Mâu hâi mơ’nui hơnăm Giáp Thìn, Y Dũng, hdroâng M’Nông, xâp ếo nếo châ kăn ƀô̆ Đông mố đô̆i gâk tơkăng kong bo cheăng Thuận An chơ vêh a ƀon Sa Par, cheăm Thuận An, tơring Dak Mil, kong pơlê Dak Nông vâ rơtế veăng tung tơdroăng phiu ro rơnó Hơngui tơkăng kong hơtôu hiâm mơno kuăn pơlê. Y Dũng hơnăm kố dế hriâm lâm 6, cho kuăn roăng dêi đông mố đô̆i gâk tơkăng kong hiăng lối 3 hơnăm, châ kăn ƀô̆, lêng mố đô̆i păn roăng ăm hriâm a Đông.

Ing môi ngế hok tro ki hriâm ôh tá rơkê, hiâm mơno ôh tá kơxiâp, ing tơdroăng ki kơhnâ hnê rak ngăn dêi mâu lêng krâ kơlŏng xâp ếo ngiât, Y Dũng hiăng chiâng môi ngế hok tro hriâm rơkê, khên tơnôu tâ a dêi tơná. Tung tơdroăng ki hơniâp ro dêi tá pơlê hơniâp rơnó Hơngui tơdah Têt rơtế ƀă mố đô̆i gâk tơkăng kong, Y Dũng xuân hâk vâ rơtế ƀă mâu dêi pú a pơlê xah hêi tiô khôi chal krâ môi tiah trut loăng, hrot kơxái, tơ’noăng kơ’nŏng ƀă kơxâk:

“Á châ mâu tăm mố đô̆i gâk tơkăng kong tơmâng ngăn, tŏng kum kơhnâ khât, xuân kơnôm tiah mê á hiăng pơhlêh hên tung mâu tơdroăng, á kô mơ-eăm hriâm tâp rơkê tâ vâ mâu vâi tăm mố đô̆i pôi tá khéa. Hơnăm nếo, á rơkâu mâu vâi tăm mố đô̆i gâk tơkăng kong ai hên ivá, pêi klêi dêi hnoăng cheăng”.

Rơtế ƀă mâu kăn ƀô̆, lêng Đông mố đô̆i gâk tơkăng kong bo cheăng Thuận An tơkŭm po tơdroăng ro a rơnó Hơngui tơkăng kong hơtôu hiâm mơno kuăn pơlê, nâ H’Loen, ngế ki pơkuâ Đoân Droh rơtăm ƀon Bu Dak, cheăm Thuận An ăm ‘nâi, um méa mố đô̆i gâk tơkăng kong gá lĕm khât ƀă vâi krâ nhŏng o a tíu tơkăng kong. Mâu hơnăm hdrối, mâu lêng ki krâ kơlŏng ngiât đi đo rơtế ƀă vâi krâ nhŏng o tung pơlê.

Mâu ngoh tŏng kum kuăn pơlê pêi cheăng kâ, mơnhông pêi chiâk deăng, pro hngêi ối ăm rơpŏng kơtiê, mê nếo rơnêu, ‘mêng mâu kế tơmeăm hngêi trăng, troăng klông ki hiăng tơ’nhiê vâ vâi krâ nhŏng o tơ’lêi hlâu prôk lăm, pêt mâu hdrê loăng. Tíu lâi xơpá mê hlo ai  châ chăn dêi mâu vâi ngoh. Xua mê, vâi krâ nhŏng o tơdah Têt rơtế ƀă mâu lêng krâ kơlŏng ngiât rế ai tơ’nôm tơdroăng ki hơtôu, tơrŭm tơrôa.

“Kuăn pơlê tung pơlê ro khât drêng rơtế tơdah Têt ƀă mố đô̆i gâk tơkăng kong. Mâu ngoh hiăng kum vâi krâ nhŏng o hên tơdroăng tung rêh ối ƀă tung pêi cheăng kâ. Ƀă vâi krâ nhŏng o mê xuân rơtế ƀă mố đô̆i gâk tơkăng kong rak vế tíu tơkăng kong. Hơnăm nếo mê á rơkâu mâu ngoh mố đô̆i gâk tơkăng kong ai hên ivá, pêi klêi dêi hnoăng cheăng ƀă pơtối tơrŭm rơtế ƀă kuăn pơlê a tíu tơkăng kong”

Rơtế kơxuô kơƀăn chưng ƀă lêng mố đô̆i gâk tơkăng kong ƀă vâi krâ nhŏng o tung pơlê vâ tơdah Têt, nâ H’Lo Ren, cô hnê mầm non Hòa Bình, ƀon Sa Par, cheăm Thuận An ăm ‘nâi, hên hơnăm hdrối, tơdroăng cheăng tơdah Têt hơtôu, hơniâp ro ƀă tơrŭm môi tiah kố pơrá châ hbrâ rơnáu krâu”.

