Hên tơdroăng pơkâ mơnhông dêi Đảng ƀô̆ tơring hiăng pêi pro tung tơdroăng rêh ối. Ki má lối cho pơkâ hơ’lêh hdrê pêt mơnăn păn thăm pêt hên tơmeăm ƀă ki rơkê khoa hok kih thuât tung pêt mơjiâng tơmeăm hiăng châ hlo nhên a tơrêm thôn pơlê.

Tân Hòa cho cheăm pêi chiâk, châ pơkâ troăng pêi mơnhông cheăng kâ ki xiâm cho pêt loăng plâi tê lo liăn, báu phá alâi iâ khế tơkŭm ƀă pêt tơvât loăng plâi kâ. Troh nôkố, troăng pêi kố hiăng châ hơ’lêh ƀă tơdroăng pro mâu kơdrum deăng pêt krui ngeăm, krui kuit, krui ƀŏng, plâi nong triô troăng pơkâ VietGAP, tŭm tơdroăng pơkâ vâ tê ăm kong têa ê; hlối mơdêk xúa khoa hok kih thuât tung pêt mâu hdrê loăng.

Mâu hơnăm hdrối, ki pơxúa dêi loăng plâi kâ a cheăm trâm pá xua ôh tá ai têa vâ tôh tung rơnó tô mơdrăng, la nôkố, tơdroăng kố hiăng hlâu. Pôa Ngô Xuân Nam, Kăn phŏ hnê ngăn Vi ƀan cheăm Tân Hòa, tơring Ƀuôn Đôn ăm ‘nâi:  

“Pêi chiâk deăng châ rêm râ tơmâng khât tung mâu hơnăm hdrối, ‘no liăn mơjiâng pro tơmeăm khoăng kâng rơchôa tơniăn ai têa tôh mâu loăng plâi báu prá alâi xông dâi lĕm kơtóu plâi châ xo hên”.

 Xuân tiô kăn hnê ngăn cheăm Tân Hòa, kơnôm hơ’lêh hdrê pêt rôh apoăng hlo pơxúa tơ ƀrê  kơxô̆ liăn pêi lo riân rêm ngế tung cheăm tâk rĕng, châ 36 rơtuh liăn hơnăm 2022 luâ tơdroăng pơkâ 11%, tâk 13,8% tâng vâ pơchông ƀă hơnăm 2021. Kố cho xiâm vâ Đảng bộ, mâu kăn, kuăn pơlê cheăm Tân Hòa mơdêk rơdêi mơnhông cheăng kâ tung la ngiâ.

Tơdrêng ƀă cheăm Tân Hòa, mâu hơnăm achê kố tơdroăng cheăng kâ a cheăm Ea Wer, tơring Ƀuôn Đôn rế tơƀrê. Vâ tơdroăng rêh ối dêi kuăn pơlê tung pơlê rế mơnhông, Đảng  ƀô̆ mâu kăn cheăm hiăng tơmâng tŏng kum ăm kuăn pơlê ki hên cho rơpŏng kơtiê, rơpŏng vâ chê kơtiê, rơpŏng kơtiê xơpá pơtối châ mung liăn ing hngêi rak liăn kum mâu kơtiê ƀă kơxô̆ liăn tơdjêp pêi pro ing mâu tơdroăng pơkâ dêi tơnêi têa.

Tung mê ai liăn ing tơdroăng xăm kơtiê krá tơniăn vâ ‘no liăn cheăng pơ’lêh troăng rơhlâ pêi cheăng kâ, mơnhông pêt mâu hdrê loăng mơnăn păn ăm tơtro mơdêk pêi lo liăn, chôa lâng hluăn kơtiê. Nâ H’In Dy Niê, cheăm Ia Wer, tơring Ƀuôn Đôn ăm ‘nâi:

“Á sap ing hâi mung liăn rơpŏng hngêi a xúa kơxô̆ liăn mê pêt kơphế, rôe phon, rôe ro păn nôkố tơdroăng rêh ối hiăng chía kơdroh xơpá tâ ƀă hlối tơniăn tâ há’’.

Tiô pôa Y A Toan Êñuôl, Kăn hnê ngăn Đảng tơring Ƀuôn Đôn, vâ mơnhông cheăng kâ rêh ối tung tơring, mơnhông tơdroăng rêh ối dêi kuăn pơlê. Đảng ƀô̆, mâu kăn tơring ối tơmâng mơhnhôk tăng mâu khu ‘no liăn veăng mơjiâng pro troăng prôk, kâng rơchôa, hnhâng kơxái on tơhrik, pro hngêi trung. Nôkố troăng prôk a tơring Ƀuôn Đôn hiăng ai tiô tơdroăng kuăn pơlê vâ prôk lăm, pêi cheăng ƀă chơ tơmeăm tê mơdró.

Tơdroăng kố veăng kum mơnhông mơdêk tơdjuôm dêi kong pơlê. Hơnăm 2022, ki mơnhông cheăng kâ dêi tơring châ 8%, châ xo liăn ngân tơnêi têa luâ pơkâ. Tơdroăng mơjiâng thôn pơlê nếo châ tơmâng hnê mơhno, lâp tơring hiăng pêi châ 90 tơdroăng pơkâ, kơxô̆ rơpŏng kơtiê kơdroh ối 34%. Tung la ngiâ, Đảng ƀộ, mâu kăn tơring tơkăng kong Ƀuôn Đôn pơtối rak vế hnoăng cheăng pơkuâ, hnê mơhno tung mơjiâng mâu túa mơnhông cheăng kâ tơkŭm, tí tăng ‘nâi plĕng tơmeăm khoăng ai hlâu, ki rơdêi a tơring vâ mơjiâng kơpong tíu tơkăng kong rơdêi.

Pôa Y A Toan Êñuôl ăm ‘nâi:

“Mơhnhôk kuăn pơlê pêi pro tiô mâu pơkâ troăng rơhlâ dêi Đảng, luât dêi tơnêi têa. Rơtế tơrŭm ƀă mâu kơvâ cheăng xuân môi tiah Măt trâ̆n khu grup mơnhông cheăng kâ rêh ối tơniăn ‘na cheăng lêng kring gak pơlê cheăm dêi tơring xuân cho kơpong tíu tơkăng kong’’.

Ăm hlo kơnôm mơhnhôk pêi tro hnoăng cheăng pơkuâ hnê mơhno dêi Đảng  ƀă mơhnhôk mâu khu veăng ‘no liăn cheăng, mơjiâng tơmeăm khoăng, pơtối rak ki rơdêi tơrŭm môi tuăn tâi tâng hdroâng mơngế, râ ủy, mâu kăn ƀă mâu hdroâng kuăn ngo a tơring tơkăng kong Ƀuôn Đôn dế tơkŭm ivá, môi tuăn dêi rơpó tơkâ luâ xơpá, pơloăng mơnúa, mơ-eăm mơjiâng kơpong tơkăng kong Dak Lak rế ton rế kro mơdrŏng lĕm.