Maluâ troăng klông kân kố hiăng pơxiâm pro tung dế khế 6 hơnăm 2023, la troh chôu phut kố, xuân tá hâi châ pơtối mơjiâng pro, tơdroăng ki mơdrếo xo tơnêi kơpong mê dế trâm hên tơdroăng pá puât, mơnhêa mơnhĕn pá vâ khoh châ lêi tah. Tuấn Long-Ngế chêh hlá tơbeăng cheăng tung Rơ’jíu Việt Nam kơpong Tây Nguyên ai chêh tối ‘na tơdroăng mê.

Troăng kân Khánh Hòa - Ƀuôn Ma Thuột tơkâ luâ tơring M’Drak xŏn 17km, xua Vi ƀan hnê ngăn kong pơlê Khánh Hòa bro ngế ki ‘no liăn bro. Ƀăng tơnêi gu bro tâi tâng dêi troăng cho 127,1 ha dêi 143 rơpŏng kuăn pơlê. Tung mê ai mâu tơnêi ối tung tơdroăng ki châ xo tŏng kum chêl thiê̆n mê cho tơnêi hdi xo pêt loăng keo, tơnêi ối tung 3 túa kong ƀă tơnêi pêi chiâk.

Pôa Nguyễn Đức Thảo - Kăn phŏ hnê ngăn Vi ƀan tơring M’Drak tối, troh nôkố, hnoăng cheăng gu tơnêi bro tơbăng nếo bu klêi tơdroăng ki rơnêu túa pơkâ, chêh bro túa pơkâ xúa tơnêi, hnê mơhno troăng, tíu ki ok mâu prêi, hmốu, mâu kế tơmeăm ki hvât, hiăng klêi tơdroăng ki vê ngăn ‘mâi rơnêu lơgât tơnêi ki xiâm séa ngăn, hnoăng cheăng riân ngăn mâu tơmeăm pêt ƀă tơbleăng tơdroăng xo tơvêh tơnêi troh ngế krê, khu tơrŭm ai tơnêi tung kơpong bro troăng prôk.

Nôkố tơring xuân tá hâi pơcháu mâu ƀăng tơnêi xo tơvêh ki lâi ăm mâu tíu ki bro. Pôa Nguyễn Đức Thảo tối ‘na tơdroăng ki gu tơnêi bro troăng dêi tơdroăng tơkêa:

 “Túa pơkâ mơ’no cho 30/6 athế pơcháu klêi 70% tơnêi tơníu, laga troh nôkố tơdroăng ki tơbleăng pơcháu tơnêi ôh tá pêi châ tiô pơkâ mơ’no. Nôkố tơring dế tơkŭm mơjiâng bro túa pơkâ, tơbleăng mâu túa pơkâ vâ tối ăm mâu khu tơrŭm, mâu ngế krê ki ai ƀăng tơnêi tro tơdjâk vâ chêl thiê̆n tŏng kum chêl thiê̆n ăm tơdroăng ki xo tơnêi”.

Pôa Trương Thanh Tâm - Kăn phŏ pơkuâ Tíu xiâm Mơnhông râng tơnêi tơring M’Drak ăm ‘nâi, xiâm kối chiâng hrá ‘na ‘mâi xĕn kế tơmeăm va bro troăng tơkâ luâ tơring cho xua tơvâ tơdroăng Pơkâ 10/2022 dêi Vi ƀan hnê ngăn kong pơlê Dak Lak. Pơkâ kố tối nhên, loăng kong pêt tơkŭm a tơnêi pêt kong dêi kuăn pơlê pơklât thế xo tơvêh vâ tê tơbriât.

