Hơnăm 2023, kơxô̆ liăn pêi pro Tơdroăng cheăng pơkâ dêi tơnêi têa mơnhông mơdêk kơpong kuăn ngo ƀă kong ngo xoăng ăm kong pơlê Quảng Nam lối 782 rơtal liăn. Tung hơnăm 2022 ƀă pái khế apoăng hơnăm 2023, tơdroăng tơbleăng pêi tơdroăng mê dế trâm xơpá. Ki xiâm cho mâu kơ koan Xiâm tơnêi têa hrá pơkâ hlá mơ-éa hnê pêi pro, mâu kong pơlê dế tơvâ tơvân ôh tá hlê tung tơdroăng tối tơbleăng mâu tơdroăng tơkêa bro.

Tiô pôa Nguyễn Công Thành, Kăn phŏ pơkuâ Tíu xiâm ngăn hnê hriâm ƀă hnê mơjiâng tuăn ngôa rơkê kong pơlê Quảng Nam, hên pơkâ, tơdroăng pơkâ pêi tiô luât pơkâ tŏng kum ƀă hok tro kong ngo a mâu Tơdroăng tơkêa ki kŭn ‘na  hnê hriâm tiô tơdroăng  pơkâ dêi tơnêi têa mơnhông cheăng kâ-rêh ối kơpong hdroâng kuăn ngo ƀă kong dêi kong pơlê ối hên tơdroăng hâi tro tơvâ tơvân:

“Tung 1 toăng hngêi trung hriâm, 1 lâm hriâm, hên hok tro ối ‘nân tơdjuôm  môi kơ ƀăng ƀă dêi rơpó  tung mê 1 ngế  châ xúa kơxô̆ liăn tŏng kum dêi Tíu xiâm tơnêi têa, 1 ngế châ xúa luât pơkâ tŏng kum dêi kong pơlê vâ tối ôh tá tơtro. Ngin pâ thế ‘mâi hơ’lêh luât pơkâ ki mê pro ti lâi vâ luât pơkâ ăm xúa mê châ tơdâng tơ‘mô’’.

Pôa Lê Văn Dũng, Kăn phŏ hnê ngăn Đảng ủy kong pơlê Quảng Nam tối ‘na mâu tơdroăng ki xơpá a mâu kong pơlê kong ngi drêng tơbleăng mâu tơdroăng tơkêa bro ki kŭn môi tiah kơxô̆ rơpŏng ki lối kơtiê ó, tơdoăng rêh ối dêi kuăn pơlê ối trâm hên xơpá mê tơdroăng hbrâ vâ pêi pro drêng tơbleăng tơdroăng tơkêa bro gá pá. Tơdrêng bă mê ivá, tơdroăng lâm hriâm ki rơkê thế dêi mâu kăn ƀô̆ ki pêi cheăng a kơpong kong ngo hâi ai tiô tơdroăng púi vâ tung tơdroăng tơbleăng pêi pro mâu tơdroăng tơkêa pro ki kŭn.

Pôa Lê Văn Dũng pâ thế:

“Mê pro tơ’lêi hlâu mâu hlá mơ-éa chêh tung tơdroăng tơbleăng pêi xua mâu hlá mơ-éa pro mê gá hên tơvâ tơvân. Tơdroăng cheăng ki klâi chiâng xoăng râ ăm râ kong pơlê, râ tơring, thăm nếo râ cheăm mê Tíu xiâm thế ai pơkâ troăng rơhlâ vâ xoăng râ’’.

Tối tơbleăng a rôh pêi cheăng, pôa Hầu A Lềnh, Ngế xiâm - Ngế pơkuâ Vi ƀan ngăn kuăn ngo tơmâng xo mâu tơdroăng ki kuăn pơlê pâ mê, tơdroăng ki kong pơlê Quảng Nam pâ tối mê. Hên tơdroăng xơpá tơvâ tơvân nếo ai tung tơbleăng pêi Tơdroăng pơkâ dêi tơnêi têa mơnhông cheăng kâ-rêh ối kơpong hdroâng kuăn ngo ƀă kong ngo kô châ Khu kăn pêi hnoăng cheăng pơtroh ăm Chin phuh rĕng ai troăng rơhlâ tah ki xơpá.

Pôa Hầu A Lềnh pơkâ thế kong pơlê Quảng Nam kal hbrâ tơrŭm ƀă krá nhên ƀă  mâu Khu xiâm, kơvâ cheăng xiâm Tơnêi têa tung tơdroăng tah ki xơpá, ‘mâi hơ’lêh luât pơkâ tŏng kum:

“Tơdroăng klâi cho hnoăng cheăng dêi tíu xiâm mê tíu xiâm thế pêi pro, thế tah lôi. Ngế pro xiâm hnê ngăn Chin phuh hiăng pơcháu ăm mâu Khu xiâm, kơvâ cheăng tơkŭm ‘mâi rơnêu. Ai 3 khu tơdroăng cheăng thế pêi: Khu má môi cho tah ki xơpá, khu má 2 cho tơleăng mơnhên mâu tơdroăng vâ tơvâ tơvân ƀă khu má 3 cho tơ’nôm mâu tơdroăng ki lâi hâi teăm ai”.