Pôa Nguyễn Khắc Định, Kăn phŏ hnê ngăn Kuô̆k hô̆i ăm ‘nâi, mâu luât châ Kuô̆k hô̆i tơbleăng hiăng teăm pơhlêh troăng hơlâ pêi pro dêi Đảng ‘na mơjiâng ƀă pro klêi troăng hơlâ tŏng kum, teăm tŏng kum tơdrêng mâu tơdroăng xơpá, pro tơ’lêi hlâu má môi ăm kuăn pơlê, khu mơdró kâ. Vi ƀan pơkuâ Kuô̆k hô̆i pơkâ thế Chin phuh, mâu kơ koan ối tung Chin phuh teăm pơkâ túa tơbleăng pêi pro luât, tơdroăng pơkâ.

Malối cho rĕng bro, pơkâ hlá mơ-éa pơkâ ‘na 104 tơdroăng kal Luât pơcháu Chin phuh, mâu Khu xiâm pơkâ nhên, hnê mơhno pêi pro Luât tơnêi tơníu (‘mâi hơ’lêh):

“Pơtối pơkâ ƀă tơbleăng túa pơkâ nhên vâ rĕng ăm mâu troăng hơlâ tŏng kum pơkâ tung mâu luât, tơdroăng pơkâ dêi Kuô̆k hô̆i tung tơdroăng rêh ối. Malối cho mâu troăng hơlâ pơkâ ki nếo, ki kal, mâu troăng hơlâ pơkâ ki châ xêt khât rĕng tâ tâng pơchông ki xêt khât tơdjuôm dêi Luât. Rĕng mơjiâng ƀă pơkâ tiô hnoăng pơkuâ mâu hlá mơ-éa pơkâ nhên, hnê mơhno pêi pro ƀă vâ chê 400 tơdroăng kal châ pơcháu tung mâu luât ƀă tơdroăng pơkâ. Rak vế tơdroăng ki tro, má môi, tơ’mô ƀă mâu hlá mơ-éa luât ki ai tơdjâk, pôi tá ăm ôh tá tơdrăng, chiâng ai tơ’nôm mâu tơdroăng ki xơpá tung tơkŭm pêi pro”.

Pôa Trần Lưu Quang, Ngế pro xiâm phŏ hnê ngăn Chin phuh ăm ‘nâi, klêi kơ’nâi mơgêi mâu hneăng hôp dêi Kuô̆k hô̆i, mâu khu xiâm, kơvâ cheăng, kơ koan tơdâng khu xiâm pơkuâ chêh bro mâu luât, tơdroăng pơkâ hiăng tí tăng ‘nâi plĕng pơtroh ăm Ngế pro xiâm hnê ngăn Chin phuh pơkâ lơ pơkâ tiô hnoăng pơkuâ mâu Túa pơkâ vâ tơbleăng pêi pro mâu luât, tơdroăng pơkâ châ Kuô̆k hô̆i tơbleăng:

“Vâ pơkâ nhên mâu luât pơkâ châ tơbleăng a hneăng hôp má 6 ƀă hneăng hôp ki ôh tá tối hdrối rôh má 5, Chin phuh, Ngế pro xiâm hnê ngăn Chin phuh, mâu Ngế xiâm pơkuâ, ngế pơkuâ kơ koan tơdâng khu xiâm ai hnoăng pơkâ 56 hlá mơ-éa, 29 tơdroăng pơkâ, 5 Pơkâ ƀă 22 Hlá mơ-éa tơbleăng vâ pơkâ nhên 10 luât ƀă tơdroăng pơkâ. Nôkố mâu khu xiâm châ pơcháu chêh bro hlá mơ-éa dế tơbleăng pêi pro tro tiô pơkâ dêi Luât Pơkâ hlá mơ-éa luât ƀă khŏm mơeăm vâ rak tơdroăng ki bro ƀă ki rơkê dêi hlá mơ-éa”.

