Tung roh tơplâ xâ Mih, kơpong Đông Sơn cho troăng prôk dêi Khu pơto tơmeăm 559 Mô đô̆i Trường Sơn a troăng kân ki xiâm Hồ Chí Minh pơto ‘mrâm pháu, kế kâ... ing peăng Kơnhŏng mot peăng Hdroh tơnêi têa. Hâi ki mê nah, kơpong tơnêi kố tro ‘’xế’’ trếo pơkeăng ‘mêi hŏa hok dioxin dêi lêng kong têa ê, vâ mơdât troăng tơplâ ki xiâm kố. Tơraih tơƀai A So xua mê xuân cho tơnêi ki krêa hên trếo pơkeăng ‘mêi dioxin.

Sap ing khu cheăng dêi Khu xiâm pơkuâ mô đô̆i pêi kêi đeăng tơdroăng tơkêa bro mơgrúa tơnêi tro trếo ‘mêi dioxin a tơraih tơƀai A So, jâ Hồ Thị Thiêm xuân cho kuăn pơlê cheăm Đông Sơn ai tơ’nôm tơdroăng pói vâ nếo a “kơpong ki lêng kong têa ê xế hên trếo pơkeăng ‘mêi da cam’’ hiăng châ xếo tah trếo pơkeăng dioxin chiâng kơpong tơnêi krúa.

“Hdrối nah, kuăn pơlê cheăm Đông Sơn trâm hên pá puât ‘na tơnêi tơníu xua tơnêi hiăng tro trếo ‘mêi tơdjâk troh tơdroăng rêh ối dêi kuăn pơlê. Tơdroăng pêt mơjiâng tơmeăm ôh tá châ tơƀrê, tơdjâk troh tơdroăng mơnhông cheăng kâ. Kuăn pơlê pói tơngah klêi kơ’nâi mơgrúa môi tiah kố kô chiâng păn mơnăn mơnôa, pêt loăng plâi châ tơƀrê hên tâ’’.

Tơring A Lưới cho tíu rêh ối dêi mâu hdroâng kuăn ngo môi tiah Pa Cô, Tà Ôi, Cơ Tu... Tung tơplâ xâ nah, khu lêng kong têa Mih hiăng xúa thông A So dêi tơring A Lưới pro tơraih tơƀai tơplâ. Kố xuân cho tíu ‘măn trếo pơkeăng ‘mêi, cho tíu pơto trếo ‘mêi vâ khu lêng Mih xôh a kơpong peăng tơdế Tơnêi têa Việt Nam. Klêi kơ’nâi tơplâ, lâp kong pơlê Thừa Thiên Huế ai vâ chê 16.000 ngế tro tâ trếo ‘mêi da cam/dioxin, krê tơring A Lưới châ dâng 5.000 ngế.

Pôa Nguyễn Mạnh Hùng, Kăn hnê ngăn Vi ƀan tơring A Lưới tối, tơdroăng mơgrúa trếo ‘mêi dioxin tơraih tơƀai A So mơhno tơdroăng tơmâng tŏng kum dêi Đảng ƀă Tơnêi têa ƀă kuăn pơlê hdroâng kuăn ngo:

“Tơdroăng mơgrúa tah trếo pơkeăng a tơraih tơƀai A So pro tơdroăng ki loi tơngah ƀă mơngế rôe xúa ƀă mâu tơmeăm pêi lo ing chiâk deăng ki má môi dêi cheăm Đông Sơn tối krê ƀă tơring A Lưới tối tơdjuôm. Tung la ngiâ, tơring hiăng pơkâ thế ƀă Khu xiâm pơkuâ lêng mơjiâng kơpong mơđah tơbleăng tơdroăng tơplâ xâ nah xua khu lêng Mih xúa a Việt Nam ƀă tơdrêng amê, ngin vâ tơmối tung tơnêi têa ƀă lâp plâi tơnêi troh ƀă A So, ngăn kố cho um dêi hơniâp lĕm, tơdroăng ki rêh, ki rơhêng vâ tối cho tơdroăng pói vâ dêi kuăn pơlê klêi kơ’nâi tơplâ’’.

Hơnăm 2020, tơdroăng tơkêa bro “Mơgrúa tah trếo pơkeăng ‘mêi dioxin a tơraih tơƀai A So” hiăng châ Khu xiâm pơkuâ mô đô̆i pơcháu ăm Ƀinh chủng Hóa hok pơkuâ pêi pro. Troh nôkố, tơdroăng tơkêa bro hiăng mơgrúa tah trếo pơkeăng klêi lối 38 rơpâu met karê tơnêi tro tâ tung tâi tâng ƀăng deăng 9,35 ha ƀă pơcháu tơnêi krúa ăm tơring. Thươ̆ng tươ̆ng Hoàng Xuân Chiến, Ngế xiâm phŏ pơkuâ mô đô̆i mơnhên:

“Kuăn pơlê a kố, môi hiâm mơno tiô Đảng, tiô Pôa Hồ laga chiu tơdjâk râ ó dêi trếo ‘mêi dioxin xế chu a tơnêi rơxông tơplâ xâ Mih. Klêi kơ’nâi 3 hơnăm mơ-eăm, tơkâ hluâ tá pơreăng kân, pin hiăng pêi kêi đeăng mơgrúa lĕm tơnêi ki tro tâ dioxin vâ kuăn pơlê châ kong prâi lĕm. Pêt mơjiâng loăng plâi, mơnăn păn, mâu troăng pêi tăng cheăng pêi, vâ djâ kơpong pêi cheăng kăch măng, kơpong kơtiê dêi tơring A Lưới rế hía rế mơnhông krá tơniăn ƀă xông tơtêk’’.

Troh ƀă kơpong tơnêi Đông Sơn kố, môi mơngiơk ngiât nếo lâp kơpong tơnêi khăng khoăng, mơngiơk ngiât dêi mâu kơdrum loăng plâi tung mơngiơk dêi ngo ngối kong kế dế xông rêh rơdêi.