A drô troăng tơkăng kong tơnêi têa tơkăng kong ƀă kong têa Lếo ƀă Kul kơpong hluâ kong pơlê Kon Tum, tơdroăng tơdah Têt hmâ rĕng pro hdrối. Mâu khu rơxế dêi khu râ kăn pơkuâ mâu râ, khu tơrŭm pơkuâ cheăng hiăng pơtroh hbru tơmeăm Têt troh ƀă khu mô đô̆i – kuăn pơlê a tíu tơkăng kong dêi Tơnêi têa môi tiah tơdroăng ki apoăng tối tơbleăng rơnó Hơngui hiăng troh. Đăi tă Phạm Văn Lâm, Kăn pơkuâ Kal kí, Khu xiâm pơkuâ Mô đô̆i gâk tơkăng kong dêi kong pơlê Kon Tum tối ăm ‘nâi, ƀă kăn ƀô̆, lêng mâu Đông mô đô̆i gâk tơkăng kong, ƀă khôi túa rŭm môi mơheăm chhá ƀă kuăn pơlê, rơnó Hơngui vêh, Têt troh cho roh vâ tuăn pâ pơla khu mô đô̆i – kuăn pơlê tíu tơkăng kong thăm rế tơrŭm krá tơniăn:

 “Hdrối rơnó Hơngui, Têt tiô khôi hmâ vâi krâ nah dêi hdroâng mơngế, mê Đảng ủy, Khu xiâm pơkuâ Mô đô̆i gâk tơkăng kong dêi kong pơlê rơtế tơrŭm ƀă mâu khu, mâu tíu cheăng mơhnhôk kăn ƀô̆ lêng rơtế tơdjuôm ivá tŏng kum khu râ kăn pơkuâ hnê ngăn Đảng, khu râ kăn pơkuâ ƀă kuăn pơlê a kơpong tơkăng kong châ kâ Têt hơtô, tơrŭm tuăn pâ khu lêng – kuăn pơlê. Tơdrêng amê, xuân mơhno tơdroăng ki pâ mơnê dêi kăn ƀô̆, lêng gâk tơkăng kong ƀă kuăn pơlê a kơpong tơkăng kong hiăng kum, tŏng kum, tơrŭm kơpong mô đô̆i gâk tơkăng kong séa ngăn, pơkuâ, gâk kring troăng tơkăng kong, tơneăn gâk kring tơniăn thôn pơlê a kơpong tơkăng kong’’.

Ƀă tơdroăng khŏm mơ-eăm djâ Têt troh tâi tâng mâu rơpŏng kuăn pơlê ƀă thôn pơlê a 13 cheăm tơkăng kong ối tung 4 tơring dêi kong pơlê, sap ing khế 12/2023 Khu xiâm pơkuâ Mô đô̆i gâk tơkăng kong kong pơlê Kon Tum hiăng mơjiâng pơkâ pêi tơkŭm po Tơdroăng ‘’Rơnó Hơngưi tơkăng kong hơtô hiâm mơno kuăn pơlê” ƀă “Hâi tơkŭm dêi pó kơdrâm sôk ro pro kơƀăn tơxông’’ Têt Lo hơnăm nếo Giáp Thìn hơnăm 2024 tung lâp troăng tơkăng kong.

Ing mâu tơdroăng ki pêi pro ai pơxúa dêi kăn ƀô̆, mâu lêng gak tơkăng kong tơkŭm po, môi tiah: mơđah tơbleăng ăm dêi pó khôi túa lĕm, hơdruê xuăng dó inâi “Koh mơnê Đảng, phiu ro rơnó Hơngui’’; mê khu kăn ƀô̆, mâu lêng po tơ’noăng kơxuô, pế kơƀăn tơxông ƀă mâu kơƀăn ki ê ăm vâi krâ kuăn pơlê hdroâng kuăn ngo; diâp hnoăng liăn hriâm rơkê ăm hok tro; lăm pôu, diâp kơxuô tơmeăm ăm rơpŏng ai hnoăng tơnêi têa, rơpŏng kơtiê ƀă hía hé, hiăng mơdêk tơ’nôm tơdroăng tơrŭm môi tuăn, rŭm môi mơheăm chhá khu lêng – kuăn pơlê. Pôa A Kiểu - Krâ pơlê, hngêi ối a pơlê Nông Kon, cheăm tơkăng kong Đăk Dục, tơring Ngọc Hồi, tối:

 “Um méa gâk tơkăng kong cho hlo nhên khât ƀă kuăn pơlê a kố. Tơdroăng phiu ro kân. Ahdrối cho kơƀăn tơxông, hơnăm ki lâi xuân môi tiah mê pơrá tơkŭm po tơmiât troh ‘na mơngế kơtiê. Khu lêng – kuăn pơlê môi tiah ká ƀă têa, cho achê, cho hmâ lĕm ƀă tŏng kum kuăn pơlê tâi ivá tơná’’.

