Kơxo hâi lơ 5/7, pôa Võ Văn Thưởng, Kăn xiâm hnê ngăn tơnêi têa hiăng pơkuâ hâi pêi cheăng ƀă mâu kơ koan tơdjâk troh vâ tối ‘na tơdroăng cheăng tơleăng mơnhên klêi hồ sơ pơkâ kơdê hlâ ngế ki ai xôi kân. Tối mơgêi a rôh pêi cheăng, pôa Võ Văn Thưởng, Kăn xiâm hnê ngăn tơnêi têa tối nhên: Tơdroăng cheăng tơleăng mơnhên hồ sơ pơkâ thế pĕng hlâ ngế ki ai xôi kân cho tơdroăng ki kal păng ‘nâng tơdjâk troh hlâ rêh dêi kuăn mơngế, kal thế séa ngăn nhên tơdroăng xôi, tơleăng mơnhên klêi ƀă tơkŭm ƀă hnoăng pêi kơhnâ khât pêi tâi ivá, pêi tro tơdroăng, tro luât, ai drăng ki hơ-ui há, thế tơtrŏng, ngăn nhên khât, pro tơniăn tiô pơkâ nhoăm Luât pơkâ ƀă luât rak tơniăn hnoăng dêi mơngế ki tro pơkâ pĕng hlâ tro tiô kơ luât hiăng pơkâ.

Kăn xiâm hnê ngăn tơnêi têa pơkâ thế, tung la ngiâ, mâu kơ koan kal pơtối pêi tŭm tâi, pêi kơtăng tro hnoăng cheăng, hnoăng pơkâ dêi tơná tro tiô luât pơkâ; xoăng ngăn nhên hnoăng cheăng pêi dêi tơrêm kơ koan; mơdêk tơrŭm;  tí tăng ngăn, séa ngăn đi đo, puk pâk; pêi ai pơxúa tơdroăng cheăng mê. Kăn xiâm hnê ngăn tơnêi têa xuân pơkâ thế mâu kơ koan kal tí tăng ‘nâi plĕng, tối troăng hơlâ ‘mâi hơ’lêh, tơ’nôm a mâu pơkâ dêi luât nôkố ‘na tơdroăng pơxâu phak pĕng kơdê ƀă pĕng hlâ ai tiô púi vâ tơxâng ƀă tơdroăng xôi ki gá pro, tơbleăng ăm kơ koan râ kơpêng séa ngăn, pơkâ.