Troh nôkố, hồ sơ kơxop hlá mơéa Luât Tơnêi tơníu ki ‘mâi hơ’lêh hiăng hơ’lêh, tơkŭm tâi tâng tơdroăng Pơkâ 18 dêi Tơnêi têa, séa ngăn tung tơdroăng Luât, Cương lĩnh dêi Đảng ƀă khu pơkuâ tơdroăng luât nôkố.

Tơpui a rôh hôp, Kăn xiâm hnê ngăn Kuô̆k hô̆i Vương Đình Huệ pơkâ thế tơkŭm tung mâu tơdroăng ki ối ai rơkong tơpui tối phá ra phá dêi pó: xo tơvêh tơnêi vâ pro tơdroăng tơkêa hngêi ối, tơdroăng tơkêa ‘na hngêi ối; Túa pơkâ yă tê tơnêi, hnoăng pơkuâ, hnoăng cheăng pôu râng rah xo túa pơkâ yă tơnêi; Kơxop hlá mơ-éa bro liăn tơnêi, liăn mơjiâng tơnêi têa, hơ’lêh túa ki xúa tơnêi. Kăn xiâm hnê ngăn Kuô̆k hô̆i tối nhên mâu tơdroăng kố kal châ hriăn ngăn nhên hdrối vâ pơtroh ăm Kuô̆k hô̆i ngăn, tơbleăng Luât tơnêi tơníu ki ‘mâi hơ’lêh a Hneăng hôp ki ôh tá tối hdrối rôh má 5.

 ‘Na kơxop hlá mơ-éa Luât Mâu khu tơrŭm ăm mung liăn ki ‘mâi hơ’lêh, Kăn xiâm hnê ngăn Kuô̆k hô̆i tối nhên kố xuân cho tơdroăng tơkêa Luât ki kal, tơdjâk trâu rơdâ troh liăn ngân, tơniăn ‘na cheăng kâ kân; tơniăn, gâk kring, ‘na liăn ngân tơnêi têa. Pơkâ thế pơtối pêi klêi kơxop hlá mơ-éa Luât vâ rak vế tơniăn kơxop hlá mơ-éa Luât ing tơdroăng ki rơkê tro má môi, tâi tâng ƀă khu luât cho Ƀô̆ Luât yân sư̆, Luât pêi pro tơdroăng kuăn pơlê, luât pơkuâ ngăn nâp hnoăng liăn mơhá ƀă hên ki ê ƀă pêi pro châ tơdroăng ki rơhêng vâ khât, vêh pơkâ mâu tơdroăng khu tơrŭm ăm mung liăn ƀă hngêi rak liăn.

Tơpui ‘na kơxop hlá mơ-éa Pơkâ ‘na mâu troăng hơlâ tŏng kum ki kal vâ tŏng kum mâu tơdroăng xơpá, tơvâ, mơdêk rĕng tơdroăng pơkâ pêi pro dêi tơdroăng tơnêi têa pkâ, Vi ƀan pơkuâ Kuô̆k hô̆i môi tuăn tơdroăng ki kal dêi tơdroăng pơkâ troăng hơlâ tŏng kum, troăng hơlâ pơkâ ki kal cho ing mâu tơdroăng pêi pro ki khât vâ tŏng kum mâu tơdroăng xơpá, tơvâ tung pơla tơbleăng pêi pro mâu tơdroăng kố tung la ngiâ. Kăn xiâm phŏ hnê ngăn Kuô̆k hô̆i Nguyễn Khắc Định pơkâ thế:

"Pơkâ cho pơkâ tơleăng mâu tơdroăng, tŏng kum mâu tơdroăng xơpá ƀă mơdêk rĕng tơdroăng pơkâ pêi. Xua mê, athế tơkŭm mâu tơdroăng ki rĕng tŏng kum. Má môi, hiăng tŏng kum mê pôi tá pơklât thế tơ’nôm. Má péa, hiăng mơdêk rĕng mê pôi tá pơkâ ai tơ’nôm mâu hlá mơ-éa, chiâng hrá tơ’nôm, tơvâ, mơdoh hên khế, mơ’nui chiâng hrá. Pơkâ thế cho séa ngăn khât tung Pơkâ 98, Pơkâ 100. Inâi ‘nâng ‘nâi xo ƀă xuân môi tuăn ôh ti khĕn cho Pơkâ pơkê pêi. Xua môi tơdroăng ki kal hiăng cho pơkâ pêi, ai tơdroăng pơkâ, ƀă ai hâi khế, ai ngế ki pêi ƀă tơdroăng kố bu tung pơla lối 1 hơnăm, vâ chê 2 hơnăm nếo”.

