Trâm ngoh Pờ Lò Hừ a ‘núa tơnêi lĭng a ngo. Ngoh dế tơvâ tơvân ƀă dêi tơdroăng kơ’nêi kơpôu. Tâng idrâp rơkong ngoh Pờ Lò Hừ, krếo chuât mơdêi hlối xơtó lâp kơpong ngo mâu kơpôu prôk troh a ‘núa tơnêi lĭng a ngo. Rêm chuôp kơtu po xế mâu kơpôu troh rế krâm tâ.

Kot mâ ƀă xông kân a tơnêi pá puât dêi pơlê Chà Kế, lối 10 hơnăm rếh ôi pơlê kố klêi mê pơlê tá hiăng djâ rơpŏng hngêi ngoh Hừ troh a tơnêi Pha Bu, kơtăn pơlê xiâm lối 60km. Mâu hơnăm ối kŭn dêi ngoh Hừ xuân môi tiah mâu kuăn pơlê La Hủ ki ê a tíu kố há xuân thế tơkâ luâ mâu khế hơnăm tiô dêi nôu pâ lăm ối a pơlê kố, klêi mê prôk ối pơlê tá, lăm ối a kong vâ tăng rêh kâ ối rêm hâi.

Tung pơla ôh tá tơniăn mê cho ki xiâm pro chiâng ai hên môi péa rơpŏng kơtiê dêi kuăn ngo La Hủ tung 54 hdroâng kuăn ngo tung lâp tơnêi têa: Ngoh Pờ Lò Hừ tối:

“Mâu jâ pôa rĕng hlâ, klêi mê pâ hlối cho kuăn hdrui drêng mê nah xuân ối kŭn, ôh tá ối môi tíu hmếo pơ lăm ối u kố umê, chiâng xơpá hên. Lăm rêh ối ukô klêi mê lăm ối tíu ê nếo tơdroăng rêh ối pá puât, pêi cheăng kâ xuân pá, kế kâ hlối pá ai. Nôkố hiăng hơ’lêh hên, ối môi tíu xuân tơniăn. Mơ-eăm pêi cheăng kơhnâ vâ mơnhông cheăng kâ rế tơƀrê. Nôkố tơnêi têa xuân veăng kum kuăn pơlê pro troăng prôk lĕm tơ’lêi hlâu vâ lăm pêi cheăng kâ’’

.Hlo mâu tơdroăng xơpá ‘na tơnêi tíu, kong prâi, pơxiâm ing tơdroăng ki pá dêi rơpŏng hngêi xuân môi tiah kuăn ngo pin, đảng viên, kăn hnê ngăn chi ƀô̆ hlối pro kăn pơlê, Pờ Lò Hừ hiăng ‘nâi hriăn plĕng, tăng hriâm ing mâu ki ê vâ mơnhông cheăng kâ ăm rơpŏng hngêi tơná. Kơ’nâi hên hơnăm kơhnâ, mơ-eăm, troh nôkố dế 43 hơnăm ngoh Hừ hiăng ai tung châ tơmeăm khoăng châ rơtal liăn, ƀă lối 100 to kơpôu, chât hectar loăng hâng, loăng plâi ring rí, thảo qủa, sâm ƀă hên ki ê.

‘’Mot Đảng rế ton rế hlê ‘nâi hên tơdroăng tâ, ƀă châ tơkŭm hôp rêm khế hlối hnê tối, hlối tơpui tơno, hlối hriâm ing dêi rơpó kum dêi rơpó, kuăn pơlê tâ hơniâp ro. Cho kăn hnê ngăn chi ƀô̆, rôh apoăng ‘nâi djâ troăng lĕm ahdrối ăm kuăn pơlê hnê kuăn pơlê túa pêi cheăng kâ môi tiah păn kơpôu ro, chu, pêt mâu hdrê loăng plâi kâ, pêt loăng ki kơnâ liăn. Pin ôh tá pêi troăng lĕm, ôh tá djâ troăng ahdrối ăm kuăn pơlê hlo mê kuăn pơlê rế xơpá tâ. Ôh tá ‘nâi túa pêi cheăng klâi, kuăn pơlê ôh tá tơchĕng tơmiât klâi, tuăn ngôa ôh tá rơngê’’.

