Kố cho tơngah dêi Kăn hnê ngăn pơlê kong kơdrâm Ƀuôn Ma Thuột, kong pơlê Dak Lak a tơdroăng trâm mâ, khĕn kơdeăn sinh viên, droh rơtăm hdroâng kuăn ngo ƀă loi tĭng tiô khôp hơnăm 2024 po kơxo hâi lơ 31/1.

A kơtôu hlá mơ-éa, mâu kăn trâm mâ ƀă tơmâng mâu tơdroăng tơpui tối tơdrăng tơná tơmiât, púi vâ dêi mâu sinh viên ƀă droh rơtăm kuăn ngo, mâu khu loi tĭng tiô khôp. Kố cho mâu ngế ki ai hnê hnoăng hriâm rơkê, mơ-eăm hriâm vâ pêi cheăng. Vâi xuân cho mâu ngế teăng mâ mâu droh rơtăm tung kong pơlê tối mâu tơdroăng ‘na luât pơkâ, luât tŏng kum ƀă mâu sinh viên, droh rơtăm kuăn ngo púi vâ sinh viên, droh rơtăm châ kơjo kum ăm mung liăn , kum ăm vâi tơ’lêi tăng cheăng pêi.