Loi ƀă tơngah cho hiâm mơno dêi hên ngế kuăn pơlê drêng séa ngăn hneăng hôp má 5, Kuô̆k hô̆i hneăng 15 ƀă tơdroăng ki Kuô̆k hô̆i tơpui tơno hên tơdroăng ki kal môi tiah: tơbleăng 08 to tơdroăng tơkêa Luât, 03 to kơxop hlá mơ-éa Pơkâ ƀă ăm rơkong tơpui tối tung 09 tơdroăng tơkêa Luât. Tung mê, Luât Tơnêi tơníu ki ‘mâi hơ’lêh pơtối châ Kuô̆k hô̆i ăm rơkong veăng tơpui tối rôh má 2.

Troh nôkố, klêi kơ’nâi xo rơkong tơpui tối dêi kuăn pơlê, kơxop hlá mơ-éa Luât kố ối ai hên rơkong tơpui phá ra phá dêi rơpó ‘na liăn ngân tơnêi ƀă xo tơvêh tơnêi. Rơkong tơpui tối tơngah dêi kuăn pơlê:

“Luât Tơnêi tơníu ai tơdjâk troh xo tơvêh tơnêi ƀă yă tơnêi. Tơdroăng ki xo tơvêh tơnêi ki ôh tá chêh tối nhên yă tơnêi ki xo tơvêh tơnêi. Xing xoăng tơnêi athế pêi pro kơtăng. Tâng kơbố pro ôh tá tro athế pơxâu phâk tiô túa ki hngăm, pa rŏng mê pro tơ’nhiê ăm tơnêi têa gá ó khât”.

Hneăng hôp má 5 po tung pơla tơdroăng cheăng kâ tơnêi têa dế trâm hên mâu tơdroăng pơloăng mơnúa, drêng tơdroăng ki mơdêk ‘na cheăng kâ tung pơla sap ing khế 1 troh khế 3 bu châ 3,32%, mâu tíu xiâm ki pêt mơjiâng kế tơmeăm xúa kơmăi kmok ƀă tê kế tơmeăm ngi kong têa ê ki xiâm dêi tơnêi têa pin hiăng kơdroh lơ tâk la ôh tá hên, ăm hlo tơdroăng ki pêi pro klêi tơdroăng pơkâ mơdêk cheăng kâ plâ hơnăm cho xơpá khât. Kuăn pơlê tơngah a mâu kăn Kuô̆k hô̆i mơdêk dêi hnoăng cheăng pôu râng, tuăn ngoâ rơkê, rơtế ƀă dêi rpơó tơpui tơno, tí tăng troăng hơlâ vâ tŏng kum mâu tơdroăng ki xơpá mê ăm tơdroăng cheăng kâ, vâ pêi pro châ tơdroăng pơkâ mơdêk 6,5% tung plâ hơnăm.

Pôa Trần Quang Khương, kăn xiâm phŏ hnê ngăn Kuô̆k hô̆i ai tối tiah kố:

“Ôh ti xê troh hneăng má I hơnăm kố GDP nếo kơdrâ kơdroh sap ing 8,2% chu 3,3% mê mơ’nui hneăng má 3, apoăng hneăng má 4 hơnăm nah hiăng hlo chu kơdroh. Tơdroăng kố hiăng châ mơnhên, vâ mơnhên tối tro tơdroăng ki ôh tá kơdrâ chu kơdroh sap ing 8,2% chu 3,3%. Xua mê, kal tơpui tối leăng mâu tơdroăng ki tá hâi pêi pro klêi rơkê, krá rơdêi ƀă tŭm tâ”.

Môi tơdroăng kal ki ê nếo xuân châ tơtrŏng a hneăng hôp kố, mê cho Kuô̆k hô̆i séa ngăn kơtăng tơdroăng mơ’no, pơkuâ ngăn ƀă xúa mâu kơxô̆ liăn kum ăm tơdroăng cheăng hbrâ mơdât pơreăng COVID-19. Tung kơxop hlá mơ-éa tối tơbleăng dêi khu kăn séa ngăn ăm hlo pơkâ hnê mơhno roê xúa kế tơmeăm, pơkeăng hrá châ ‘mâi rơnêu chiâng tơdjâk troh hiâm mơno xâu rơ-iêo, sap ing klêi kơ’nâi mâu tơdroăng cheăng ki ôh tá tơniăn hiăng trâm.

