Tơpui a rôh po hôp, pôa Y Thanh Hà Niê Kdăm, Kăn hnê ngăn Hô̆i đong Hdroâng kuăn ngo ăm ‘nâi, Kuŏk hô̆i tơkŭm séa ngăn khât ‘na tơdroăng “Klêi kơ’nâi tơbleăng pêi pro mâu Tơdroăng pơkâ dêi Kuô̆k hô̆i ‘na túa pơkâ 5 hơnăm pơla hơnăm 2021 – 2025: Tơdroăng pơkâ dêi tơnêi têa mơjiâng thôn pơlê nếo; Tơdroăng pơkâ dêi tơnêi têa ‘na kơdroh kơtiê krá ton; Tơdroăng pơkâ dêi tơnêi têa ‘na mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo ƀă hên tơdroăng ki ê. Kố cho tơdroăng ki chêh tơkŭm ƀă châ tơkŭm po hôp a tơdế hneăng (pơla hơnăm 2021 – 2025).

Troh nôkố Khu kăn séa ngăn hiăng tơbleăng tŭm tơniăn tro tơdroăng pơkâ mơ’no. Khu kăn séa ngăn hiăng tối tơbleăng klêi kơ’nâi séa ngăn ăm Kăn xiâm hnê ngăn Kuô̆k hô̆i, mâu kăn xiâm phŏ hnê ngăn Kuô̆k hô̆i; tối tơbleăng ăm Vi ƀan pơkuâ Kuŏk hô̆i a rôh hôp má 25 (khế 8 kố nah) ƀă rôh hôp má 26 (tung khế 9).

Khu kăn séa ngăn nôkố dế hnê mơhno Tôh tŏng kum tơdroăng cheăng pêi tơdrêng tơkŭm, tơmâng xo mâu rơkong tơpui tối dêi Vi ƀan pơkuâ Kuô̆k hô̆i vâ chêh bro hlá mơ-éa, tối tơbleăng ‘nâng ‘nâi ƀă Pơkâ séa ngăn ‘na tơdroăng vâ pơtroh ăm Kuô̆k hô̆i a Hneăng hôp má 6, khế 10 la ngiâ.

Kăn hnê ngăn Hô̆i đong Hdroâng kuăn ngo tối nhên, hâi lơ 12/9/2023, Chin phuh ai pơtroh hlá mơ-éa “ ‘Na klêi kơ’nâi pêi pro, xơpá, tơvâ tơvân tung tơbleăng 3 Tơdroăng pơkâ dêi tơnêi têa tung pơla hơnăm 2021-2023 ƀă pơkâ mơ’no troăng hơlâ, tơdroăng pơkâ tŏng kum xơpá, tơvâ tơvân, mơdêk rĕng tơdroăng pêi pro mâu Tơdroăng pơkâ tung la ngiâ, tung mê tối ai mâu tơdroăng xơpá, tơvâ tơvân tung tơbleăng pêi pro 3 tơdroăng pơkâ dêi tơnêi têa ƀă pơkâ mơ’no, pâ thế ƀă mâu tơdroăng.

Chin phuh pâ thế ăm phêp bro ton hâi khế pêi pro, ‘no liăn troh tâi hâi 31/12/2024 ƀă kơxô̆ liăn tơnêi têa dêi mâu tơdroăng pơkâ dêi tơnêi têa tá hâi ‘no liăn tâi tung hơnăm 2023; bro ton hâi khế, pơkâ thế hâi khế pơtroh ăm Kuô̆k hô̆i séa ngăn, pơkâ troăng hơlâ xing xoăng ăm râ tơring tung pơkuâ ngăn, tơkŭm pêi pro mâu tơdroăng pơkâ dêi tơnêi têa a Hneăng hôp má 6 dêi Kuô̆k hô̆i.

Pôa Y Thanh Hà Niê Kdăm, Kăn hnê ngăn Hô̆i đong hdroâng kuăn ngo dêi Kuô̆k hô̆i tối tiah kố, mâu tơdroăng ki kal nếo tối a kơpêng gá kal khât, tơdjâp tơdrêng troh hên kơvâ cheăng dêi tơdroăng rêh ối pơlê pơla, malối cho mâu kơtiê, hdroâng kuăn ngo, kơpong xơpá, kơpong malối xơpá dêi tơnêi têa. Ƀă tơdroăng ki rơtế prôk, pơ’lêh bro rơtế ƀă Chin phuh, a Rôh hôp kố, pôa Y Thanh Hà Niê Kdăm, Kăn hnê ngăn Hô̆i đong hdroâng kuăn ngo pơkâ thế mâu kăn rơtế tơpui tơno, tăng troăng vâ tŏng kum pơkâ tơleăng mâu tơdroăng ki pâ thế, sap ing tơdroăng ki ai khât pơkâ mơ’no.

Tơpui mơgêi Rôh hôp, pôa Y Thanh Hà Niê Kdăm, Kăn hnê ngăn Hô̆i đong Hdroâng kuăn ngo ăm ‘nâi, klêi hâi khế pêi cheăng, kơtăng ƀă pôu râng dêi hnoăng, ƀă hên rơkong tơpui tối tơkŭm, Rôh hôp hiăng klêi tơdroăng ki pơkâ mơ’no.

Teăng mâ Khu kăn séa ngăn, Kăn hnê ngăn Hô̆i đong Hdroâng kuăn ngo tối nhên, Khu kăn séa ngăn tơmâng xo ƀă mơnhên tối khât hiâm mơno, hnoăng cheăng pôu râng dêi mâu ngế cheăng tung Khu séa ngăn tung Rôh hôp. Malối cho mâu rơkong tơpui hiăng tro tơdroăng ki kal, ki xiâm, bro chiâng tơdroăng ki môi tuăn ‘na ki hlê plĕng, hnoăng cheăng pôu râng, mơhno nhên túa tơmiât dêi Kuô̆k hô̆i rơtế prôk ƀă Chin phuh vâ mơdêk rĕng tơdroăng ki tŏng kum mâu tơdroăng xơpá, tơvâ tung tơdroăng tơbleăng pêi pro mâu pơkâ dêi Tơnêi têa.

Vâ teăm tŏng kum xơpá, tơvâ, mơdêk rĕng tơdroăng ki pêi pro mâu tơdroăng dêi tơnêi têa tung la ngiâ ah, pôa Y Thanh Hà Niê Kdăm, Kăn hnê ngăn Hô̆i đong Hdroâng kuăn ngo pơkâ thế Khu xiâm pơkâ ƀă ‘no liăn cheăng (kơ koan xiâm Khu hnê mơhno cheăng mâu Tơdroăng pơkâ tơnêi têa) tơrŭm krá tơniăn ƀă Tôh kum Khu kăn séa ngăn ƀă mâu kơ koan ki ai tơdjâk troh vâ chêh tơkŭm tŭm mâu rơkong tơpui tối ƀă hồ sơ, hlá mơ-éa ki ai tơdjâk troh, tối tơbleăng ăm Kuô̆k hô̆i vâ môi tuăn ƀă Khu xiâm pơkâ ƀă ‘no liăn cheăng, rơtế ƀă mâu khu xiâm, kơvâ cheăng ki ai tơdjâk troh ‘na mâu tơdroăng ki kal tơpui tơno a Rôh hôp kố vâ chêh pro klêi kơxop Hlá mơéa pơkâ, pơtroh pâ rơkong tơpui tối dêi Vi ƀan pơkuâ Kuô̆k hô̆i.