Tung hngêi ki nếo, pôa Lê Văn Hiệp, 63 hơnăm, a thôn 4, cheăm tơkăng kong Ia Rvê, tơring Ea Súp tối, kơtăn kố 2 khế, Mố đô̆i gâk tơkăng kong Dak Lak hiăng diâp 50 rơtuh liăn vâ kum lối 100 hâi pêi cheăng bro hngêi. Têt hơnăm kố rơpŏng ai hngêi ối nếo, bô bố xuân ro hơniâp.

“Kơnôm ai mâu vâi pú ing peăng Mố đô̆i gâk tơkăng kong kum bro ăm hngêi kố lĕm krá tâ. Á hơnăm hiăng krâ, hiăng lối 60 hơnăm, ai hngêi ối lĕm vâ kong tô, kong mê ôh tá tro kơchoh nếo mê ivá kô mo lĕm tâ, drêng châ ối tung hngêi. Ngin mơnê Đảng ƀô̆, Khu kăn pơkuâ cheăm, tơring ƀă khu Mố đô̆i gâk tơkăng kong kum bro ăm hngêi ối”.

Ƀă on veăng pôa Hoàng Minh Lý a thôn 8, cheăm Ea Ƀung, tơring Ea Súp hiăng lối 80 hơnăm, kố cho Têt ro má môi a kơpong tơkăng kong:

“Mố đô̆i gâk tơkăng kong hiăng bro ăm toăng hngêi ki kố hiăng châ 2 khế kố, mot ối mê ôh tá xâu kong tôu, kong mêi khía hyôh hngíu, mêi kơchoh xếo, ivá á hiăng mo lĕm tâ hdrối. Têt kố mâu kuăn ‘nĕng cháu chái vêh tơkŭm kơxuô kơƀăn tơxông ro Hơngui tơdah Têt, hngêi ai hên kơdrâm mơngế gá ro khât. Tâng vâ pơchông ƀă mâu Têt hdrối nah mê hơnăm kố ro khât yoh, xua on veăng má ai hngêi lĕm vâ ối, tơdah Têt”.

Kong pơlê Dak Lak ai 4 to cheăm tơkăng kong cho Ia Rvê, Ia Lốp, Ea Ƀung ối tung tơring Ea Súp, cheăm Krông Na dêi tơring Ƀuôn Đôn. Tiô pôa Lê Văn Hoàng Lâm – Kăn hnê ngăn Vi ƀan cheăm Ia Rvê tối, rơtế ƀă mâu troăng hơlâ tŏng kum kơjo dêi Đảng ƀă Tơnêi têa, mâu hơnăm hdrối nah khu Mố đô̆i gâk tơkăng kong Dak Lak xuân tŏng kum cheăm tung hnoăng cheăng tŏng kum rêh ối pơlê pơla xut tah hrâ mơnguâ kơtiê xơpá.

Ing mâu tơdroăng môi tiah: Hbru ro kăn, phon rơvât, hdrê pêt, roăng rak Nôu Việt Nam khên tơnôu, mơdêk chêng o troh hngêi trung, kuăn roăng đông mố đô̆i gâk tơkăng kong, bro hngêi hiâm mơno lĕm mâu pú ƀă bro hngêi hơtôu tơkăng kong tơdroăng rêh ối dêi kuăn pơlê a kơpong tơkăng kong rế hía rế châ mơdêk. Tung mê, tơdroăng ki bro hngêi “Hngêi hơtôu tơkăng kong” hiăng kum hên rơpŏng xơpá ‘na hngêi ối châ bro krá gâk vâ tơniăn rêh ối cheăng kâ, tơniăn tơdroăng rêh ối. Pôa Lê Văn Hoàng Lâm tối:

“Tung hơnăm 2023, Khu pơkuâ ngăn Mố đô̆i gâk tơkăng kong Dak Lak rơtế ƀă Đông mố đô̆i gâk tơkăng kong 737 (Ia Rvê) hiăng pro klêi môi toăng hngêi hơtôu tíu tơkăng kong. Pakĭng Têt, cheăm kô tơrŭm ƀă đông 737 dế pơtối séa ngăn vâ pơtối bro 1 toăng hngêi tơrŭm pú hmâ ƀă 2 toăng hngêi hơtôu tơkăng kong tung la ngiâ. Kố cho tơdroăng cheăng ai pơxúa, kal khât, veăng kum tơdroăng ki ôh tá ai xếo hngêi ối xi kơchoh, hngêi ối pơtân a cheăm, ƀă ngin xuân rơhêng vâ khu mố đô̆i gâk tơkăng pơtối rơtế ƀă ngin veăng kum mâu tơdroăng ki xơpá ăm vâi krâ nhŏng o”.

Đăi tă Đỗ Quang Thấm - Ngế xiâm pơkuâ ngăn Đảng lêng Khu ngăn Mố đô̆i gâk tơkăng kong Dak Lak ăm ‘nâi, pakĭng hnoăng cheăng ki kal xiâm cho rak vế krá tơniăn hnoăng pơkuâ gâk kring tơkăng kong tơnêi têa, ing hơnăm 2010 nah troh nôkố, khu mố đô̆i hiăng tơrŭm ƀă mâu kơ koan, tíu pêi cheăng tơlo kum châ lối 10 rơtal liăn vâ kum mâu kơtiê, rơpŏng châ tơnêi têa kum, ngế ki ai hnoăng bro hngêi ối.

Tung la ngiâ ah, tíu pêi cheăng kố kô pơtối krếo thế mâu ngế krê, mâu khu pú hên tơlo kum mâu rơpŏng mâu tơdroăng rêh ối pơlê pơla tung mê ai tơdroăng ki bro hngêi ối ăm rơpŏng kơtiê a kơpong tơkăng kong.

“Môi tung mâu tơdroăng cheăng ki tơƀrê dêi khu lêng gâk tơkăng kong tung hơnăm 2023 pơla hdrối kố nah mê ngin kô tơrŭm ƀă khu kăn pơkuâ cheăm, tơring, mâu khu ki ai hiâm mơno hơ-ui mơhnhôk krếo thế mơjiâng bro 8 toăng hngêi diâp ăm rơpŏng xơpá, rơpŏng kơtiê a kơpong tơkăng kong. Ing mê, kum kuăn pơlê ai hngêi ối lĕm, tơdroăng rêh ối cheăng kâ tơniăn, tơrŭm rơtế ƀă khu lêng mố đô̆i gâk tơkăng kong rak vế krá rơdêi hnoăng pơkuâ gâk kring tơkăng kong dêi tơnêi têa”.

Têt khôi hmâ dêi hdroâng mơngế dế hiăng vâ vêh troh a tíu tơkăng kong dêi kong pơlê Dak Lak. Tơdah hơnăm nếo tung mâu toăng hngêi ki lĕm hơtôu “Hngêi hơtôu tơkăng kong”, tơdroăng tơrŭm pơla khu lêng ƀă kuăn pơlê rế hía rế krá rơdêi a tíu tơkăng kong.