Hơnăm 2023 kô nah chi ƀô̆ pơlê Chư̆, cheăm Ya Ly, tơring Sa Thầy tơ’mot tơ’nôm péa ngế đảng viên nếo mơngế Jarai cho A Nŏi prế Phạm Quang Anh. Kăn hnê ngăn chi ƀô̆ hlối pro kăn thôn pơlê Chư̆ A Thoải ăm ‘nâi, Chi ƀô̆  xuân hiăng rah xo pái ngế kuăn pơlê ki rơkê kơhnâ mơngế Jarai, mê cho: Y Phư, A Hlưm ƀă A Num lăm hriâm lâm hlê plĕng ‘na Đảng. Tŭm 3 ngế mê xuân cho mâu ngế mơnhông cheăng kâ tung rơpŏng hngêi, xuân môi tiah ngế ki djâ troăng ahdrối tung mơjiâng thôn pơlê nếo.

Tiô kăn hnê ngăn Chi ƀô̆ Chư̆ A Thoải, vâ kuăn pơlê tơmâng, loi ƀă pêi pro ƀối mê rêm ngế đảng viên malối thế pêi cheăng lĕm tro, djâ troăng ahdrối tung mâu tơdroăng pêi pro dêi pơlê:

“Hơnăm kố nah, Chi ƀô̆ ngin hiăng ’mot 2 ngế mot đảng viên nếo, mơ’nui hơnăm tơ’nôm pa 1 ngế nếo. Ngin hiăng rah thế 3 ngế lăm hriâm vâ mot Đảng. Tung hơnăm kô luât pơkâ ai 5 ngế. Kơnôm tơmâng khât, mơhno nhên, hnê mơhnhôk, pêi teăm tơdrêng mê khoh ai tiah mê. Nôkố, ngin dế pơtối tơbleăng mơjiâng thôn pơlê nếo, thế rơkê, hnê tối tơtro, tơrŭm môi tuăn ƀă dêi rơpó, thế rơkê plĕng mâu tơdroăng. Mơjiâng thôn pơlê thế pro pơxúa khât. Tơnêi têa hiăng tơmâng pin thế mơ-eăm mơnhông, ôh tá kơnôm to a tơnêi têa, ing tơná thế mơ-eăm dêi. Xo ah hmôi, kuăn cháu ngin châ pơxúa, troăng prôk hiăng ai, tơdroăng rêh ối châ mơdêk, tơmeăm khoăng chía ai, ki mê pin dế vâ pêi’’.

Đảng ƀô̆ cheăm Ya Ly, tơring Sa Thầy nôkố ai 9 Chi ƀô̆, ai 81 ngế đảng viên, tung mê ai 34 ngế đảng viên cho mơngế kuăn ngo. Sap apoăng hneăng troh nôkố mâu Chi ƀô̆ dêi Đảng ƀô̆ cheăm Ya Ly hiăng châ ’mot 22 ngế đảng viên nếo. Krê hơnăm 2024 Chi ƀô̆ dêi pái pơlê: Chư̆, Tum, Chờ tiô tối hdrối ’mot sap 5 - 7 ngế đảng viên nếo cho mơngế kuăn ngo a cheăm kố.

Kăn hnê ngăn Đảng ủy cheăm Ya Ly Phan Chí Thiện, ăm ‘nâi: Ing rôh tơkŭm hôp, mâu tơdroăng cheăng dêi kuăn pơlê, râ ủy, chi ƀô̆ ƀă tơrêm ngế đảng viên xuân ‘nâi tí tăng hlê plĕng, thế châ hlo ‘nâi ngế ki nếo, kơhnâ rơkê tung kuăn pơlê. Vâ Chi ƀô̆ rơdêi, môi tuăn tơrŭm mâu kuăn pơlê tung ’mot mơngế mot đảng viên nếo thế rah xo mơngế ki kuăn pơlê pâ nhoăm tung tơdroăng rêh ối rêm hâi ƀă pêi chiâk deăng. Pakĭng mê tơmâng khât, hnê mơhno, chông djâ mâu hơnăm ối nếo, mâu ki hriâm lâm kân. Kăn hnê ngăn Đảng ủy cheăm Ya Ly, pôa Chí Thiện tối, kơnôm châ mơjiâng Chi ƀô̆, Đảng ƀô̆  krá rơdêi, châ pơtối rak vế pêi pro, hnoăng cheăng dêi tơrêm ngế đảng viên malối a pái pơlê hdroâng kuăn ngo, troh mơ’nui hơnăm 2023 cheăm Ya Ly, tơring Sa Thầy hiăng pê klêi 19/19 tơdroăng pơkâ mơjiâng thôn pơlê nếo:

