Veăng a rôh hôp ai kăn teăng mâ pơkuâ mâu khu xiâm, kơvâ cheăng, Tơnêi têa; Kăn pơkuâ hnê ngăn Đảng, Kăn hnê ngăn Vi ƀan 5 to kong pơlê kơpong Tây Nguyên (Dak Lak, Gia Lai, Kon Tum, Lâm Đồng, Dak Nông) ƀă 9 to kong pơlê ki a chê (Quảng Nam, Quảng Ngãi, Bình Định, Phú Yên, Khánh Hòa, Ninh Thuận, Bình Thuận, Đồng Nai, Bình Phước).

Tơpui pơxiâm po rôh hôp, Ngế pro xiâm phŏ hnê ngăn Chin phuh Trần Lưu Quang tối nhên: cheăng kâ rêh ối pơlê pơla kơpong Tây Nguyên hlo mơnhông tơƀrê; ki kơnía ‘na túa lĕm tro mâu hdroâng kuăn ngo châ rak vế, pơtó ƀă mơnhông; ki rơdêi ‘na tơdroăng cheăng lêng gâk kring tâi tâng kuăn pơlê, ki rơdêi ‘na gâk kring vế kuăn pơlê, ki rơdêi hiâm mơno kuăn pơlê châ ‘mâi mơnhông; gâk kring tơniăn châ rak vế.

Laga, mơnhông cheăng kâ rêh ối pơlê pơla kơpong Tây Nguyên xuân tá hâi tơxâng ƀă tíu ối, hnoăng cheăng, ki ai hlâu, ki pơxúa dêi kơpong. Vâ mơnhông krá tơniăn kơpong Tây Nguyên, kuăn pơlê ai tơdroăng rêh ối phâi hơtôu, hơniâp ro, ‘mâi mơnhông krá rơdêi tơdroăng gak kring, tơdroăng cheăng lêng tro tiô pơkâ pêi, tơdroăng pơkâ thế kơxô̆ 23-NQ/TW dêi Khu xiâm pơkuâ tơdroăng kal kí, Ngế pro xiâm hnê ngăn Chin phuh hiăng pơkâ tơdroăng tơkêa mơnhông cheăng kâ rêh ối pơlê tro ƀă rak vế gâk kring, tơdroăng cheăng lêng a Tây Nguyên.

Ki xiâm dêi tơdroăng pơkâ mơnhông cheăng kâ rêh ối pơlê pơla tro ƀă kring vế, gak ngăn, tơdroăng cheăng lêng kơpong Tây Nguyên tung la ngiâ. Tung tơdroăng ki mê, mâu kăn tơkŭm tơpui tơno ‘na troăng hơlâ vâ pêi pro hơ’lêh, rĕng ăm tơdroăng pơkâ kơxô̆ 23-NQ/TW ƀă Tơdroăng pơkâ châ xúa tung rêh ối, veăng kum mơnhông kơpong Tây Nguyên rĕng, krá tơniăn, rak vế gâk kring, tơdroăng cheăng lêng.

A rôh hôp, Đăi tươ̆ng Tô Lâm tối nhên: Đảng, Tơnêi têa đi đo mơdoh tơdroăng ki tơmâng ngăn khât ƀă rêm kơvâ cheăng ƀă hiăng pơkâ hên tơdroăng pơkâ pêi pro, mơgêi vâ mơnhông kơpong Tây Nguyên. Tơdroăng ki kal a chê kố cho Pơkâ kơxô̆ 23-NQ/TW dêi Khu xiâm pơkuâ tơdroăng kal kí ‘na “Túa tơmiât mơnhông cheăng kâ rêh ối pơlê pơla ƀă rak vế tơdroăng cheăng lêng, gâk kring kơpong Tây Nguyên troh hơnăm 2030, hnoăng pơkâ vâ pêi pro troh hơnăm 2045” ƀă Tơdroăng pơkâ mơnhông cheăng kâ rêh ối pơlê pơla tro ƀă rak vế gâk kring, tơdroăng cheăng lêng a mâu kong pơlê kơpong Tây Nguyên dêi Chin phuh.