Pôa Lê Minh Ngân - Ngế xiâm phŏ ngăn tơmeăm khoăng tung têa a tơnêi ƀă hyôh kong prâi ăm ‘nâi: Luât Tơnêi tơníu (‘mâi hơ’lêh) ai hên tơdroăng kal nếo bro pơxúa tơƀrê veăng kum tung tơdroăng vâ pêi klêi troăng hơlâ tŏng kum, troăng hơlâ mơdêk tơƀrê pơkuâ ngăn ƀă xúa tơnêi tơníu. Klêi kơ’nâi Luât châ pơkâ Khu xiâm hiăng tơkŭm pêi klêi mâu hlá mơ-éa pơkâ nhên, hnê mơhno pêi pro luât tiô hnoăng pơkuâ:

“Ƀă Luât tơnêi tơníu, Kăn xiâm ngăn tơmeăm khoăng tung têa, a tơnêi ƀă hyôh kong prâi châ xoăng pơkuâ chêh hro 10 hlá mơ-éa, tung mê ai 6 tơdroăng Pơkâ ƀă 4 Hlá mơ-éa tơbleăng. Nôkố mâu kơ koan dế rĕng mơjiâng tro tiô tơdroăng, pơkâ dêi Luât Pơkâ hlá mơ-éa pơkâ luât, vâ pơkâ tiô hnoăng pơkuâ lơ pơtroh ăm râ ki ai hnoăng pơkuâ tung khế 5 hơnăm 2024. Krê ƀă tơdroăng pơkâ ‘na tơdroăng ki hdi têa kơxĭ kô châ tơbleăng tung khế 3 hơnăm 2024 tiô troăng ki ‘nâng ‘nâi vâ châ tơƀrê pêi pro ing hâi lơ 1 khế 4 tiô tro ki xêt khât hiăng châ pơkâ tung Luât”.

Vâ mơdêk tơƀrê tơdroăng tơbleăng, pêi pro mâu Luât, tơdroăng pơkâ, Vũ Hồng Thanh, ngế pơkuâ Vi ƀan Cheăng kâ pâ thế Chin phuh séa ngăn kơtăng hnê mơhno tơdroăng pơkâ mâu hlá mơ-éa pơkâ nhên pêi pro luât tung hơnăm 2024, rak tơniăn tơdroăng chêh bro, rơkê, tơdâng ƀă mâu luât ki ai tơdjâk troh nếo châ Kuô̆k hô̆i tơbleăng môi tiah Luât Tơnêi tơníu, Luât Tê mơdró hngêi trăng tơnêi tơníu, Luât Mâu khu tơrŭm ăm mung liăn:

“Ƀă Luât tơnêi tơníu, Luât Tê mơdró hngêi trăng tơnêi tơníu, Chin phuh hnê mơhno kơtăng tơdroăng pơkâ mâu hlá mơ-éa pơkâ nhên pêi pro luât tung hơnăm 2024; rĕng pơcháu hnoăng cheăng tro ƀă tơdroăng ki pro nhên pêi klêi rak tơniăn mâu hlá mơ-éa kố; teăm xing xoăng ƀă hbrâ rơnáu mâu tơdroăng rak vế tơniăn ăm tơdroăng ki pêi pro Luât Tơnêi tơníu, Luât Tê mơdró hngêi trăng tơnêi tơníu ƀă mâu hlá mơ-éa pơkâ nhên; teăm pêi pro châ tơdroăng pơkâ thế tung tơdroăng ki ai khât, mơdêk tơƀrê pơkuâ ngăn ƀă xúa tơnêi tơníu môi tiah tơdroăng ki vâ pơkâ mơ’no drêng chêh bro Luât; hnê mơhno, séa ngăn mâu hlá mơ-éa tung luât ki ê ai tơdjâk troh pâ thế ‘mâi rơnêu, ‘mot tơ’nôm, tâng kal”.