Pôa Vương Đình Huệ, Kăn xiâm hnê ngăn Kuô̆k hô̆i tối nhên  mâu tơdroăng pơkâ dêi Kuô̆k hô̆i pơrá pơkâ mơ’no ăm kuăn pơlê ƀă khu mơdró kâ ối a tíu xiâm. Kŏng nhân ƀă mâu ngế pêi cheăng cho khu ki kal tung tơrŭm pêi cheăng tơniăn lĕm, ƀă rơkê, cho khu ngế ki ‘mâi rơnêu dêi ki hên mâu luât tung kơxop hlá mơéa luât. Tơdroăng ki Kuô̆k hô̆i, Vi ƀan pơkuâ Kuô̆k hô̆i, mâu kơ koan dêi Kuô̆k hô̆i, mâu kơ koan, khu tơrŭm cheăng ai rôh trâm mâ, tơmâng mâu tơdroăng ki tơchĕng tơmiât, tơdroăng ki rơhêng vâ dêi mâu ngế pêi cheăng vâ rế hía rế pêi pro klêi troăng hơlâ luât cho kal khât ƀă ai pơxúa khât.

 “Ngin ngăn kố cho rôh trâm mâ kuăn pơlê ‘na tơdroăng ki tơviah, vâ châ trâm mâ tơmâng ƀă tơpui tơno ƀă mâu kăn ƀô̆ kong đoàn, đoân viên kong đoân, mâu ngế pêi cheăng teăng mâ ăm mâu ngế pêi cheăng hên hĭn dâng 50 rơtuh ngế tung lâp tơnêi têa, kố cho khu ki pêi cheăng, mơjiâng bro kế tơmeăm, pêi lo mâu kế tơmeăm liăn ngân ăm pơlê pơla ƀă veăng kum kal khât tung pơla mơnhông mơdêk cheăng kâ rêh ối pơlê pơla dêi tơnêi têa; tơdrêng amê kố xuân cho mâu ngế ki tro tơdjâk ’mâi rơnêu dêi tâi tâng mâu luât tung khu luât Việt Nam”.

Tơpui tơno a rôh hôp, troăng hơlâ tŏng kum hngêi ối ăm kŏng nhân cho môi tung mâu tơdroăng ki châ hên mâu ngế pêi cheăng kal vâ ‘nâi plĕng khât. Ngoh Nguyễn Việt Nam, đoân viên Kŏng ti xiâm Tơlo liăn Bưu chính Viettel ối tung Grup pơkuâ bưu chính viễn thông Quân đội tối tiah kố:

 “Nah, hngêi ối tơdjuôm gá hên, tíu lâi ai kơpong pêi cheăng ƀă kơmăi kơmok, ai hên kŏng nhân mê tíu mê ai hngêi ối tơdjuôm. La nôkố, tơnêi têa pin hiăng chía niân tâ hên, la hên kơpong pêi cheăng ƀă kơmăi kơmok, kŏng nhân ai troh lối hrĭng, lối rơpâu ngế. Tâng ngăn tung hngêi ối chung cư mê nôkố tá hâi pêi pro châ tơdroăng ki rơhêng vâ hngêi ối. Mê tơdjâk troh mâu ngế pêi cheăng”.

Tiâ rơkong kơ-êng ‘na tơdroăng kố, pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi, kố cho tơdroăng ki ôh tá tro pơla pơ’lêh cheăng ƀă kơmăi kơmok, pơ’lêh tơdroăng ki rơkê plĕng. Tíu ki ai cheăng pêi, kơpong cheăng ƀă kơmăi kơmok hên, la ôh tá ai hngêi vâ ối.

 “Tâng tung pơla mơjiâng bro mâu kơvâ cheăng pêi a kơphô̆ rĕng tâ, tung pơla tơdroăng ki pơ’lêh dêi kơphô̆ hrá tâ, mê kô trâm mâu tơdroăng ki ôh tá tơniăn cho ôh tá chiâng kơchuâ chêh ‘na hngêi ối. La ki ê nếo, tâng pin rĕng pơ’lêh kơphô̆ tâ hdrối nah mê mơni kô ai mâu kơpong ki bro hngêi la ôh tá ai kơbố ối, bro klêi la ôh tá ai kơbố roê. Mê tơdroăng kố gá tơdjâk troh túa pơkâ. Nôkố, Chin phuh, Ngế pro xiâm hnê ngăn tơnêi têa xuân dế hnê mơhno kơtăng khât tơdroăng ki mơjiâng bro túa pơkâ dêi kong pơlê. Tơdroăng pơkâ kơphô̆, túa pơkâ thôn pơlê, bro ti lâi vâ tơtro pơla péa tơdroăng kố”.

