Rơpŏng nâ Bàn Thị Hằng cho môi tung mâu rơpŏng pêi cheăng kâ rơkê dêi cheăm Quân Chu, tơring Đại Từ, kong pơlê Thái Nguyên. Kơnôm ing tơdroăng kơhnâ, on veăng nâ Hằng hiăng bro túa pơkâ pêt loăng plâi kâ ƀăng tơnêi pêt lối 3ha priât, vâ chê 3 rơpâu xiâm krui ƀŏng, plâi ói ƀă plâi treăng jế, pêi lo liăn tơniăn lối hrĭng rơtuh liăn rêm hơnăm.

Nâ Bàn Thị Hằng ăm ‘nâi, kố xuân cho tơdroăng tơƀrê ing tơdroăng tơdâng tơ’mô, rơtế veăng pêi dêi on veăng nâ, sap ing xo dêi rơpó nah troh nôkố:

“Tung tơdroăng rêh ối rơpŏng hngêi, kơnốu á xuân veăng pêi mâu tơdroăng cheăng tung rơpŏng hngêi ƀă tơdroăng cheăng pêi rêm hâi. Xua mê, á toh chôu châ bro lĕm ăm dêi tơná”.

Ngoh Nguyễn Văn Dân, kơnốu nâ Hằng ai tối:

 “Túa tơmiât á cho kum ăm dêi kơdrâi. Vêh ing pêi cheăng troh a hngêi kố rơtế ƀă dêi kơdrâi pế hmê, pêi kơdrum, mâu tơdroăng cheăng dêi rơpŏng hngêi tŏng kum kơdrâi kuăn. Á hlo tiah mê gá hơniâp to khât”.

Ƀă nâ Nguyễn Thị Luyện a cheăm Đồng Thịnh, tơring Định Hóa, kong pơlê Thái Nguyên, tơdroăng ki ro rêm chôu drêng klêi pêi cheăng cho tơdroăng cheăng tung rơpŏng hngêi ƀă rak ngăn kuăn nĕng hiăng châ kơnốu pêi tâi. Maluâ ai kuăn pơrá cho kơdrâi, tơdroăng rêh ối chía niân, la rơpŏng on veăng nâ xuân ôh tá tơmiât vâ ai tơ’nôm kuăn kơnốu.

Tơdroăng ki hơniâp ro kum on veăng nâ rêh ối hơniâp, mâu kuăn ‘nĕng nguăn loi hriâm rơkê hên hơnăm hlối rơpŏng pơrá châ inâi rơpŏng rơkê plĕng. Nâ Nguyễn Thị Luyện ăm ‘nâi:

“Á bro cô hnê mầm non mê cho môi tơdroăng cheăng ki xơpá la kơnốu á veăng pêi mâu tơdroăng cheăng tung rơpŏng hngêi ƀă á, ối a hngêi pêi tâi mâu tơdroăng cheăng môi tiah pêi chiâk, tơdroăng cheăng a hngêi, păn roăng kuăn kum á mê á hlo phiu ro khât”.

Hdrối nah tung hdroâng kuăn ngo đi đo ai tơdroăng tơmiât “kal kơnốu, ôh tá vâ kơdrâi”. Mâu khôi túa tơlá ki ôh tá tro sap ing ton nah hiăng pro vâi kơdrâi chiâng khu ki ôh tá châ tơpui. Vâ rế hía rế hơ’lêh túa tơmiât kố, jâ Dương Thị Thanh Luyến, Kăn hnê ngăn vâi kơdrâi tơring Đại Từ, kong pơlê Thái Nguyên ăm ‘nâi:

 “Ngin xuân hiăng hnê mơhno mơjiâng mâu túa pơkâ, mâu túa pêi ki pơtih túa pơkâ, kâu lak ƀô̆ hbrâ mơdât bro pơlăm pơlối a vâi hdrêng ƀă vâi ‘nĕng, kâu lak ƀô̆ hbrâ mơdât xiăn pâm tung rơpŏng hngêi; tŏng kum vâi kơdrâi mơjiâng mâu khu pêi cheăng tơrŭm, tôh tơrŭm hriăn ngăn, khu ki hâk vâ dêi vâi kơdrâi vâ mơdêk tơdroăng mơnhông cheăng kâ khu pêi cheăng tơrŭm”.

Riân troh tâi hơnăm nah, kơxô̆ vâi kơdrâi hriâm thak sih tung tâi tâng kơxô̆ ngế ki ai ƀâng thak sih dêi kong pơlê Thái Nguyên châ 54,0%. Kơxô̆ vâi kơdrâi pro kăn pơkuâ, bro ngế ki pơkuâ khu mơdró kâ xua vâi kơdrâi pro ngế ki pơkuâ, ivá mơ-eăm hiăng hluăn ing kơtiê, veăng kum kơdroh kơxô̆ rơpŏng kơtiê a kong pơlê chu ối lối 4%.

Pôa Hoàng Văn Chính, kăn phŏ pơkuâ Hdroâng kuăn ngo kong pơlê Thái Nguyên tối nhên:

 “Tung la ngiâ ah, Vi ƀan hdroâng kuăn ngo kong pơlê Thái Nguyên xuân ối pơtối tí tăng ‘nâi plĕng ăm râ Đảng ƀă khu kăn pơkuâ mâu cheăm tơring a kong pơlê cho mâu cheăm tơring athế kơhnâ, pơtối mơdêk hnê tối ‘na tơdâng tơ’mô pơla kơnốu ƀă kơdrâi. Malối cho mâu tơdroăng ki kal hiăng châ chêh tung tơdroăng pơkâ dêi tơnêi têa ‘na mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo”.

Tơdâng tơ’mô pơla kơnốu ƀă kơdrâi cho tơdroăng cheăng tung la ngiâ ôh ti chiâng klâ tung pơla mơjiâng ƀă mơnhông cheăng kâ rêh ối kơpong hdroâng kuăn ngo. Tơdroăng ki mơdêk pro tơdâng tơ’mô pơla kơnốu ƀă kơdrâi kơpong hdroâng kuăn ngo tơtro ƀă mơnhông tơdâng tơ’mô ‘na hngêi trăng troăng klông ki kal, hiăng mơdêk tơdroăng cheăng kâ rêh ối dêi kong pơlê Thái Nguyên rế hía rế mơnhông.

Ing mê, kô rế hía rế ai hên vâi kơdrâi châ xúa rôh tơ’lêi vâ hriâm ƀối ing dêi rơpó, mơdêk ki kơnía ƀă chiâng mâu ngế ki kal, veăng kum ăm mơnhông mơdêk tơdjuôm dêi pơlê pơla.