Kơxê lơ 12/7, pôa Đỗ Tiến Sỹ, Kăn cheăng tung Tíu xiâm Đảng, Kăn pơkuâ hnê ngăn cheăng Đảng, Kăn xiâm pơkuâ Rơ’jíu Việt Nam pơkuâ djâ Khu râ kăn pêi cheăng hiăng troh tâp nhâng, pôu tơbâ hnoăng kân kĭn mâu Ngế khên tơnôu Mô đô̆i hlâ tung tơplâ xâ nah a Um meăn tơbâ mâu Ngế khên tơnôu Mô đô̆i hlâ tung tơplâ xâ nah pơlê kong kân Đà Nẵng. Kăn xiâm pơkuâ Rơ’jíu Việt Nam hiăng troh lăm pôu, diâp 50 kơxuô tơmeăm diâp ăm mâu ngế ai hnoăng kăch măng dế rak ngăn a Tíu xiâm rak ngăn mơngế ai hnoăng kăch măng pơlê kong kân klăng leh tơbâ 76 hơnăm Hâi mô đô̆i rong râ hlâ hía (27/7).

Xông tơpui a roh troh lăm pôu, pôa Đỗ Tiến Sỹ vêh tơbâ khôi túa khên tơnôu dêi mô đô̆i ƀă kuăn pơlê pin tung roh tơplâ. Roh tơbâ 76 hơnăm Hâi mô đô̆i rong râ hlâ hía rế thăm rế pêng păm hên tâ, tung tơdroăng châ ƀlêi trâng dêi tơnêi têa ai tơdroăng ki pleăng mơheăm chhá châ chăn kân kĭn dêi mâu Ngế khên tơnôu cho mô đô̆i hlâ tung tơplâ xâ nah, Jâ Nôu Việt Nam khên tơnôu, mâu ngế ai hnoăng ƀă kăch măng.