Tơdroăng ki pơkâ xúa yă tơnêi chel thiê̆n bu nếo châ pêi a hâi lơ 30/6, nôkố tá hâi ai tơdroăng hnê mơhno vâ mơnhên xiâm kối tơnêi ki hdi xo ton xŏn dêi ngế krê, khu tơrŭm ƀă hên ki ê. Vâ mơdêk rĕng tơdroăng ki ‘mâi xĕn kế tơmeăm vâ bro troăng prôk, pôa Tâm tối tiah kố, Vi ƀan hnê ngăn kong pơlê Dak Lak kal rĕng ‘mâi rơnêu mâu tơdroăng pơkâ bro tiah lâi ăm tơtro má môi. Pôa Tâm ăm ‘nâi:

  “Tơring hiăng pơkâ mơ’no ăm kong pơlê ‘mâi rơnêu Pơkâ 10 tiô troăng klêi kơ’nâi chêl thiê̆n tŏng kum kuăn pơlê châ kếo ko dêi loăng pêt tơkŭm ki vâi pêt xêh ôh ti xê ing tơdroăng ki xo tơvêh tê tơbriât. Kơlo chêl thiê̆n tŏng kum bu riân tung kơxô̆ liăn ‘no liăn pêt pro kong, ôh tá riân tơdroăng ki pêi lo liăn tiô tơdroăng pơkâ.

Hnê mơhno nhên túa pơkâ, túa pêi, mơnhên hâi khế xiâm kối tung pơla xúa tơnêi vâ pro tơdroăng séa ngăn chêl thiê̆n ăm kuăn pơlê, pro tơdroăng séa ngăn chêl thiê̆n ‘mâi xê̆n kế tơmeăm vâ gu tơnêi”.

A tơring Ea Kar, tơdroăng tơkêa bro troăng kân Khánh Hòa - Ƀuôn Ma Thuột tơkâ luâ ai tâi tâng ki xŏn lối 12,5km. Troăng kố ối tung tơdroăng tơkêa kơxô̆ 2 ƀă 3. Ƀăng tơnêi ki pêt tơmeăm châ ‘mâi pro phuâng tơbăng cho 104,4ha. Troh nôkố, hnoăng cheăng riân mâu loăng pêt hiăng klêi tâi tâng tơdroăng pơcháu, kĭ ƀă xo tơvêh 13 túa pơkâ chêl thiê̆n ƀă 69,2 ha, hiăng pơcháu tơnêi châ 50,2 ha ƀă châ 40%, tâng pơchông ƀă túa pơkâ xuân ối hrá tơdroăng pơkâ bro.

Pôa Chu Vĩnh Cường - Kăn pơkuâ Tíu xiâm Mơnhông râng tơnêi tơring Ea Kar pâ thế:

 “Má môi, ƀă hnoăng cheăng chêl thiê̆n tơnêi ngin pơkâ thế Vi ƀan hnê ngăn kong pơlê rĕng kĭ pơkâ yă tơnêi ki nếo má môi dêi Hô̆i đong pơkâ ‘na mâu tíu ki châ chêl thiê̆n. Má 2, pơkâ thế kong pơlê rĕng séa ngăn ăm kuăn pơlê kếo ko dêi mâu loăng pêt klêi kơ’nâi tơdah xo chêl thiê̆n tŏng kum tơdroăng ki xo tơnêi. Mơhnhôk kuăn pơlê klêi kơ’nâi tơdah xo ‘no mơhá liăn ăm tơdroăng ki xo tơnêi mê rĕng pơcháu vâ tíu xiâm pơcháu ăm ngế ki ‘no liăn bro rĕng tơbleăng bro tơdroăng tơkêa”.

Mâu tơdroăng ki xơpá tơvâ pơrá ai tơdroăng ki bô bối cho ối tung tơdroăng Pơkâ 10/2023 dêi Vi ƀan hnê ngăn kong pơlê Dak Lak, tơdroăng pơkâ ‘na yă tơnêi chêl thiê̆n, chêl thiê̆n ăm tơnêi ki xo vâ bro troăng hrá, tá hâi ai tơdroăng hnê mơhno nhên hâi khế, xiâm kối xúa tơnêi, tŏng kum hdrê loăng pêt ton hơnăm ƀă hên ki ê. Tơdroăng ki rơnêu pơkâ, tŏng kum mâu tơdroăng ki tơvâ kal châ rĕng pro, vâ hnoăng cheăng ‘mai xĕn kế tơmeăm khoăng ƀă gu tơnêi bro troăng rak tơniăn tro pơkâ.