Hlo mâu tơdroăng, tung pơla achê kố yă báu phái to kơnâ, rế pro pơxúa kân ăm tơnêi têa ki tê phái ngi kong têa ê dêi Việt Nam, pro pơxúa hơniâp ăm kuăn pơlê ki pêi chiâk. Laga, kố xuân cho tơdroăng ki tô tuăn dêi mâu ngế ki roê ƀă kơdroh tung tơdroăng ki tê phái ngi kong têa ê, Lê Thị Song An, ngế ki lo ing Long An êng:

"Yă báu pơtối to kơnâ a mâu kong pơlê ki ai roê ‘măn báu phái hên, pro ôh tá tơniăn tơdâng tơ’mô tơdroăng ki tê ƀă roê hên khât, mơdêk yă báu phái kố tâk kơbâ ôh tá tro ƀă xuân cho tơdroăng ki tô tuăn dêi mâu ngế ki roê, kŏng nhân drêng yă phái to kơnâ.

Tơdroăng kố chiâng tơdjâk troh mâu tơdroăng ki ôh tá tơniăn tung tê ngi kong têa ê, tá hâi bro châ tơdroăng ki tơrŭm krá ton pơla kuăn pơlê ƀă khu mơdró kâ. Xua mê, jâ pâ thế Ngế xiâm ngăn chiâk deăng ăm ‘nâi troăng hơlâ pêi pro ki nhên, tơƀrê vâ rế rak vế tro ƀă rak vế tơniăn kế kâ tơnêi têa, rế mơdêk pêt, tê phái ngi kong têa ê krá ton tro tiô hnê mơhno dêi Ngế pro xiâm hnê ngăn Chin phuh”.

Pôa Lê Minh Hoan, Ngế xiâm ngăn chiâk deăng ƀă mơnhong thon pơlê ăm ‘nâi, kơtăn kố ai 10 hơnăm mê túa pơkâ tơnêi pêt báu klâng a tơnêi têa pin dâng 4 rơtuh ha. Nôkố tiô tơdroăng ki riân ngăn tơnêi pêt báu ối 3,93 rơtuh ha. Tiô Pơkâ Kuô̆k hô̆i ƀă Pơkâ dêi Chin phuh cho xúa rơkê 5 rơtuh ha tơnêi vâ pêt báu.

Ngế xiâm ngăn ‘na chiâk deăng tối nhên, rơkê akố ai pơxúa cho vâ rak tơniăn bê tŭm kế kâ ƀă vâ mơnhông mơdêk cheăng kâ rêh ối pơlê pơla mê xuân athế ‘măn chôu môi kơpong tơnêi pêi chiâk deăng, tung mê, ai klâng báu. Pôa Lê Minh Hoan, ngế xiâm ngăn ‘na chiâk deăng ƀă mơnhông thôn pơlê ăm ‘nâi, túa pơkâ klâng báu ối tung túa pơkâ tơnêi tơníu ƀă xua Khu xiâm ngăn kế tơmeăm khoăng tung têa, a tơnêi ƀă hyôh kong prâi pôu râng dêi hnoăng cheăng.

Tung pơkâ dêi mâu kong pơlê xuân hiăng pơkâ ‘na ƀăng tơnêi klâng báu, mơnhên nhên xoăng kơpong ăm tơnêi pêi chiâk deăng”

"Tung pơla mơnhông mơdêk cheăng kâ rêh ối pơlê pơla mâu kong pơlê kal tơmiât nhên tơnêi ki pêi chiâk deăng, drêng hơ’lêh tơnêi pêt báu ối ai hên tơdroăng ki tơdjâk troh peăng kơ’nâi mê môi tiah ‘na báu, pêi lo liăn dêi kuăn pơlê pêi chiâk xuân môi tiah kơvâ kế tơmeăm ƀă hên ki ê. Khu xiâm ngăn ‘na chiâk deăng ƀă mơnhông thôn pơlê kô mơ-eăm rơtế ƀă mâu kong pơlê vâ tơpui tối leăng mâu tơdroăng drêng lâi hơ’lêh, drêng lâi ôh tá chiâng hơ’lêh ƀă tơdroăng pơkâ tơmiât nhên pơla mơnhông ƀă rak vế tơnêi pêt báu”.