Ôh tá xê to tơmiât tô tuăn krê ăm tơná ƀă ropŏng hngêi, ngoh o, hdrông hdrê vâi, ƀă hnoăng cheăng dêi tơná cho mơngế đảng viên, hên hơnăm kố, ngoh Pờ Lò Hừ ối kum hrĭng rơpŏng tung pơlê, tung cheăm. Ôh tá xê to hnê kum ăm vâi ai cheăng pêi, rêm hâi ăm 5 ngế pêi cheăng ƀă tơdroăng cheăng pêi tiô rơnó  tăng ăm lối 30 ngế ai cheăng pêi tiô tơnó, rêm hơnăm mâu rơpŏng hngêi kơklêa a rôh báu chê tum, ah ngoh Hừ ăm vâi báu, ăm phái; rơpŏng ôh tá ai liăn ôh tá hlê túa cheăng kâ ah ngoh ăm mung liăn la ôh tá xo laih, klêi mê hnê túa pêi cheăng kâ.

Ngế ki lâi kal ki klâi ngoh kum ki mê. Nôkố ngoh Hừ hiăng ai hên ngế kuăn pơlê pâ nhoăm dêi tơná. Nâ Ly Mò Nu, kuăn pơlê a pơlê Pha Bu, cheăng Pa Ủ hơ’muăn tối. Kơnôm ai ngoh Hừ kăn hnê ngăn chi bộ  kum pêi cheăng kâ, kơ’nâi hên hơnăm kơklêa hrâ mơnguâ, nôkố rơpŏng hngêi a hiăng hluăn kơtiê. Tơdroăng rêh ối ôh tá xơpá môi tiah hdrối nah, kuăn ‘nĕng á hiăng châ hriâm chư, hiăng chiâng pơchuât. Ôh tá xê to rơpŏng hngêi a  mê hên rơpŏng hngêi nhŏng o ki ê tung pơlê xuân châ ngoh veăng kum, tơdroăng rêh ối hiăng tơƀrê tâ hdrối nah. Vâi krâ nhŏng o tung pơlê tâ hơniâp ro.

Ôh tá tơpui klâi la hmếo pêi pro tơdroăng lĕm djâ troăng a hdrối tung pêi cheăng kâ mơdêk pro kơdrum deăng, pêt kong a cheăm, tung hên hơnăm kố hía nah iâ mơngế ‘nâi tung hdroâng kuăn ngo La Hủ a cheăm tíu tơkăng kong Pa Ủ ai môi ngế kro mơdrŏng ‘’prôk chêng tê kơtê’’. Ing túa cheăng kâ pro kơdrum deăng dêi pơlê Pha Bu ngoh Pờ Lò Hừ, kăn hnê ngăn chi ƀô̆, hlối pro kăn pơlê, troh nôkố cheăm Pa Ủ hiăng ai hên túa pêi cheăng ki ê nếo a pơlê Thăm Pa, Nhú Ma, Ứ Ma, Xà Hồ, Mu Chi... Tối ‘na hnoăng cheăng dêi Đảng ủy cheăm Pa Ủ, tơring Mường Tè ăm ‘nâi:

“Ƀă mâu pơlê cheăm xơpá, tơdroăng cheăng kâ ối xơpá ôh tá hlê vâ mơnhông pêi cheăng kâ, mâu ngế ki rơkê tiah mê cho tơxâng nhoăm mơnê ‘nâng. Mâu vâi ngoh mê hlối cho mơngế ki ối a pơlê cheăm, hlối cho mâu kuăn ngo ki kuăn pơlê pâ nhoăm. Ing tơdroăng cheăng pêi dêi mâu vâi ngoh hiăng châ vâi ô eăng ƀă cho mâu ngế ki djâ troăng a hdrối vâ hnê mơhnhôk ƀă veăng kum, mơhnhôk kuăn pơlê a pơlê cheăm mơ-eăm hriâm ƀối túa pêi cheăng, xuân kum ăm tơdroăng cheăng kâ-rêh ối dêi pơlê pơla choâ ‘lâng châ mơnhông tơƀrê”.

Pa Ủ hdrối nah vâi hiăng ‘nâi cho kơpong xiâm ki kơtiê má môi dêi kong pơlê Lai Châu, drêng mê kơxô̆ rơpŏng kơtiê châ 95%. La, kơ nôm ai đảng viên ki kơhnâ djâ troăng a hdrối po troăng hluăn kơtiê môi tiah ngoh Pờ Lò Hừ, nôkố kơxô̆ rơpŏng kơtiê dêi pơlê cheăm hiăng chu ối lối 77%. Mâu tơdroăng cheăng pêi xua kuăn pơlê mê hiăng châ tơmâng xo, drêng rơpŏng hngêi ngoh cho 1 tung 8 rơpŏng ai hnoăng kân tung tơdroăng Hriâm ƀă pêi pro tiô troăng tơdjâ hiâm mơno, túa cheăng Hồ Chí Minh hơnăm 2023, châ Khu hnê mơhnhôk cheăng Đảng kong pơlê Lai Châu  pâ thế Kăn xiâm hnê ngăn Vi ƀan kong pơlê diâp Bâng khĕn kơdeăn.