Hô̆i đong xing xoăng kơpong Tây Nguyên cho khu tơrŭm ki tơdjâk xua Ngế pro xiâm hnê ngăn Chin phuh pơkâ mơjiâng, pêi pro mâu kơvâ cheăng ki ai tơdjâk troh hriăn ngăn, hnê mơhno, xing xoăng, pơkâ tơleăng mâu tơdroăng ki kal dêi kơpong, khu tơrŭm kơvâ cheăng ‘na tơrŭm kơpong, mơnhông krá tơniăn kơpong Tây Nguyên.

Rôh hôp kố hiăng mơdoh hên chôu tơpui tơno, tơpui tối leăng, mơnhên tối mâu troăng hơlâ tŏng kum mơnhông mơdêk cheăng kâ rêh ối pơlê pơla kơpong Tây Nguyên ƀă pơkâ mơ’no mâu kơvâ cheăng, troăng hơlâ tŏng kum ki xiâm ăm kơpong.

Pơchuât tơbleăng dêi Khu xiâm pơkâ ƀă ‘no liăn cheăng, tối rơdêi: Tây Nguyên cho kơpong tơdroăng cheăng tung la ngiâ malối kal khât ‘na tơdroăng kal kí, cheăng kâ, mơhno túa lĕm tro, pơlê pơla, gâk kring cheăm bêng, gâk kring dêi lâp tơnêi têa, tíu ki vâ chê 6 rơtuh ngế ối tung tâi tâng 54/54 hdroâng kuăn ngo nhŏng o tung lâp tơnêi têa rêh ối.

Tây Nguyên hiăng pêi châ tơƀrê hên mâu tơdroăng ki kal, môi tiah GRDP rêm ngế hơnăm 2022 tâk 11 hdroh tâng pơchông ƀă hơnăm 2002, ki têi ‘na mơdêk tâi tâng kế tơmeăm a kơpong rêm hneăng hơnăm 2002 – 2020 châ vâ chê 8%/hơnăm ƀă hên má môi tâng pơchông ƀă mâu kơpong ƀă hên tơdroăng ki ê; la, túa pơkâ cheăng kâ kơpong Tây Nguyên ối ai mâu tơdroăng ki tá hâi tơƀrê, ối ‘ro, mơnhông tá hâi tơxâng ƀă ki ai hlâu, ki pơxúa, môi tiah GRDP rêm ngế xuân ối a kơlo ki iâ má môi tung 6 kơpong cheăng kâ rêh ối pơlê pơla, tá hâi ai kong pơlê ki lâi tung kơpong kố pro tơdâng xêh liăn ngân, tơ’mot ‘no liăn cheăng tơdrêng dêi kong têa ê ối iâ, kơdroh kơtiê tá hâi krá ton, kơxô̆ rơpŏng kơtiê ối hên, mơni vêh kơtiê nếo tung la ngiâ; kơtăn pơla kro – kơtiê pơla mâu khu hdroâng kuăn ngo hrá châ kdroh.

Tơdroăng ki lăm rêh ối hmâng vâ mot ối a Tây Nguyên rế hía rế ôh tá tơniăn; tơnêi pêi kâ, tơnêi ối dêi hdroâng kuăn ngo hrá châ pơkâ tơleăng. Kơxô̆ kong pro xâp rơngiâp kơdroh hên ƀă ôh tá châ tiô tơdroăng pơkâ mơ’no; kong ki chiâng xêh kơdroh tá loăng ƀă ƀăng tơnêi. Têa mơni kô xiâ, tơdroăng kong tô mơdrăng khăng khoăng kô ôh tá tơniăn. Hên kế tơmeăm ki kơnía git ‘na mơhno túa lĕm tro hdroâng kuăn ngo mơni kô tro hía lôi, tá hâi châ pơkâ tơleăng tro tơrŭm cheăng pơla rak vế ƀă mơnhông. Tơrŭm tung kơpong ƀă tơrŭm ƀă kơpong ki ê tá hâi krá tơniăn, ối ai tiô tơdroăng pơkâ, tá hâi pêi pro châ tiô tơdroăng pơkâ thế mơnhông ƀă hên ki ê.

Môi tơdroăng ki bro Lâm Đồng tối krê, mâu kong pơlê kơpong Tây Nguyên tối tơdjuôm dế ối châi ko, mê cho tơdroăng ki pơkuâ ngăn, xúa tơnêi ai xiâm kối ing pêi chiâk deăng pêt kong trâm hên xơpá ƀă hlo ôh tá tơniăn, pro mơhrê tê kơtê kế tơmeăm tung kong. Tơdroăng kố kal ai túa pơkâ tơdjuôm, môi tuăn vâ pơkâ tơleăng.

