Kơxo lơ 6/7, pôa Phạm Minh Chính, Ngế pro xiâm hnê ngăn Chin phuh trâm mâ khu râ kăn teăng mâ mơngế ai hnoăng kong pơlê Nam Định. Nôkố kong pơlê Nam Định ai lối 36 rơpâu ngế mô đô̆i hlâ tung tơplâ xâ, lối 41 rơpâu ngế mô đô̆i rong râ ƀă châi tamo, vâ chê 3 rơpâu Jâ nôu Việt Nam khên tơnôu, lối 10 rơpâu ngế veăng tung tơplâ xâ tro tâ trếo ‘mêi pơkeăng.

Xông tơpui a roh trâm mâ, pôa Phạm Minh Chính tối ăm ‘nâi, tung tơdroăng tơniăn rêh ối pơlê pơla, ai tơdroăng ki xiâm cho rak ngăn ăm mơngế ai hnoăng tơnêi têa. Ngế pro xiâm hnê ngăn tơnêi têa tối rơdêi, tơnêi têa pin tơkâ hluâ môi pơla ton tơplâ tơbriât tơniăn krê, hnoăng pơkuâ ƀă tung tơdroăng pêi mê, ai hên ngế hiăng hlâ xua Tơnêi têa, ai ngế ối rêh nôkố laga chêng kŏng châ chăn ôh tá lĕm xếo, tung châ tơdroăng châi xua tơplâ xâ nah.

Xua mê, Đảng, Tơnêi têa pin pá puât tơkéa lâi xuân kơjo pơkuâ, hnê mơhno, mơjiâng mâu rơxông, troăng hơlâ, tơkŭm po pêi pro mâu troăng hơlâ nhên, tŭm, kum tơ’nôm môi iâ mâu tơdroăng ki châi hiâm, hía lôi kố. Tơdroăng ki tơ’nôm kố ôh tá chiâng teăng ƀă mâu tơdroăng ki pleăng mơheăm chá, hía lêk lôi dêi mâu ngoh khên tơnôu, mâu ngế mô đô̆i hlâ tung tơplâ xâ, mô đô̆i rong râ, rơpŏng ai hnoăng kăch măng; laga pin thế pêi ivá tơná.