Kơxo hâi lơ 7/6, ing tơdroăng pơkuâ dêi pôa Vương Đình Huệ, Kăn xiâm hnê ngăn Kuô̆k hô̆i pơtối ƀă khu tơdroăng má 2 dêi tơdroăng ‘na tŏng kum kuăn ngo. Mơgêi khu tơdroăng kơ-êng ƀă kơvâ ‘na kuăn ngo, pôa Vương Đình Huệ, Kăn xiâm hnê ngăn Kuô̆k hô̆i tối rôh kơ-êng po tro tiô hnoăng cheăng, tơdrăng.

Tối nhên hên tơdroăng ki u ối, ki xơpá, tơvâ tơvân, malối cho tơdroăng hrá tơbleăng mâu tơdroăng pơkâ dêi tơnêi têa. Mâu hlá mơ-éa hnê pơkâ hrá ‘nâ hía ôh tá hâi tŭm, hâi nhên, hâi ai kơlo pơkâ ki nhên, Kăn xiâm hnê ngăn Kuô̆k hô̆i pơkâ thế tung la ngiâ tơbleăng mâu troăng rơhlâ vâ pêi pro tiô luât pơkâ tŭm, teăm tơdrêng mâu troăng rơhlâ, troăng pêi ki kal ‘na luât pơkâ kuăn ngo pơla hơnăm 2021-2030.

Mơhnhôk tăng liăn ‘no mơnhông cheăng kâ - rêh ối kơpong kuăn ngo ƀă kong ngo; tung mê, tơkŭm a cheăm, tơring ki xơpá, khu kuăn ngo ki ối xơpá.