Vi ƀan kong pơlê Dak Lak nếo tơkŭm po Hneăng hôp mơnhên tơdroăng po rơdâ pêi pro mâu tơdroăng pơkâ xiâm tơnêi têa hneăng hơnăm 2021 – 2023, troăng pêi, hnoăng cheăng ki xiâm hneăng hơnăm 2023 – 2025 ƀă mơnhên pêi pro tung hneăng hơnăm 2026 – 2030. Pêi pro 3 tơdroăng pơkâ xiâm tơnêi têa (Thôn pơlê nếo, kơdroh kơtiê krá tơniăn ƀă mơnhông mơdêk cheăng kâ – rêh ối pơlê pơla kơpong kuăn pơlê hdroâng kuăn ngo ƀă kong ngo), Dak Lak hiăng châ pơcháu vâ chê 2.320 rơtal liăn.

Tung mê, tơdroăng mơnhông mơdêk cheăng kâ – rêh ối pơlê pơla kơpong kuăn pơlê hdroâng kuăn ngo ƀă kong ngo châ hên, ƀă kơxô̆ liăn lối 1.000 rơtal liăn; Tơdroăng kơdroh kơtiê krá tơniăn hiăng pơcháu lối 382 rơtal liăn; Tơdroăng mơjiâng thôn pơlê nếo hiăng pơcháu lối 927 rơtal liăn. Pakĭng kơxô̆ liăn ngân Tơnêi têa, Dak Lak hiăng mơhnhôk châ dâng 1.542 rơtal liăn tung 3 hơnăm 2021 – 2023 vâ pêi pro tơdroăng pơkâ tơnêi têa mơjiâng thôn pơlê nếo.

Pôa Phạm Ngọc Nghị, Kăn hnê ngăn Vi ƀan kong pơlê, Kăn pơkuâ Hnê mơhno mâu Tơdroăng pơkâ xiâm tơnêi têa kong pơlê Dak Lak mơnhên, tung la ngiâ, kong pơlê kô mơ-eăm tah lôi mâu pá puât, vâ mâu tơdroăng mơnhông châ tơƀrê má môi. Tung mê, tơdroăng tơnêi ối pêt mơjiâng tơmeăm tung kơpong hdroâng kuăn ngo kô châ kơjo tŏng kum, tơniăn ăm kuăn pơlê hdroâng kuăn ngo tơniăn tơdroăng rêh ối:

“Nôkố tiô tơbleăng mê dâng 23% kuăn pơlê hdroâng kuăn ngo ối kơtiê tung tâi tâng kuăn pơlê hdroâng kuăn ngo, laga 65% kuăn pơlê hdroâng kuăn ngo tung tâi tâng kơxô̆ kơtiê dêi kong pơlê, môi kơxô̆ cho kân. Kơtiê mê ai hên tơdroăng ki hdrối vâi xuân tối ôh tá ai tơnêi pêt mơjiâng tơmeăm, tơnêi ối, ôh tá ai liăn ngân vâ pêt mơjiâng tơmeăm.

Pin dế tơkŭm ăm tơdroăng tŏng kum hdroâng kuăn ngo mê kơjo má môi dêi Khu râ kăn pơkuâ cheăng Đảng kong pơlê, Vi ƀan xuân cho tơnêi pêt mơjiâng tơmeăm, tơnêi ối ăm kuăn pơlê hdroâng kuăn ngo. Pin chiâng pêi hên tơdroăng ki ê mê kuăn pơlê xuân ôh tá tŭm tơnêi pêi chiâk deăng, tơnêi ối, ôh tá ai tŭm mâu tơmeăm vâ pêt mơjiâng tơmeăm khoăng vâ rêh ối mê gá ôh tá ai kơnâ klâi ôh’’.

Pơla kố nah, a pơlê kong kơdrâm Plei Ku xuân tơkŭm po hneăng hôp mơnhên tơdroăng châ tơƀrê pêi pro Pơkâ dêi Khu pơkuâ cheăng Đảng kong pơlê Gia Lai ‘na thăm pơkuâ hnê mơhno dêi mâu khu râ kăn pơkuâ hnê ngăn cheăng Đảng ‘na mơjiâng thôn pơlê nếo tung kuăn pơlê hdroâng kuăn ngo. Tiô tơbleăng, 5 hơnăm hiăng hluâ, mâu tơring tung kong pơlê hiăng mơhnhôk lối 1.500 rơtal liăn vâ pêi pro mơjiâng thôn pơlê nếo tung kơpong kuăn pơlê hdroâng kuăn ngo.