Vâ tơdroăng phiu ro Têt troh tơrêm ngế, rêm toăng hngêi, kăn ƀô̆, lêng mâu đông mô đô̆i gâk tơkăng kong a tíu tơkăng kong kong pơlê Kon Tum hiăng ai tơdroăng ki hbrâ nhên vâ tơkŭm po Tơdroăng pêi pro “Rơnó Hơngui tơkăng kong hơtô hiâm mơno kuăn pơlê tung pơlê” pêi pro ƀă “Hâi tơkŭm kơdrâm dêi pó kơƀăn tơxông’’ Têt lo hơnăm nếo Giáp Thìn hơnăm 2024 tơtro ƀă tơdroăng kal vâ, kơnía.

Pôa Bloong Hâm, Kăn phŏ hnê ngăn Vi ƀan cheăm Đăk Dục, tơring Ngọc Hồi, tơring ai 7km troăng tơkăng kong tơnêi têa tơkăng ƀă kong têa pú hmâ Lếo, tối ăm ‘nâi:

 “Khu mô đô̆i gak tơkăng kong dêi kong pơlê đi đo tơrŭm ƀă khu râ kăn pơkuâ cheăm a kố tung tơdroăng tơkŭm po tơdroăng kơƀăn tơxông ăm mâu thôn pơlê. Pêi pro tơdrêng tơdroăng mơđah tơbleăng hơdruê xuăng, krê kuăn pơlê pơkuâ dêi hnoăng vâ pro ăm tíu mê phiu ro drêng rơnó Hơngui vêh. Ƀă mâu ngế ki pá puât tung tơring mê mâu rơpŏng tiah hmâ ki ê diâp iâ tâ, mê mâu rơpŏng kơtiê, vâ chê kơtiê mê hên tâ. Lơ ai mâu kơxuô tơmeăm ki ê ƀă mâu kế tơmeăm, ƀă liăn mâ vâ mâu rơpŏng kơtiê, vâ chê kơtiê xuân châ kâ Têt tiô khôi hmâ vâi krâ nah môi tiah mâu rơpŏng ki ê tung cheăm’’.

Thiê̆u tă Nguyễn Văn Trường, Cheăng kal kí Đông mô đô̆i gâk tơkăng kong Dục Nông, tơring Ngọc Hồi, kong pơlê Kon Tum, tối ăm ‘nâi rơtế ƀă 500 kilô tơxông xua Khu xiâm pơkuâ Mô đô̆i gâk tơkăng kong kong pơlê ăm, ƀă hiâm mơno tŏng kum dêi pó, tŏng kum ƀă mâu rơpŏng kơtiê, rơpŏng hdroâng kuăn ngo pá puât, kăn ƀô̆ mô đô̆i đông tơlo tơ’nôm kơxô̆ liăn, xúa kế tơmeăm khoăng châ ai ing mơdêk pêt mơjiâng tơmeăm vâ tơkŭm po Têt ăm vâi krâ kuăn pơlê.

Mô đô̆i gâk tơkăng kong tơmiât troh kuăn pơlê kơtiê tơkăng kong – Têt troh ƀă rêm ngế, rêm toăng hngêi’’ hiăng ôh tá xê to rơkong tối pơtâng tê vâ pêi pro mê cho pơkâ pêi ing plâi nuih dêi mâu ngế lêng mô đô̆i gâk tơkăng kong:

 “A kơpong tơkăng kong tơdroăng pơkâ, tơdroăng rêh ối dêi kuăn pơlê ối trâm hên pá puât. Vâ rơtế ƀă vâi krâ kuăn pơlê châ kâ Têt phiu ro, hơtôu mê Đông mô đô̆i gâk tơkăng kong tơrŭm ƀă khu râ kăn pơkuâ hnê ngăn Đảng, khu râ kăn pơkuâ kong pơlê, mâu khu râ, kơvâ cheăng, rêm râ pơkuâ cheăng tơkŭm mâu tơdroăng tŏng kum tơmeăm Têt ăm kuăn pơlê a rơnó Hơngui gâk tơkăng kong hơtô hiâm mơno kuăn pơlê, kơƀăn tơxông, tơkŭm po mâu Leh mơdĭng tiô khôi vâi krâ nah; kum mâu rơpŏng kơtiê, rơpŏng pá puât, rơpŏng ai hnoăng tơnêi têa, mâu vâi muăn hok tro ai tơdroăng rêh ối pá puât. Đông mô đô̆i gâk tơkăng kong đi đo rơtế prôk, tơkŭm po ăm kuăn pơlê a kơpong tơkăng kong châ kâ Têt cho hơtô ‘nâng, tơniăn, ro ƀă kơdĭng’’.

Hâi má 30 Têt, plâ lối 292 km troăng tơkăng kong tơkăng kong têa pú hmâ Lếo ƀă Kul kơpong tơkâ hluâ kong pơlê Kon Tum, kăn ƀô̆, lêng gâk tơkăng kong ƀă kuăn pơlê tíu kố dế rơtế tơkôm chôu pơhlêh pơla hơnăm ton Quý Mão ƀă hơnăm nếo Giáp Thìn. Tơdrêng amê ƀă hiâm mơno phiu ro Têt laga ôh tá piu hiât lôi hnoăng cheăng, khu lêng – kuăn pơlê a tơkăng kong Kon Tum dế rơtế môi hiâm mơno, rŭm môi tuăn gâk kring tơniăn hnoăng pơkuâ, rak vế ngăn tơkăng kong tơnêi têa vâ rơnó Hơngui troh tá ah rơtế ƀă hdroâng mơngế.