Ki tâ hâk apoăng tung tơdroăng séa ngăn râ kăn xiâm dêi Kuô̆k hô̆i cho roh kơ-êng ƀă tiâ rơkong kơ-êng a Hneăng hôp má 6 drêng châ mơnhên cho ‘’pơhlêh nếo’’, ‘’phá tơ-ê’’, thăm nếo ‘’tá hâi ai pơkâ’’ drêng séa ngăn ‘na tơdroăng kơ-êng, troăng tơkŭm po, ƀă tơdroăng ki hvái ngăn hên tâ tơdế hneăng cheăng. Ôh tá xê to cho roh kơ-êng môi tiah hmâ dêi hneăng hôp hdrối, mê roh kơ-êng kố hiăng chêh hdró xua “roh apoăng” cho phá tơ-ê môi tiah Kăn xiâm hnê ngăn Kuô̆k hô̆i Vương Đình Huệ xông tơpui:

“Kố cho roh apoăng tung hneăng XV, Ngế pro xiâm hnê ngăn tơnêi têa, tâi tâng mâu Ngế xiâm phŏ hnê ngăn Chin phuh ƀă 21 Ngế xiâm, Kăn pơkuâ kơvâ hiăng tiâ rơkong kơ-êng mâu kăn teăng mâ Kuô̆k hô̆i. Ƀă tơdroăng kơ-êng rơdâ, tơdjâk troh 21 kơvâ phá tơ-ê dêi pó, 10 pơkâ dêi Kuô̆k hô̆i châ hdrâ lĕm chiâng 4 khu kơvâ tiô troăng tơmiât pêi rơkê dêi Vi ƀan hnê mơhno má môi Kuô̆k hô̆i’’.

Roh apoăng tung hneăng má 15, Kuô̆k hô̆i tơkŭm kơ-êng mâu kăn cheăng tung Chin phuh ‘na tơdroăng pêi pro mâu pơkâ dêi Kuô̆k hô̆i hneăng má 14 ƀă sap apoăng hneăng Kuô̆k hô̆i hneăng má 15 troh tâi Hneăng hôp má Pŭn ‘na séa ngăn tơdroăng cheăng châ hriăn plĕng tơpui tơno, ‘na kơ-êng ƀă mâu kơvâ cheăng. Kơpong kơ-êng rơdâ, tơdjâk troh 4 khu kơvâ cheăng kâ tâi tâng; cheăng kâ kơvâ; tơdroăng kal kí tung tơnêi têa, luât; khôi túa lĕm tro, rêh ối pơlê pơla.

Roh kơ-êng ối tơ’nôm tơdroăng nếo, mê cho mâu Pơkuâ Vi ƀan dêi Kuô̆k hô̆i xuân “tơkŭm po tơpui tơno” veăng mơnhên inhên tơdroăng. Kăn teăng mâ ƀă kuăn pơlê pơrá kheăn kơdeăn mâu tơdroăng vêh séa ngăn dêi Kuô̆k hô̆i.

Hdrối mê, a Hneăng hôp má 5, ƀă 4 khu kơvâ cheăng: pêi cheăng, tê mơdró ƀă pơlê pơla; khoa hok ƀă kŏng ngê̆; troăng klông ƀă rơxế kơtâu ƀă hdroâng mơngế châ rah xo, hên hĭn tơdroăng ki hâk ‘nâng, roh apoăng châ tơƀrê a roh kơ-êng ƀă hiâm mơno ‘’5T’’ (Tá hiâm mơno – Tâi ivá – Pêi kơhnâ – Tá hiâm mơno – Pôu râng hnoăng cheăng), mê cho: 454 roh kăn teăng mâ kĭ veăng kơ-êng , 112 kăn teăng mâ pêi pro hnoăng kơ-êng ƀă 49 roh kăn teăng mâ tơtŭng vâ mơnhên inhên tâ tơdroăng - kố pơrá mâu tơdroăng châ tơƀrê má môi.

Ƀă tơdroăng hbrâ inhên khât ‘na tŭm tơdroăng, ôh tá xâu tro trâm, mâu kăn teăng mâ hiăng kơ-êng thế khŏm tiâ rơtế hnoăng pơkuâ Tơnêi têa dêi ngế krê ngế ối a ko ƀă mâu kơ koan cheăng ƀă mâu kơƀâng tơtŭng. Tiô mâu kăn teăng mâ Trần Thị Vân, khu dêi Bắc Ninh tơdroăng hên mâu kăn teăng mâ tiê nut tơtŭng xuân mơhno hiâm mơno séa ngăn troh tui lui ƀă ăm hlo ki pơxúa dêi kuăn pơlê, pơxúa dêi tơnêi têa hiăng châ ‘măn a kơpêng tâi tâng.

“Tơdroăng tơpui a hngêi hôp kân cho kơdrâm mơngế tơpui, ôh tá xê to mâu kăn teăng mâ kơ-êng mê klêi kơ’nâi kơ-êng drêng Ngế xiâm tiâ mê pơtối ai mâu kăn teăng mâ vâ tơtŭng hên tâ’’.