Tung mê, liăn ngân tơnêi têa vâ chê 1.300 rơtal liăn, kơxô̆ liăn ngế tê mơdró tŏng kum vâ chê 24 rơtal liăn, kơxô̆ liăn kuăn pơlê veăng tơlo lối 153 rơtal liăn, kơxô̆ liăn mung 43,5 rơtal liăn. Klêi kơ’nâi 5 hơnăm, nôkố lâp kong pơlê ai 110 thôn, pơlê kuăn pơlê hdroâng kuăn ngo châ plah thôn pơlê nếo, tơdroăng rêh ối dêi kuăn pơlê rế hía rế châ tơtêk.

Laga tơdroăng pêi pro 3 tơdroăng pơkâ xiâm tơnêi têa a mâu kong pơlê Tây Nguyên xuân ối hên pá puât; mâu tơdroăng tơkêa bro, tơdroăng xiâm mơjiâng tá hâi chiâng pêi pro ƀă mơ’no liăn pêi cheăng xua tá hâi troăng hnê mơhno tŭm dêi Tơnêi têa. Tơdroăng séa ngăn, mơnhên pơkâ pêi xo điêm xing xoăng, mơnhên inâi tơdroăng tơkêa bro mơ’no liăn cheăng ối hên tơvâ tơvân.

Pôa Trương Thế Vinh, Kăn ƀô̆ pêi cheăng tŏng kum hdroâng kuăn ngo a tơring Ia Grai, kong pơlê Gia Lai tối, kăn ƀô̆, tíu cheăng dế trâm pá khât drêng pêi pro tơdroăng.

“Ai hên mơ-éa dêi kong pơlê tá hâi teăm tơdrêng tâng pơchông ƀă pêi pro tơdroăng pêi cheăng, ki rơhêng vâ tối a mâu tíu cheăng tá hâi ai hnê mơhno i nhên. Ki rơhêng vâ tối tơdroăng tơkêa bro 1 tŏng kum hngêi ối, tơnêi ối, tơnêi pêt mơjiâng tơmeăm tiô pơkâ 04 dêi Ngế pro xiâm hnê ngăn Chin phuh mê tŏng kum tơnêi ối ƀă kơlo 44 rơtuh/rơpŏng ƀă tơnêi pêt mơjiâng tơmeăm 22 rơtuh/rơpŏng mê pá vâ pêi pro.

Tơnêi pêt mơjiâng tơmeăm ăm kuăn pơlê mê yă kơnâ, ƀă kơxô̆ liăn tŏng kum môi tiah kơpêng mê ƀă kơxô̆ liăn mung môi tiah mê, mê kuăn pơlê ôh tá bê ƀăng tơnêi vâ pêt mơjiâng tơmeăm, mơjiâng pro hngêi’’.

A Kon Tum, nếo achê kố, lối 1.000 đoân viên, droh rơtăm kong pơlê Kon Tum hiăng veăng tơdroăng trâm mâ, tơpui tơno ƀă Kăn hnê ngăn Vi ƀan kong pơlê, ƀă dó inâi ‘’Mơnhông mơdêk hnoăng dêi droh rơtăm tung tơdroăng pêi pro mâu Tơdroăng pơkâ xiâm tơnêi têa tung kong pơlê Kon Tum’’.

Pôa Lê Ngọc Tuấn, Kăn hnê ngăn Vi ƀan kong pơlê Kon Tum mơnhên, kố cho tơdroăng ki xiâm ki kal tung mơnhên troăng prôk la ngiâ ăm rơxông ối nếo tung tơdroăng veăng mâu tơdroăng ki xiâm kum pêi pro ƀlêi trâng hnoăng cheăng kâ – rêh ối pơlê pơla hơnăm 2023 dêi kong pơlê. Vâ rơxông ối nếo Kon Tum veăng kum hên tâ mê nếo tung pêi pro mâu Tơdroăng pơkâ pêi xiâm tơnêi têa, pôa Lê Ngọc Tuấn, tối:

“Khu pơkuâ cheăng Đoân Droh rơtăm kong pơlê, mâu khu pơkuâ tơdroăng cheăng Đoân Droh rơtăm tơring, pơlê kong kơdrâm pêi pro lĕm tro mâu tơdroăng pêi pro kăch măng tơniăn troh lâp lu, tơdroăng ki mơnhên troăng, ki châ tơƀrê, ki krá tơniăn, ki tơmiât pêi rơkê. Tung mê tơkŭm tung mâu tơdroăng môi tiah pơtâng tối ‘na mơjiâng thôn pơlê nếo, kơdroh rơpŏng hdroh rơtăm kơtiê, veăng mơjiâng rơnêu troăng klông ƀă troăng thôn pơlê. Mơjiâng mâu troăng pêi tơdjêp mơnhông mơdêk cheăng kâ dêi droh rơtăm’’.