Tơdah phĭu kơdĭng liăn kơnâ 5 rơtuh liăn xua Khu pơkuâ Đoân Droh rơtăm Dak Lak tơrŭm ƀă mâu khu tŏng kum mơngế pá puât diâp ăm, jâ Võ Thị Thuận, ngế droh djâ troăng ahdrối hneăng hdrối nah a thôn Tân Hòa, cheăm Tân Lập, tơring Krông Ƀúk rơrêk tung hiâm mơno. Hiăng hluâ 70 hơnăm, rêm hâi jâ xuân ối lăm tôm kŏng kếo chhá, tơmeăm vâi hvât vâ rế tăng liăn rêh ối. Tung toăng hngêi tuăn pâ khu pú, jâ tối:

“A cheăm tơrŭm ƀă vâi droh rơtăm xuân pro ăm môi toăng hngêi tuăn pâ, rêm ngế tơdjuôm dêi pó môi iâ vâ mơjiâng pro toăng hngêi drêng mê nah kơnâ dâng 80 rơtuh liăn. Roh kố mê vâi ăm môi phĭu kơdĭng liăn kố’’.

Ƀă pôa Trần Văn Hùng, mô đô̆i hneăng hdrối nah a thôn 15, cheăm Tân Hòa, tơring Ƀuôn Đôn phiu ro má môi cho mâu hâi đoân viên droh rơtăm tung cheăm troh lăm pôu lơ veăng tŏng kum po văng kơdrum, chiâk deăng. Tơpui tơno ƀă mâu rơxông nếo, pôa pâ mâu hơnăm khế ton nah rơtế khu pú djâ troăng ahdrối tơplâ xua tơniăn krê tơnêi têa. Kơnôm tơdroăng tŏng kum dêi droh rơtăm mê mâu rơpŏng môi tiah pôa châ mơhnhôk tá hiâm mơno ƀă kế tơmeăm khoăng.

“Ngin ki hên cho pêi chiâk deăng mê mâu nhŏng o đoân viên droh rơtăm troh kum hâi pêi cheăng, tối dêi pó troh pêi cheăng kum 1 troh 2 roh, rêm roh xuân lối chât ngế đoân viên, tŏng kum ăm rơpŏng. Tá drêng ngin châi tamo, trâm xía vâ lơ drêng hôp hâi leh tơbâ mê đoân droh rơtăm xuân troh ƀă ai mâu kơxuô tơmeăm mơhnhôk teăm tơdrêng’’.

Kong pơlê Dak Lak nôkố ai vâ chê 60.000 hô sơ ngế ai hnoăng tơnêi têa, tung mê mê vâ chê 45.000 hô sơ ngế ai hnoăng, nhŏng o mơngế ai hnoăng ƀă lối 14.000 hô sơ mâu ngế ki ê cho droh rơtăm djâ troăng ahdrối. Rêm khế, kong pơlê Dak Lak mơhá hnoăng liăn tŏng kum ăm lối 10.000 ngế ai hnoăng, ƀă kơxô̆ liăn lối 21 rơtal liăn.

Klăng leh tơbâ 76 hơnăm Hâi mô đô̆i rong râ - hlâ hía, kong pơlê Dak Lak hiăng pêi pro lăm pôu, diâp kơxuô tơmeăm ăm mâu ngế ai hnoăng tơnêi têa ƀă tâi tâng kơxô̆ liăn lối 15 rơtal liăn; tơkŭm po djâ 55 ngế ai hnoăng ƀă kăch măng ki má môi dêi kong pơlê lăm ôm hêi a mâu kong pơlê peăng Tơdế tơnêi têa ƀă peăng Kơnhŏng; djâ 240 ngế ai hnoăng ƀă Kăch măng lăm pơlât, kâ trếo piê kơhiâm tơkŭm a Tíu xiâm pơlât ăm kâ trếo piê kơhiâm mơngế ai hnoăng tơnêi têa peăng Tơdế tơnêi têa.