“Thái hnê chư ngin xuân hiăng rơtế ƀă mố đô̆i gâk tơkăng kong tung hên tơdroăng cheăng tung hên hơnăm hdrối. Chiâng vâ tối, mố đô̆i gâk tơkăng kong cho tíu hơgiên ăm kuăn pơlê a tíu tơkăng kong, ngin phiu ro khât. Hơnăm nếo mê á xuân rơkâu mâu ngoh mố đô̆i gâk tơkăng kong ai hên ivá, pêi pro tro hnoăng cheăng dêi tơná”.

Thươ̆ng tă Nguyễn Văn Thắng, Chính trị viên Đông mố đô̆i gâk tơkăng kong bo cheăng Thuận An ăm ‘nâi, tíu pêi cheăng kố ai hnoăng cheăng rak vế tíu tơkăng kong xŏn dâng 10km ƀă cheăm Thuận An (tơring Dak Mil). Kăn ƀô̆ tung đông đi đo mơnhên đông cho hngêi, tơkăng kong cho pơlê, hdroâng kuăn ngo cho nhŏng o môi kliâm môi klêa.

Mâu hơnăm hdrối mê hía nah đông đi đo pơkâ kơtăng tơdroăng ki pêi pro túa pơkâ “3 ối, ối ƀă tíu pêi cheăng, ối ƀă cheăm pơlê, ối ƀă kuăn pơlê” ƀă “4 rơtế - rơtế kâ, rơtế ối, rơtế pêi, rơtế tơpui nâl dêi vâi krâ nhŏng o”. Rêm hâi, mâu tôh, đô̆i ki pêi dêi hnoăng cheăng a cheăm pơlê, drêng ai mâu ngế ki châ kuăn pơlê loi môi tiah krâ pơlê, ngế ki pơkuâ thôn bâ hnê tối, mơhnhôk, kum kuăn pơlê hlê plĕng rêm tơdroăng a tíu tơkăng kong, tơneăn tâp hdró vâ ‘nâi mâu ngế ki pro xôi xua cheăm, tíu pêi cheăng pơkuâ ngăn, teăm tơbleăng tơdrêng mâu ngế ki bro xôi hnoăng pơkuâ tơnêi tơníu dêi tơnêi têa.

Malối, tơdroăng ki khu lêng pơkuâ ngăn xêh troăng tơkăng kong, tơneăn tâp hdró tíu tơkăng kong châ pêi pro tro khât ƀă nôkố a cheăm, tơring dêi đông pơkuâ ngăn 6 tôh ki rak ngăn troăng tơkăng kong tơneăn tâp hdró. Ing mê, rế hía rế mơjiâng tíu tơkăng kong tâi tâng kuăn pơlê, rak vế krá rơdêi tíu tơkăng kong tơnêi têa.

Thươ̆ng tă Nguyễn Văn Thắng xuân ăm ‘nâi, vâ tŏng kum mâu rơpŏng ki ai tơdroăng rêh ối xơpá ƀă vâi krâ nhŏng o a mâu pơlê cheăm châ xah hêi ro, tơdah Têt, Đông mố đô̆i gâk tơkăng kong bo cheăng Thuận An tơkŭm po tơdroăng Hơngui tíu tơkăng kong hơtôu hiâm mơno kăn pơlê tung pơlê. A rôh po tơdroăng, kô pơtroh troh kuăn pơlê hên tơmeăm ki pơxúa:

 “Tíu pêi cheăng tơrŭm ƀă Khu lo tŏng veăng tơring Dak Mil ƀă Vi ƀan hnê ngăn cheăm Thuận An tơkŭm po tơdroăng Hơngui tíu tơkăng kong hơtôu hiâm mơno kuăn pơlê tung pơlê. Tơdroăng diâp  tơmeăm lối 200 kơxuô, 25 theh ƀaoh hiêm khăm pơlât, 46 hnoăng liăn hriâm rơkê, tâi tâng lối 200 rơtih liăn, môi tiah ƀă tơdeoăng tơkŭm po hơngui tíu tơkăng kong hơtôu hiâm mơno kuăn pơlê tung pơlê mê tíu pêi cheăng kố ối pơtroh 2 tôh pêi dêi hnoăng cheăng chu troh kâ Têt rơtế ƀă kuăn pơlê, pêi pro tro hnoăng cheăng kal kí, hiâm mơno tơmiât, khŏm mơ-eăm rak vế hnoăng cheăng, gâk kring tíu tơkăng a troăng tơkăng kong châ xoăng cheăng pơkuâ ngăn”.

Rơtế ƀă kuăn pơlê tung lâp tơnêi têa, kăn ƀô̆, lêng ƀă kuăn pơlê a tíu tơkăng kong cheăm Thuận An, tơring Dak Mil, kong pơlê Dak Nông dế tơdah môi rơnó hơngui nếo tơrŭm, pơxúa. Khu lêng ƀă kuăn pơlê tơdjuôm ivá, môi hiâm mơno cho ivá rơdêi vâ tíu tơkăng kong Thuận An tối krê, kong pơlê Dak Nông tối tơdjuôm tơ’nôm krá ƀă rế hía rế mơnhông.