring Khánh Vĩnh... Diâp 70 to muâk rak vế ko, xing xoăng hlá mơ-éa chêh pơtâng ‘na rak tơniăn troăng klông; tơkêa ‘na tơdroăng rak tơniăn troăng klông ƀă rơxế kơtâu ăm mâu vâi o hok tro; mơjiâng ƀă krâ 2 kơƀâng pơtâng tối rak tơniăn troăng klông ƀă tơdroăng xiâm “Kan sát rak tơniăn troăng klông xua hơniâp a mâu troăng kân’’ a troăng kân tơnêi têa 27C a 2 cheăm Cầu Bà ƀă cheăm Sơn Thái.

Mơhé tơdroăng rak tơniăn troăng klông ƀă rơxế kơtâu a kơpong kong ngo dêi Khánh Hòa xuân tá hâi châ môi tiah tơdroăng pói vâ, laga ƀă tơdroăng ki veăng kơtăng môi tiah nôkố, mơni tung la ngiâ, tơdroăng rak tơniăn troăng klông ƀă rơxế kơtâu kơpong kong ngo kô ai hên tơdroăng ki pơ’lêh châ tơƀrê, kum tung tơdroăng pro kơdroh tơklâm rơxế drô troăng kân tung lâp kong pơlê.