Ƀă séa ngăn tơdroăng cheăng châ hriăn plĕng tơpui tơno, môi tơdroăng châ hriăn plĕng tơpui tơno séa ngăn dêi Kuô̆k hô̆i châ pêi pro tơdế hneăng, “apoăng séa ngăn”, rơtế ƀă tơdroăng pêi pro, pơkuâ. Roh apoăng, môi tơdroăng châ hriăn plĕng tơpui tơno séa ngăn tơdjêp tŭm 3 tơdroăng pơkâ pêi troh Tơnêi têa kal khât dêi tơnêi têa môi tiah Kăn xiâm phŏ hnê ngăn Kuô̆k hô̆i, Kăn xiâm séa ngăn Trần Quang Phương tối nhên:

“Kố cho roh apoăng Kuô̆k hô̆i séa ngăn tâi tâng 3 tơdroăng pơkâ pêi thế châ tơƀrê tơnêi têa ƀă châ tơkŭm po tơdế hneăng. Tơdroăng ki mê mơhno nhên troăng pêi sap ing rĕng, ing hơngế dêi Kuô̆k hô̆i vâ rơtế prôk ƀă Chin phuh’’.

Ƀă hiâm mơno hbrâ xêh, “séa” thế “ngăn”, tơdrăng, ôh tá ví, teăm tơdrêng ‘nâi mâu tơdroăng pá puât, tơvâ tơvân, Kuô̆k hô̆i pơtối prôk rơtế Chin phuh vâ ti tăng mâu troăng pêi ki tơtro tâ, ki má lối cho drêng pêi pro pái tơdroăng pơkâ pêi thế châ tơƀrê tơnêi têa hneăng hơnăm 2021 – 2025 bu u ối péa hơnăm nếo cho thế châ plah. Séa ngăn ƀă hiâm mơno pêi đi đo cho mơjiâng ƀă tơtrâ, tung mê mơjiâng xuân cho xiâm kối vâ rêm tơdroăng cheăng rế hía rế lĕm tâ, kố cho tơdroăng Kăn xiâm hnê ngăn Kuô̆k hô̆i Vương Đình Huệ hiăng tối nhên tung hên roh hôp ƀă hơnăm 2023, Kăn xiâm hnê ngăn Kuô̆k hô̆i mơnhên, séa ngăn tơdroăng cheăng châ hriăn plĕng tơpui tơno cho môi tơdroăng ki eăng tung tơdroăng pêi cheăng Kuô̆k hô̆i:

“Séa ngăn cho tơdroăng ki kal, ki xiâm vâ pơtối pơhlêh nếo, ing séa ngăn kố vâ pin hlo khu luât môi tiah lâi, mâu tơdroăng klâi ton hâi, thâ vâ tah lôi. Séa ngăn dêi hơnăm kố tơtrŏng tung séa ngăn tơdroăng pêi cheăng, mê cho séa ngăn mâu tơdroăng ki klâi dế ai, Môi tiah séa ngăn 3 tơdroăng pơkâ pêi thế châ tơƀrê tơnêi têa cho 1 tơdroăng pơtih. Xua ai roh séa ngăn kố xua hneăng hôp ôh tá tối hdrối troh nôkố nếo ai Pơkâ ‘na tơdroăng mâu pơkâ troăng hơlâ vâ mơdêk rĕng pêi pro 3 tơdroăng pơkâ pêi thế châ tơƀrê Tơnêi têa kố tâk, mê séa ngăn nếo châ tơƀrê, ai tơdjâk, ai kơnâ, tro ƀă tơdroăng rêh ối. Séa ngăn xuân mơjiâng mơnhông cho amê’’.

Ƀă hiâm mơno “djâ hiâm tơdroăng rêh ối tung tíu hôp dêi Kuô̆k hô̆i”, rak rơkong tơkêa Kuô̆k hô̆i đi đo tơmâng rơkong tơpui tối ing tơdroăng ki ai khât nôkố, tơdroăng pói vâ dêi kuăn pơlê, hơnăm 2023, roh apoăng, Kuô̆k hô̆i tơpui tơno a Hngêi hôp kân ‘na tơbleăng tơdroăng châ tơƀrê séa ngăn tơdroăng tơleăng pâ thế dêi kuăn pơlê pơtroh Hneăng hôp má 4 ƀă Hneăng hôp má 5, Kuô̆k hô̆i hneăng má XV.

Tơdroăng kố hlo nhên cho ki pơhlêh nếo, pôu râng hnoăng cheăng, tơdroăng ki nhuô̆m rơkong tơpui dêi kuăn pơlê, tơmâng troh tơdroăng châ tơƀrê tơleăng pâ thế dêi kuăn pơlê dêi kơ koan teăng mâ ki kân má môi dêi kuăn pơlê; mơjiâng tơdroăng ki loi tơngah kân drêng séa ngăn hiăng rêh tơdroăng rêh ối dêi kuăn pơlê, tơdroăng ki tô tuăn dêi kuăn pơlê, tơdroăng ki tơmiât đi đo dêi kuăn pơlê.