Mơhno hiâm mơno ‘’Khoh niân tiah hâi kố kơnôm ai hnoăng vâi krâ nah’’, tung pơla kố nah, rơxông ối nếo Dak Lak hiăng ai hên tơdroăng pêi ki nhên, ki pơxúa tơmiât troh mâu rơpŏng ai hnoăng tơnêi têa, mô đô̆i châi rong, mô đô̆i hlâ tung tơplâ xâ nah tung kong pơlê. Mê cho mâu tơdroăng pleăng hnoăng cheăng, kum dêi pó tung tơdroăng rêh ối, pêt mơjiâng tơmeăm, mơhnhôk mâu  khu râ mơjiâng hrĭng toăng hngêi tuăn pâ khu pú hên, diâp rơpâu kơxuô tơmeăm, phĭu kơdĭng liăn kum mâu rơpŏng kơdroh pá puât. Krê 6 khế apoăng hơnăm kố, lâp kong pơlê hiăng tơkŭm po vâ chê 300 tơdroăng pêi cheăng pâ mơnê mâu ngế ai hnoăng, mơnê khoh châ niân tiah hâi kố kơnôm ai hnoăng dêi vâi krâ nah, tơdrêng amê ƀă mâu tơdroăng troh lăm pôu ngăn tíu koh tơbâ mâu ngế ai hnoăng kân, hnê hriâm khôi túa kăch măng ăm droh rơtăm phô̆m xông kân.

Ki rơhêng vâ tối tung khế 7 rêm hơnăm, a mâu kong pơlê ai hên tơdroăng pêi mơhnhôk tơdroăng “Pâ mơnê mơngế ai hnoăng’’, ‘’Khoh châ niân tiah hâi kố kơnôm ai hnoăng dêi vâi krâ nah’’ xua Khu pơkuâ Đoân Droh rơtăm kong pơlê mơhnhôk. Nâ Phan Thị Trinh, Kăn pơkuâ hnê ngăn Đoân Droh rơtăm kong pơlê Dak Lak tối ăm ‘nâi.

‘’Mâu khu pơkuâ Đoân droh rơtăm pêi pro mâu tơdroăng pâ mơnê mơngế ai hnoăng, mơnê hnoăng vâi krâ nah vâ hnê hriâm ăm đoân viên, droh rơtăm phô̆m xông kân, vâi hdrêng ‘na khôi túa kăch măng, hâk tơngăm hdroâng mơngế, hnoăng cheăng dêi rơxông chal nếo hâi kố. Mâu khu pơkuâ Đoân Droh rơtăm mê xuân tơkŭm po mâu tơdroăng lăm kơ-êng ƀă hbru tơmeăm ăm mâu rơpŏng ai hnoăng tơnêi têa, ai hnoăng ƀă kăch măng, Jâ Nôu Việt Nam khên tơnôu, ai mâu tơdroăng rơnêu um meăn, tíu koh tơbâ mâu ngế khên tơnôu hlâ tung tơplâ xâ, tơkŭm po lêh têk nhang tơbâ mâu ngế khên tơnôu a kơmăng hâi lơ 26/7 rơtế ƀă tâi tâng tung lâp kong pơlê”.

Tiô Khu pơkuâ cheăng pêi – Mô đô̆i rong ƀă Pơlê pơla kong pơlê Dak Lak, tung la ngiâ, kơvâ cheăng kô pơtối thăm pêi pro rơdêi tâ nếo tơdroăng pơtâng tối vâ rơxông hơnăm ối nếo hlê plĕng ‘na khôi túa tơplâ xâ dêi mâu ngế khên tơnôu hlâ tung tơplâ xâ, mâu tơdroăng pleăng kân kĭn dêi rơxông pâ pôa, ngoh nâ. Ing mê, mơnhông khôi túa lĕm tro hdroâng mơngế, tơdrêng amê pêi lĕm tro tâ nếo tơdroăng ‘’Pâ mơnê hnoăng kân kĭn’’. Pakĭng mê, cho pêi pro teăm tơdrêng, châ tơƀrê mâu troăng hơlâ kơjo dêi Tơnêi têa, pro tơ’lêi hlâu vâ mơngế ai hnoăng ƀă rơpŏng tơniăn tơdroăng rêh ối, pơtối mơnhên ƀă mơnhông mơdêk khôi túa kăch măng dêi rơpŏng, hdroâng hdrê. Pêi lĕm tro tâ tơdroăng cheăng kố cho troăng pêi troh la ngiâ pơkâ xiâm rak ngăn ăm rơpŏng ai hnoăng tơnêi têa, ai hnoăng ƀă kăch măng ai kơlo rêh ối tơdâng lơ hôm tâ kuăn pơlê a kơpong rêh ối a mê.