Pôa Phạm Minh Chính, Ngế pro xiâm hnê ngăn Chin phuh nếo kĭ tơbleăng mơ-éa ki kal kơxô̆ 634/CĐ-TTg hâi lơ 10/7/2023 tah lôi mâu tơdroăng pá puât, tơvâ tơvân tung tơdroăng mơnhên yă tơnêi. Tiô pâ thế dêi hên kong pơlê, tơdroăng mơnhên yă tơnêi a mâu tíu ối trâm hên pá puât, tơvâ tơvân ‘na hnoăng pơkuâ, hdrối kơ’nâi, pro mơ-éa, chiâng ai tơdroăng mơnhên yă tơnêi cho hrá, tơdjâk troh tơdroăng pêi pro tơdroăng tơkêa bro mơ’no liăn.

Vâ teăm tơdrêng tơleăng mâu pơloăng mơnúa dêi kong pơlê tung tơdroăng mơnhên yă tơnêi inhên, Ngế pro xiâm hnê ngăn Chin phuh pơtối pơkâ: Ngế xiâm pơkuâ kế tơmeăm khoăng ƀă kong prâi thâ kêi đeăng hdrối hâi lơ 31 khế 7 hơnăm 2023 tơdroăng ‘mâi rơnêu, tơ’nôm pơkâ nhên troăng mơnhên yă tơnêi, mơjiâng, ‘mâi rơnêu yă tơnêi, mơnhên yă tơnêi i nhên ƀă hnê mơhno mơnhên yă tơnêi; séa ngăn, teăm tơdrêng hnê mơhno mâu kong pơlê tah lôi pá puât tung tơdroăng pêi pro thăm pêi pro rơdêi tơdroăng mơnhên yă tơnêi, pơkâ yă tơnêi.

Mơjiâng tôh séa ngăn, mơhnhôk, pơxâu phâk mâu tơvâ rơvân ‘na mơnhên yă tơnêi dêi kong pơlê, kơ koan, tíu cheăng. Kăn hnê ngăn Vi ƀan mâu kong pơlê, pơlê kong kơdrâm ối tung tơnêi têa tơkŭm hnê mơhno tơdroăng mơnhên yă tơnêi, pơkâ yă tơnêi tiô hnoăng, ôh tá klêng tê klêng hía, ôh tá pro pá, hrá, tơdjâk tơdroăng pêi pro tơdroăng tơkêa bro mơ’no liăn cheăng ƀă hía hé.