Pôa Trần Văn Hiệp, Kăn hnê ngăn Vi ƀan kong pơlê Lâm Đồng ăm ‘nâi:

“Tơnêi ai xiâm kối sap ing tíu ki pêt kong tối tơbleăng cho dế ôh tá tro tung pơkâ tơleăng. Nôkố kuăn pơlê hdi xo, mơjiâng bro hngêi ối, ăm mung ôh tá tro tiô luât pơkâ ƀă dế pro hơ’lêh tơnêi tơníu, mơhrê tê kơtê. Tơdroăng kố kal ai tơdroăng ki kơhnâ, pơkâ tơleăng tro pơkâ vâ ai tơdroăng ki môi tuăn pơla khu pơkuâ ngăn kong pơlê mê kal rĕng ai troăng hơlâ hnê mơhno, sap ing Khu xiâm ngăn ‘na Chiâk deăng ƀă Mơnhông thôn pơlê veăng tí tăng ‘nâi ăm Chin phuh, mê nếo Khu xiâm ngăn Chiâk deăng ƀă Mơnhông thôn pơlê hriăn ngăn veăng tơ’nôm vâ ngin pơkâ tơleăng klêi hlối tơdroăng kố, malối cho ƀă mâu rơpŏng ki hiăng tơdah xo rak ngăn sap ing hdrối nah troh nôkố”.

Hô̆i đong Xing xoăng kơpong Tây Nguyên châ mơjiâng cho vâ hơ’lêh nếo troăng hơlâ xing xoăng kơpong, mơdêk cheăng kâ rêh ối pơlê pơla dêi kơpong mơnhông mơdêk rĕng, krá tơniăn, rak vế kong prâi tơnêi tơníu ƀă rak vế pơlê pơla cheăm bêng – gâk kring; cho tơkŭm tơrŭm kơvâ cheăng ki ai tơdjâk pêi pro tơdroăng cheăng kum Ngế pro xiâm hnê ngăn Chin phuh hriăn ngăn, hnê mơhno, xing xoăng, pơkâ tơleăng mâu tơdroăng cheăng ki kal, khu tơrŭm ‘na tơrŭm kơpong, mơnhông krá tơniăn kơpong Tây Nguyên.

Tơdroăng pơkâ 23/NQ-TW hâi 6/10/2022 dêi Khu xiâm pơkuâ tơdroăng kal kí hiăng mơnhên mơnhông kơpong Tây Nguyên athế tiô troăng tơrŭm kơpong, tung kơpong, xua mê pakĭng mơjiâng bro tơdâng tơ’mô hngêi trăng, troăng klông, pêi chiâk deăng, ôm hyô, mơhno túa lĕm tro rêh ối pơlê pơla mâu kong pơlê tung kơpong xuân kal tơkŭm mơdêk ki rơkê tung pơkâ, rak tơniăn tí tăng mâu tơdroăng châ tơƀrê mâu kơxô̆ liăn, mơdêk khât mâu kế tơmeăm ki ai hlâu, ki pơxúa dêi kong pơlê tơná.

Tơpui mơgêi rôh hôp, pôa Trần Lưu Quang, Ngế pro xiâm phŏ hnê ngăn Chin phuh, Kăn hnê ngăn Hô̆i đong xing xoăng kơpong Tây Nguyên tối tiah kố rôh hôp kố châ ngăn cho tơdroăng ki pơxiâm vâ tơpui tơno túa ki châ xúa ki nếo, mơjiâng túa pơkâ, troăng hơlâ pêi pro ai pơxúa, tơƀrê, maluâ hrá la krá. Tung mê, athế rĕng mơjiâng châ troăng hơlâ pơkâ ki kal ăm tâi tâng kơpong vâ tung tơdroăng mê kô tŏng kum mâu tơdroăng ki xơpá, bro ivá mơdêk kơpong Tây Nguyên mơnhông.

“Rơtế ƀă mâu vâi pú mơjiâng môi troăng hơlâ pêi pro krê, xiâm dêi kơpong kố vâ ai tơdroăng ki tơniăn lĕm ƀă mơnhông. Tơkŭm ki hdrối tâ cho tung 3 tơdroăng, mê cho tơdroăng ki tơdjêp troăng prôk pơla 5 to kong pơlê tung kơpong ƀă mâu kơpong ki a chê. Má péa, cho tơrŭm tơkŭm tơ’mot ‘no liăn cheăng ƀă hiâm mơno ki pơxúa tung kơpong gá hên tâ. Tơdroăng ki má 3 cho tơtrŏng troh tơdroăng pơkâ dêi tơnêi têa, kô mơdêk rơdêi, pêi klêi tung 2 hơnăm ki u ối vâ pêi klêi tiô túa pơkâ mơ’no.

Pôa Trần Lưu Quang, Ngế pro xiâm phŏ hnê ngăn tơnêi têa xuân pơchân mâu kong pơlê kal rĕng pêi pro klêi mâu túa pơkâ ƀă túa pơkâ kơpong, tơmâng troh tơdroăng ki tơdjâk troh tơnêi tơníu ƀă kong prâi pro hơ’lêh. Tơdrêng amê, hlối mơdêk hnoăng cheăng pơkuâ ngăn kong, mơdêk kơlo liăn ăm tơdroăng ki tơdah xo rak ngăn kong vâ kuăn pơlê ai tơ’nôm pêi lo. Tơtrŏng mơdêk tơdroăng cheăng hơ’lêh kơxô̆, mơdêk tê mơdró kế tơmeăm, tê mơdró kế tơmeăm pêi lo ing chiâk deăng ing măng internet.