“Ing mâu đảng viên tung Khu kăn, đảng viên a Chi ƀô̆ hlối pro kăn thôn, đảng viên a mâu thôn pơlê kum hên cho Đảng ủy cheăm tung tơbleăng pêi mâu troăng rơhlâ, luât pơkâ dêi Đảng, luât tơnêi têa. Môi tiah hơnăm kố nah ngin mơjiâng thôn pơlê nếo mơhnhôk kuăn pơlê pleăng tơnêi, pro troăng, kum hâi pêi cheăng, pro lĕm mơnâ mâ ngăn hyôh kong prâi ngiât – krúa- lĕm dêi thôn pơlê hnoăng cheăng dêi đảng viên mâu chi ƀô̆ cho kal khât’’.

Hơnăm 2023 Đảng ƀô̆ tơring Sa Thầy, kong pơlê Kon Tum hiăng ‘mot châ 97 đảng viên nếo, châ 102% tâng pơchông ƀă kơxô̆ pơkâ mơdêk kơxô̆ đảng viên tung tâi tâng Đảng ƀô̆ tâk 2 rơpâu 33 ngế đảng viên. Troh nôkố tâi tâng 64 thôn pơlê tung tơring xuân hiăng pê klêi tơdroăng pơ’lêh inâi Kăn hnê ngăn Chi ƀô̆ hlối pro kăn thôn lơ Ngế pơkuâ cheăng măt trâ̆n thôn.

Jâ Y Sâm, Kăn phŏ hnê ngăn Đảng tơring, Kăn hnê ngăn Hô̆i đong tơring Sa Thầy ăm ‘nâi, vâ mơngế hơnăm ối nếo a mâu thôn pơlê ki hriâm lâm kân, ai ivá hlối vâ mot tung Đảng, Khu kăn pơkuâ hnê ngăn Đảng tơring Sa Thầy tơmâng khât tơdroăng mơjiâng Chi ƀô̆ krá rơdêi ƀă cheăng kâ - rêh ối thôn pơlê mơnhông tơƀrê:

“Ngin tơmâng khât troh tơdroăng tơ’mot đảng viên a mâu thôn malối cho tơdroăng tơ’mot đảng viên mơngế hdroâng kuăn ngo. Ngin mơdêk mơnhông cheăng kâ tung rơpŏng hngêi mâu hdroâng kuăn ngo cho tơkŭm pơ’lêh hdrê pêt, mơnăn păn, vâ kuăn pơlê loi ƀă tơdroăng hnê mơhno, kăn hnê ngăn Đảng. Ing tơdroăng pêi nhên dêi mâu rơxông nếo ăm hlo châ Đảng, mâu kăn tơmâng khât troh mơnhông cheăng kâ tung rơpŏng hngêi xuân cho tơdroăng mơjiâng khu kăn ƀô̆ hơnăm ối nếo. Ing mê, ngin hnê mâu hơnăm ối nếo vâ ăm mot Đảng’’.

Ing tơdroăng mơjiâng Chi ƀô̆ krá rơdêi ƀă tơdroăng cheăng kâ - rêh ối thôn pơlê mơnhông tơƀrê, tiô khu kăn pơkuâ hnê ngăn Đảng tơring Sa Thầy tối, tơdroăng pêi cheăng dêi chi ƀô̆ a mâu thôn pơlê châ pơ’lêh nếo, hiăng pêi tro tâ. Cho tơring tơkăng kong dêi kong pơlê Kon Tum ƀă pơxiâm ing tơdroăng cheăng kâ - rêh ối hên tơdroăng xơpá la troh mơ’nui hơnăm 2023 tơring Sa Thầy hiăng ai 4 to cheăm châ mơnhên tối thôn pơlê nếo, kơxô̆ liăn châ xo riân rêm ngế vâ chê 52 rơtuh liăn. Lâp tơring ai 54/64 to thôn, pơlê châ mơnhên ‘’thôn pơlê rêh ối tiô túa nếo’’.