Kăn xiâm hnê ngăn Kuô̆k hô̆i Vương Đình Huệ pơchân tối tơdroăng ki xing xoăng râ, xoăng hnoăng ăm râ tơring tung pêi pro mâu tơdroăng tơnêi têa pơkâ. Laga, tung pơla xúa mê kal tơmiât nhên, kum ăm tơdroăng mơjiâng ƀă tơkŭm pêi pro hneăng hơnăm la ngiâ:

“Tâng xoăng ăm râ tơring mê nôkố ôh tá mơdêk ki tơdjâk tơdrêng mê xuân ôh tá kum pơxúa klâi ăm tung pơla mơjiâng tơdroăng dêi tơdroăng la ngiâ mê pin kô pơkâ tung Pơkâ dêi Kuô̆k hô̆i ƀă drêng kĭ pơkâ mâu tơdroăng tơnêi têa pơkâ dêi pơla hơnăm hneăng la ngiâ. Ƀă mâu tơdroăng ki tŏng kum mâu tơdroăng ki hdrối ‘nôi akố lơ cho rế tơdjâk cho môi troăng hơlâ ki păng ‘nâng hơ’lêh mâu troăng hơlâ vâ ăm mâu kơ koan dêi Chin phuh drêng mơdrêng tơdroăng mê nếo tơmiât. Tiah mê, kô phá tâ a tâi tâng mâu tơdroăng pơkâ, troăng hơlâ tŏng kum”.

A rôh hôp, Ngế pro xiâm phŏ hnê ngăn tơnêi têa Trần Lưu Quang ăm ‘nâi: Chin phuh kô pêi klêi mâu hnoăng cheăng ki u ối, pêi pro châ tiô mâu tơdroăng ki pơkâ mơ’no tung pơla rĕng má môi:

“Má môi cho rơkong vâ mâu vâi pú pơtối môi tuăn vâ mơgêi rôh hôp rôh kố pin ai môi troăng hơlâ tŏng kum vâ tơdroăng kố pơtối châ pêi ƀă mơni kô pêi klêi tro hâi khế pơkâ. Má péa, rơhêng vâ pơkâ tŏng kum ăm tung mâu khế hơnăm tung la ngiâ, troh tui lui, tâng ôh athế hnê mơhno hên mê nếo kô trâm ƀă mâu tơdroăng xơpá ki ê. Má pái, ki lâi tá hâi nhên pin môi tuăn ƀă tơdroăng pơkâ vâ tŏng kum, pro tơ’lêi hlâu pơkâ tung la ngiâ vâ pơtối tŏng kum ăm klêi tơdroăng pêi pro 3 Tơdroăng kố”.

A rôh hôp má 29, Vi ƀan pơkuâ Kuô̆k hô̆i xuân ăm rơkong tơpui ‘na tơdroăng ‘mot tơ’nôm Túa pơkâ ‘no liăn bro kế tơmeăm tơdjuôm ki krâ kơvâ hơnăm kơxô̆ liăn tơnêi têa pla hơnăm 2021 – 2025 ing kơxô̆ liăn ‘măn kơdĭng tơdjuôm tơ’mô ƀă kơxô̆ liăn mơdêk pêi lo, kơdĭng hrê liăn tơnêi têa hơnăm 2022 ăm mâu hnoăng cheăng, tơdroăng tơkêa ‘no lăn cheăng tơdjuôm ƀă ‘mot tơ’nôm Túa pơkâ ‘no liăn ki krâ kơvâ hơnăm ăm Grup pơkuâ on tơhrik Việt Nam ing kơxô̆ liăn ‘măn kơdĭng dêi Túa pơkâ ‘no liăn cheăng ki krâ kơvâ hơnăm.