Ai mâu rơkong tơpui tối tiah kố, rak vế tŭm kế kâ tơnêi têa athế tơtro ƀă tơdroăng pơkâ cheăng kâ liăn ngân, rak tơniăn bê tŭm kế kâ tung mâu tơdroăng cheăng, ôh ti xê tơkŭm tung mâu tơdroăng ki ai hlâu, ivá châ pơxúa mê ối rak tơniăn tơdâng trếo lĕm, tơniăn krúa kế kâ, pơkâ thế ngế xiâm ngăn chiâk deăng ƀă mơnhông thôn pơlê ăm ‘nâi Khu xiâm hiăng tơbleăng mâu tơdroăng pêi pro nhên tiah lâi?

Tiâ rơkong kơ-êng kố, pôa Lê Minh Hoan, ngế xiâm ngăn ‘na chiâk deăng tối ăm ‘nâi:

“Bê tŭm kế kâ ôh ti xê cho to báu phái mê ối cho tâi tâng mâu túa pôm prá alâi vâ mơjiâng bro ai trếo đạm ăm kuăn mơngê rêh ƀă tá mâu kế kâ mơdrăn chĕm mơnăn mơnoâ, alâi plâi pôm pơrá châ mơjiâng. Tơdroăng ki châ xúa pin athế mơdêk khât tơdroăng rêh ối ăm vâi krâ nhŏng o ƀă hên tơdroăng pơkâ dêi tơnêi têa vâ ai tŭm ivá châ roê kâ, ôh ti xê hmôu pơ mơhnhôk vâi krâ nhŏng o pêt alâi a chiâk a deăng mê mâu ki mê tá hâi cho mâu tơdroăng pơkâ ki ton xŏn.

Xua cho pêi lo liăn ƀă tơdroăng rêh ối ing hên troăng hơlâ pơkâ dêi 3 tơdroăng ƀă mâu troăng hơlâ tŏng kum Khu xiâm ngăn chiâk deăng ƀă mơnhông thôn pơlê ‘na pêt mâu hdrê loăng ki ê a kơdâm loăng vâ mơdêk pêi lo liăn”.

Tiâ rơkong kơ-êng ‘na troăng hơlâ pro tơrŭm pêt ƀă xúa kế tơmeăm pêi lo dêi pôa Phạm Hùng Thắng, ngế lo ing Hà Nam, pôa Lê Minh Hoan, ngế xiâm pơkuâ tối, pêi pro tơrŭm tiô tơdroăng pơkâ cho tơdroăng tung la ngiâ dêi kơvâ pêi chiâk deăng vâ hơ’lêh tơdroăng ki pêi iâ êt, hmôu pơ pêi xêh dêi kơvâ pêi chiâk deăng. Tơdroăng pơkâ mơ’no cho mơdêk ki krá tơniăn dêi mâu tơdroăng tơrŭm kố tung la ngiâ.

Tung la ngiâ ah, Khu xiâm kô rơtế prôk ƀă mâu kong pơlê vâ mơjiâng mâu túa pơkâ pêi tơdâng tơ’mô ƀă pêi klêi tâ ƀă rơtế ƀă mâu ngế xiâm, mâu khu ki hriăn ‘na khoa hok, mâu khu mơdró kâ tơdjâk vâ mâu tơdroăng mơnhông krá tơniăn tâ. Tơpui mơgêi rôh hôp kơ-êng ƀă tiâ mơnhên a rôh hôp má 25 dêi Vi ƀan pơkuâ Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i mơnhên tối hên tơdroăng ki ối trâm ƀă dế bro kuăn pơlê hêng hôu hiăng teăm châ séa ngăn, pơkâ tơleăng.

“Á tơngah tiah kố, ƀă mâu troăng hơlâ ki mâu Khu xiâm pơkuâ hiăng tơhrâ, ƀă khŏm mơ-eăm khât dêi khu pú hên Chin phuh, tơdroăng rơtế prôk dêi Kuô̆k hô̆i, mâu kăn Kuô̆k hô̆i, kơvâ cheăng pơkuâ ngăn ối tung hnoăng cheăng pôu râng dêi Khu xiâm mơjiâng luât kô ai hên tơdroăng ki hơ’lêh khât, mơeăm tâk troh a tơdroăng nếo, mot tung mâu tơdroăng ki ai khât, malối cho tung pơla dế trâm, pơkâ thế hnoăng cheăng rế hía rế hên tiô Pơkâ kơxô̆ 27 dêi Tíu xiâm Đảng; kơvâ pêi chiâk deăng tơkâ luâ xơpá, pơloăng mơnúa, pơtối cho ivá krá rơdêi ăm kơvâ pêi chiâk deăng nôkố, mot tơrŭm ƀă kong têa ê hmâ ƀă tơdroăng kong prâi hơ’lêh.