Hâi lơ 15/5, a Cần Thơ hiăng po Rôh hôp khoa hok ƀă inâi “Pêi klêi luât tơnêi tơníu tung chal mot tơrŭm cheăng”. Rôh hôp ai lối 35 ngế ki veăng tơpui tối lo ing mâu khu ki rơkê plĕng, khu ki hriăn ngăn mơjiâng troăng hơlâ luât tung kơvâ tơnêi tơníu.

Rôh hôp tơkŭm tung mâu tơdroăng ki dế châ tơmâng ngăn dêi kuăn pơlê xuân môi tiah rêm râ pơkuâ cheăng môi tiah túa pơkâ, túa ki xúa tơnêi; xo tơvêh tơnêi, chêl thiê̆n tơnêi, tŏng kum tơnêi, pro tíu kuăn pơlê ối ƀă mơđah tơbleăng xúa hnoăng rak xúa tơnêi; Tơdroăng ki xúa tơnêi, Liăn ngân tơnêi, yă tơnêi ƀă pơkâ tơleăng tơdroăng ki tơxup tơbriât, pơsăm tối, pơsăm tơkêng ‘na tơnêi ƀă hên ki ê.

Ƀă mâu rơkong tơpui tối tơdrăng, mâu ngế ki veăng tơpui tối a rôh hôp hiăng pêi pro nhên hnoăng cheăng dêi mâu kơ koan tung túa pơkâ xúa tơnêi; po rơdâ hnoăng ăm ngế ki xúa tơnêi châ pơxúa troăng hơlâ chêl thiê̆n, tŏng kum tơnêi bro tíu kuăn pơlê ối; tơdroăng ‘na luât pơkâ tung pơkuâ ngăn yă tơnêi tiô tơdroăng pơkâ kơchơ mơdró; tơdroăng ôh tá tơniăn ƀă tơdroăng ki pơkâ tơleăng tung tơxup tơbriât tơnêi ƀă hên ki ê.