Đăi tươ̆ng Tô Lâm pơkâ thế mâu khu râ, kơvâ cheăng, kong pơlê môi tuăn, môi hiâm mơno, pêi pro kơtăng, pêi pro châ mâu tơdroăng túa hnê mơhno; tơkŭm mâu troăng hơlâ, kơxô̆ liăn pêi pro tơƀrê mâu troăng hơlâ pơkâ pêi ki nếo, ki tơƀrê vâ pêi pro mâu tơdroăng pơkâ vâ pêi nhên tung tơdroăng pơkâ mơ’no ƀă hiâm mơno “5 khŏm pêi kơhnâ”.

Ki nhên: khŏm tŏng kum mâu tơdroăng xơpá, tơvâ tơvân, tro mơdât; khŏm pêi klêi, tơbleăng tơƀrê mâu troăng hơlâ pơkâ tŏng kum ƀă Tây Nguyên; khŏm mơdêk tíu ki mơnhông, “pơkâ pêi”, tí tăng tơdroăng ki ai hlâu, ki pơxúa dêi kơpong, mơdêk ki kơnía ‘na túa lĕm tro, ton nah, kuăn mơngế kơpong tơnêi Tây Nguyên, ivá khên tơnôu, tơdrăng tơpâ, môi tiah ngế rơtăm Dam Săn chiâng ivá mơnhông cheăng kâ, túa lĕm tro, pơlê pơla, mơdêk tơdroăng rêh ối dêi kuăn pơlê mâu hdroâng kuăn ngo Tây Nguyên, “ôh tá lôi kơbố pa rŏng”; khŏm rĕng tŏng kum, kum ing hngế, ing cheăm pơlê mâu tíu ki ôh tá tơniăn ‘na gâk kring, pôi tá tro kơdrâ; khŏm kơhnâ ‘mâi mơnhông khu pơkuâ tơdroăng kal kí a cheăm pơlê krá rơdêi, pêi pro châ tơdroăng ki rơhêng vâ, hnoăng cheăng; mơdêk hnoăng cheăng pôu râng dêi kăn ƀô̆, mơngế pơkuâ tung pêi dêi hnoăng cheăng, tro tiô tơdroăng ki hnê mhno dêi kăn xiâm pơkuâ hnê ngăn Đảng Nguyễn Phú Trọng, Ngế pro xiâm hnê ngăn Chin phuh Phạm Minh Chính cho: “Kơbố ôh ti khên pêi, kơbố ôh ti pêi klêi mê athế ối môi pâ ăm ngế ki ê pê”.

Đăi tươ̆ng Tô Lâm tối nhên: pơkâ thế khu râ Đảng, khu kăn pơkuâ mâu kong pơlê ki a chê tơrŭm krá rơdêi ƀă mâu kong pơlê kơpong Tây Nguyên tung tơbleăng tơdroăng pơkâ dêi Chin phuh, mơdêk tơrŭm, tơkŭm mơjiâng bro ôm hyô, pro hngêi trăng, troăng klông, tơ’mot ‘no liăn cheăng, tí tăng châ tơƀrê tơdroăng ki ai xêh, mâu ngế cheăng, kong kế nhâ loăng ki ai hlâu, ki lĕm tro dêi Tây Nguyên. Ing tơdroăng ki ton nah, khôi hmâ khên tơnôu tung rôh tơplâ ƀă rơdêi, tơmiât rơkê mơ-eăm tung hơ’lêh nếo, hiâm mơno tơrŭm, môi hiâm mơno tiô Đảng tiô pôa Hồ dêi kuăn pơlê mâu hdroâng kuăn ngo Tây Nguyên, Đăi tươ̆ng Tô Lâm loi khât tiah kố: Đảng ƀô̆, khu kăn pơkuâ, khu lêng kring vế tơniăn ƀă Kuăn pơlê mâu kong pơlê Tây Nguyên kô tơkâ luâ mâu tơdroăng xơpá, pơloăng mơnúa, pêi pro ƀlêi chiâng hnoăng cheăng mơnhông cheăng kâ rêh ối, rak vế gak kring, tơdroăng cheăng lêng, rĕng ăm Tây Nguyên mơnhông tơƀrê, tŭm têk ƀă krá tơniăn.