Hluâ 5 hơnăm pơkâ pêi pro, tơrŭm cheăng tiô tơdroăng hnê mơhno, tơdjâ thế tâi tâng kuăn pơlê kring vế, gak ngăn tơdroăng rêh ối tơnêi têa pơla khu lêng Kŏng an ƀă mâu khu râ Kŏng đoân hiăng kum pro hơ’lêh ó rơdêi ‘na hlê plĕng, hiâm mơno pôu râng hnoăng cheăng dêi kăn ƀô̆, mâu lêng, mơngế pơkuâ, mơngế pêi cheăng dêi 2 kơvâ cheăng.

Tơpui mơgêi a roh hôp mê, pôa Lê Quốc Hùng, Ngế xiâm phŏ ngăn Kŏng an hiăng pâ thế Khu Kŏng đoân ƀă Kŏng nhân, mơngế pêi cheăng tung lâp tơnêi têa kal pơtối tơrŭm krá tơniăn tâ ƀă khu râ Kŏng an kơhnâ khât tung veăng blong plâ, mơdât, tơplâ ƀă khu ngế ki pro xôi, khu ki pro ‘mêi pơlê pơla, hôu khĕn, tơplâ mơdât mâu khu ngế ki pro xôi luât, thăm mơdêk hnoăng cheăng tâi tâng kuăn pơlê veăng kring vế, gak ngăn tơdroăng rêh kâ ối tơnêi têa.