Tung 2 hâi, lơ 11 ƀă 12/5, a kong pơlê Dak Lak, po Rôh hôp hnê hriâm hnoăng cheăng pêi pro troăng hơlâ ƀaoh hiêm pơlê pơla, ƀaoh hiêm ôh tá ai cheăng pêi kơpong peăng Hdroh. A Rôh hôp, lối 300 ngế kăn ƀô̆, khu ki rơkê ‘na ƀaoh hiêm pơlê pơla kơpong peăng hdroh tơmâng mâu khu ki cheăng ‘na mâu tơdroăng Pơkâ nếo ƀă pơchân mâu tơdroăng ki kal vâ tơkŭm pêi pro môi tuăn mâu troăng hơlâ ƀaoh hiêm pơlê pơla, ƀaoh hiêm ôh tá ai cheăng pêi; hnoăng cheăng séa ngăn pơkâ mâu kơxô̆ ngế, kơxô̆ liăn athế mơdrếo hơnăm 2022.

Mâu kăn hiăng tơpui tơno, veăng tơpui tối tung mâu kơxop hlá mơ-éa ‘na hnoăng cheăng pơtê ‘no hrê liăn, túa pơkâ tơleăng châ kâ liăn ing mâu tơdroăng tŏng kum ƀaoh hiêm pơlê pơla, ‘no mơhá liăn ôh tá ai cheăng ƀă hlá mơ-éa hnê mơhno mâu tơdroăng pơkâ nếo.

Rôh hôp kố xuân tơpui tơno ‘na túa ki xo ƀaoh hiêm pơlê pơla môi hdroh tung kơxop hlá Luât ƀaoh hiêm pơlê pơla ki ‘mâi hơ’lêh dế mơ’no tối xo mâu rơkong tơpui tối dêi mâu rơxông kuăn pơlê. Tiah mê, túa pơkâ ăm phêp ngế pêi cheăng xo 50% kô rak tơniăn ki hơniâp lĕm ‘na hnoăng pơxúa ăm ngế ki pêi cheăng.