Tiô Phạm Khánh Phing Lan, ngế ki lo ing khu Pơlê kong kân Hồ Chí Minh: pơreăng môi tiah tơdroăng ki mơnúa ăm kơvâ ngăn pơkeăng ƀă khăm pơlât ƀă kuăn pơlê cho ngế ki chiu trâm hên tơdroăng tơdjâk:

“Á môi tuăn cho tơdroăng ki ôh tá tơniăn mê pin athế hbrâ mơdât, la xuân môi tiah tơdroăng ki pơlât mâu ngế ki tro pơreăng mê athế ai tơdroăng ki bro tơdâng tơ’mô pơla tơdroăng ki rak vế ivá châ chăn, tơdroăng ki tŏng kum roê kế ôu tơmeăm kâ ăm vâi rak vế dêi ivá, vâ vâi hbrâ rơnáu chiu trâm ƀă mâu tơdroăng ki kơdrâ ki ê.

Tơná á cho cheăng tung kơvâ ngin hlê nhên tơdroăng kố. Á môi tuăn tâng ôh tá tro athế pơxâu phâk, laga xuân athế séa ngăn tung túa tơmiât tâi tâng mâu tơdroăng môi tiah lâi ƀă ngăn tiô túa ki hlê plĕng tâ”.

Hneăng hôp má 5, Kuô̆k hô̆i hneăng 15 po klêi kơ’nâi Rôh hôp tơdế hneăng Khu pơkuâ ngăn Tơnêi têa nếo mơgêi. Tơnêi têa pơkâ thế pơtối mơdêk rơdêi, pêi pro tro tâ nếo hnoăng cheăng mơjiâng, ‘mâi rơnêu Đảng ƀă khu pơkuâ tơdroăng kal kí krúa lĕm, krá rơdêi, malối cho kơ koan mơjiâng luât. Nguyễn Thị Báo, ối a pơlê krâm Cầu Giấy, Hà Nội pâ thế kal pêi pro tro tơdroăng ki mơ-eăm tah lôi mâu ngế ki ai hiâm mơno tơmiât ôh tá tro, tơpôu ăm ngế ki ê hnoăng cheăng tung mâu khu kăn ƀô̆.

“Pin athế tơtrâ mâu tơdroăng ki tơpui tơno ton tơrŏng, xâu pôu râng hnoăng cheăng, ôh tá khên tơnôu, ôh tá khên pêi pro drêng trâm mâu tơdroăng ƀă hnoăng cheăng pôu râng. Môi ngế kăn ƀô̆ pơkuâ rak ngăn, môi ngế đảng viên ki lĕm tơdrăng mê ôh tá la lâi thu mâu tung mâu tơdroăng xơpá ki lâi, athế khŏm mơ-eăm vâ prôk troh tui lui ƀă pêi pro hnoăng cheăng pôu râng, tá tơdroăng ki pơxúa ăm dêi tơná”.

Po tung pơla tơdroăng cheăng kâ tơnêi têa pin dế trâm hên mâu tơdroăng pơloăng mơnúa, kuăn pơlê tơngah mâu kăn Kuô̆k hô̆i mơdêk hnoăng cheăng pôu râng, tuăn ngoâ rơkê, rơtế tơpui tơno ƀă dêi rơpó, kơhnâ pleăng ivá vâ tăng hlo mâu troăng hơlâ ki tro ‘ló pơkâ tơleăng mâu tơdroăng xơpá ăm tơnêi têa, pêi pro ƀlêi chiâng mâu pơkâ cheăng kâ rêh ối pơlê pơla ki châ Kuô̆k hô̆i mơ’no ăm hơnăm 2023, bro ivá krá rơdêi ăm tơdroăng pêi klêi mâu pơkâ mơ’no ăm pơla hơnăm 2021 – 2025.