Kơxo lơ 12/3, Khu tŏng kum rơpŏng mô đô̆i hlâ tung tơplâ xâ nah Việt Nam tơkŭm po trâm mâ khu chêh hlá tơbeăng rơnó Hơngui Giáp Thìn 2024. Trung tươ̆ng Hoàng Khánh Hưng, Kăn hnê ngăn Khu tŏng kum rơpŏng mô đô̆i hlâ tung tơplâ xâ nah Việt Nam tối ăm ‘nâi: Khu hiăng tơdah châ tơdroăng tơdjuôm ivá tung tơdroăng pâ mơnê mô đô̆i hlâ tung tơplâ xâ nah dêi Kŏng ti xiâm troăng rơxế lơtreng Việt Nam ‘na tơdroăng pêi pro ôh tá xo liăn pơto kơxêng kiâ mô đô̆i hlâ tung tơplâ xâ nah ƀă ôh tá xo liăn rôe vĕ ăm nhŏng o mô đô̆i hlâ tung tơplâ xâ nah rơtế prôk ing peăng Hdroh lăm a peăng Kơnhŏng tơnêi têa.

Kố cho tơdroăng pêi ki kơnía rơkê trâu hơngế, mơhno hiâm mơno “Khoh châ niân tiah hâi kố athế chôu vế hnoăng vâi krâ nah” dêi hdroâng mơngế Việt Nam. Tung hơnăm 2024, Khu tŏng kum rơpŏng mô đô̆i hlâ tung tơplâ xâ nah Việt Nam pơtối pêi pro tro mâu tơdroăng pâ mơnê mâu ngế khên tơnôu hlâ tung tơplâ xâ nah môi tiah: Mơnhên inâi kơxêng kiâ mô đô̆i hlâ tung tơplâ xâ nah ối ai tơmeăm ki chêh ‘măn, ti tăng, chiâ xo kơ-êng kiâ mô đô̆i hlâ tung tơplâ xâ; diâp hngêi tuăn pâ, phĭu kơdĭng, diâp hnoăng liăn hriâm rơkê ăm nhŏng o rơpŏng mô đô̆i hlâ tung tơplâ xâ ƀă hía hé.

Ki rơhêng vâ tối, tung hơnăm kố, Khu tơrŭm ƀă Kŏng ti xiâm Troăng rơxế lơtreng Việt Nam tơkŭm pơto kơxêng kiâ mô đô̆i hlâ tung tơplâ xâ ƀă ôh tá xo liăn vĕ ăm mâu nhŏng o mô đô̆i hlâ tung tơplâ xâ prôk ƀă ing peăng Hdroh tơnêi têa lăm a peăng kơnhŏng ƀă pro tơ’lêi hlâu má môi ăm nhŏng o mô đô̆i hlâ tung tơplâ xâ tung tơdroăng tơkŭm po leh djâ kơxêng kiâ mô đô̆i hlâ tung tơplâ xâ vêh pơlê xiâm ƀă troăng rơxế lơtreng.