Xuân a rôh hôp kố, mâu ngế pêi cheăng hiăng mơ’no rơkong kơ-êng ăm kăn xiâm hnê ngăn Kuô̆k hô̆i, Chin phuh, mâu khu xiâm kơvâ cheăng ki ai tơdjâk troh khu ki ai tơdjâk troh tơdroăng tơniăn krúa kế kâ; mâu troăng hơlâ tŏng kum, troăng tŏng kum ki ai tơdjâk troh tơdroăng rêh ối liăn ngân, hiâm mơno dêi mâu ngế pêi cheăng, pơkuâ ngăn tơnêi têa ƀă hơ’lêh chêh bro hlá mơ-éa; mâu troăng hơlâ tŏng kum ki xiâm ăm mâu ngế pêi cheăng; ‘na tơdroăng pêi cheăng, rôh kâ hmê a chôu pơtê.

Ngế xiâm pơkuâ Vi ƀan Pơlê pơla dêi Kuô̆k hô̆i, kăn pơkuâ Vi ƀan khoa hok ƀă Kong ngê̆, kăn pơkuâ Vi ƀan Luât, ngế xiâm ngăn pơkeăng ƀă khăm pơlât; ngế xiâm ngăn hnê hriâm ƀă hnê mơjiâng tuăn ngoâ rơkê hiăng tiâ mâu rơkong kơ-êng dêi mâu ngế pêi cheăng.

Tơpui mơgêi a rôh hôp, pôa Vương Đình Huệ, kăn xiâm hnê ngăn Kuô̆k hô̆i mơnhên tối, mâu rơkong tơpui tối pâ thế dêi đoân viên, mâu ngế pêi cheăng hiăng tối tro ‘na tơdroăng ki ai khât tung rêh ối, pêi cheăng, hiâm mơno tơchĕng tơmiât, tơdroăng ki kal ‘nâi plĕng dêi đoân viên, mâu ngế pêi cheăng tung lâp tơnêi têa ƀă mâu tơdroăng ki ôh tá tơniăn tung pơla pêi pro troăng hơlâ, luât bro đoân viên, kŏng nhân, viên chưk, ngế pêi cheăng ối tá hâi hlê plĕng, hêng hôu, môi tiah tơdroăng cheăng pêi, pêi lo liăn, hơ’lêh tơdroăng rêh, troăng hơlâ tŏng kum hngêi ối, troăng hơlâ tŏng kum ƀaoh hiâm pơlê pơla, ƀaoh hiêm khăm pơlât, troăng hơlâ tŏng kum ki ê:

 “Ƀlêi châng dêi Rôh hôp kô pơtối tối rơdêi hiâm mơno đi đo hơ’lêh nếo, pêi pro kơtăng dêi Kuô̆k hô̆i xua ki pơxúa dêi Kuăn pơlê, dêi giai cấp công nhân; tơdrêng amê hlối tối nhên hnoăng cheăng ki hbrâ rơnáu, kơhnâ dêi khu tơrŭm Kong đoân Việt Nam tung tơdroăng ki veăng mơjiâng Đảng, mơjiâng khu kăn pơkuâ. Pin loi tơngah tiah kố, xua tơdroăng pơkuâ tơtro, rơkê plĕng dêi Đảng, tơdroăng tơrŭm krá tơniăn, tơtro ƀă tung tơdroăng ki veăng tŏng kum kơhnâ dêi rêm râ, mâu kơvâ cheăng ƀă tá khu pơkuâ tơdroăng kal kí, tơdroăng ki môi tuăn, môi hiâm mơno, ivá mơ-eăm ƀă tơdroăng khŏm mơ-eăm dêi kuăn pơlê, mâu ngế pêi cheăng, mâu khu mơdró kâ, mơni pin kô kâi tơkâ luâ mâu tơdroăng xơpá, pơloăng mơnúa kố”.

A rôh hôp, pôa Vương Đình Huệ, Kăn xiâm hnê ngăn Kuô̆k hô̆i, mâu kăn xiâm phŏ hnê ngăn Kuô̆k hô̆i hiăng diâp ăm 20 ngế đoân viên kong đoân ki rơkê; đoân viên, mơngế pêi cheăng ki ai tơdroăng rêh ối xơpá.